طريقة عمل مجبوس الفقع

[زمن النسيان]

مثل ما وعدتكم هذي وصفه يديده حق مجبوس الفقع…هالمره مثل ما تشوفون حمست الفقع مثل الحشو
الاختلافات بسيطه بينها وبين الوصفه السابقه
اضافه منقوع الزعفران حسب الرغبه وايد ناس ما يستسيغون نكهه الزعفران والفقع

المقااااادير:
بصل مفروم
فصوص ثوم عدل
بهارات المجبوس مالت سمراء عدن وزياده عليهم مسمار و دارسين و كزبره مطحونه وهيل ناعم
كركم
طماطه مقصوصه لي النص على شكل +
لحم مقطع حسب الرغبه
بهار
لومي
هيل
دارسين
ملح
فقع
عيش منقوع ومغسول
زعفران منقوع

الطريقة:
نفوح اللحم ربع ساعه ونكت مايه ونرد نغسله بماي حار
نحمس البصل والثوم لين يذبل لونهم ونضيف اللحم والبهارات ونحمسهم لين تطلع ريحتهم
نضيف الماي والكركم و البهارات واللومي والليمون ونتركهم على نار متوسطه لين ينصج اللحم
قبل النضج ب5-10 دقايق نضيف الفقع و الملح
بعد النضج نشخل المروق ونشيل اللحم منرش عليه لومي ناعم وبهار وهيل ودارسين ناعم و ندخله الفرن عشان يتحمر

نحمس البصل مع بزار وبهار وهيل ناعم ونضيف الفقع حقه ونضيف شوي من مروق اللحم وماي الزعفران ونتركه لين يبنشف المروق ونتاكد من النضج الكامل

نرد باجي المروق بالجدر ونعدل الملح نضيف شوي هيل ناعم … اول ما يغلي نسقط العيش واذا نشف المورق نوطي النار ونضيف الزعفران ونخليه يكمل سواه على البخار بعد ما نحط زبده او زيت علىويه العيش ورشتين هيل ناعم

بالنجاب نصف العيش وفوقه حشو الفقع واللحم وبالعافيه

مجبوس لحم مع فقع2…



احب هالوصفه… ولذيذه بطريقه تخليكم تغوصون فيها… بكتب اسهل طريقه وعاده اسويها باكثر من طريقه… اذا سويت الطرق الثانيه رح اذكرها
هني نسيت اسلق الفقع مع اللحم فطبخته مع العيش واكتشفت طعمه صار احلى… تقدرون تحمسونه وتخلونه مثل الحشو وهم هالطريقه حلوة وان شاء الله انزل صورتها اذا سويتها .. وهذي صوره ثانيه للوصفه


نحتاج الى
المقااااادير:
فقع منظف ومغسول
لحم غنم
طماط مخلوط بالخلاط
بصل مكعبات
زيت
مكعب ماجي لحم حسب الرغبه
بهارات كامله ( هيل ودارسين وكزبره وعرج الهيل وفلفل اسود ومسمار و زنجبيل ناشف وبهار حب وحبه حلوه)
بهارات ناعمه ( بهار حشو (( اخذوه من سمراء عدن يهبل)) و هيل ناعم و بزار ولومي و دارسين )
عيش مغسول ومنقع بماي دافي وملح
الطريقة:
نسلق اللحم مع هيل و دارسين وحبه حلوه و شيبه اذا عندكم لمده 10 دقايق وبعدين نقط الماي
نحمس البصل بالزيت ونضيف له اللحم والبزار والبهار واللومي والبهارات الكامله بعد نفتحها شوي عشان تطلع نكهتها اكثر
نحمسهم زين وبعدين نضيف الطماط ونخلطه لين يثقل شوي
نضيف الماي الساخن ونتركه لين يستوي..حطوه بجدر الضغط اذا كنتو مستعيلين
نشيل اللحم ونرش عليه بهار وهيل ناعم ودارسين ولومي
ناخذ الماي الصافي ونزيد ملحه ونضيف ماجي اذا حبيتو ( انا ماحب اضيفه ) ونسلق الفقع فيه 5 دقايق تقريبا ونحط فوقه العيش ونخلييهم ينضجون سوا
نخفف النار بعد ما يشرب العيش المروق ونلف الجدر بقصدير ونخليه على نار واطيه لين يترسا
بالتقديم ننجب العيش مع الفقع ونصف اللحم فوقه

عوااااافي

[نقاء الروح]

سلمت الايادي الطيبة اختي الكريمة
في الابداع والتواصل المستمر
في نشر الجديد والمفيد
احييكى على اختيارك الرائع والمميز

[دارين]

وصفة شهية
ان شاء الله اجربها

[بنت الديره]

سلمت اناملك على كل جديد تتحفنا به
استمتعت بالمكوث هنا

[حكايه قلب]

كالعادة إبداع رائع


وطرح يستحق المتابعة


شكراً لك