درب الحياله والنذالة للأدناس............؟؟

[بنت ابوها]

من كان لا يجرح ولا هو بيداوي
قلَّه ترى ما له مكانٍ مع الناس


ومن لا يميِّز كل شي متساوي
تصبح حياته ضايعه ما لها ساس


ومن لا عرف في خوِّته من يخاوي
يندم وتالي الوقت يبشر بالإفلاس


ومن لا يعيل الناس ما هي بتاوي
تبلاه في نفسه من الناس الأنجاس


ومن لا يسر نفسه فلا هوب قاوي
يسِر غيره لو الأرياق يبَّاس ...

ولا عاش بالحيلات من هو حياوي
درب الحياله والنذالة للأدناس


ما سرَّت ضعوف الرجال المناوي
ولا يدري الحر المعرَّب على الياس


وأنا الذي ما ني على الناس غاوي
فيهم ذهب و فيهم بعد فضه و نحاس


فرق وتفاوت بينهم بالهقاوي
في الناس مَطنوخٍ وفي الناس لا باس


أحدٍ علي ربعه كما النجم ضاوي
المرجلَه ثوبٍ له إقياس وإلباس


من صغر سنَّه للمراجل شفاوي
ربعَه من أسبابه تنومس تنوماس


وش هالمصيبه ألا وش هالبلاوي
لا قِيل وجه البوم يا طير قرناس


صار التِّبِع متبوع والشيخ شاوي
تسبقه حراسٍ وتتبعه حراس


وإليا حكا تسمع إصياح وعزاوي
كلٍ ينعِّم له بلا حد وإقياس


أما الوضع مقلوب ما له إمداوي
أو وقتنا هذا له أشكال وأجناس


فأحسن لي أجلس في مكاني خلاوي
ولا أماشي إللي خوِّته تنزِّل الراس


والله ما أهين النفس ولا ني بناوي
رزقي وعمري كافله خالق الناس


:81: :81: بنــــــــــت ابـــــــوها :81:

[كبرياء انثى]

كلمات رااائعه
مشكوووره حياتي
نتظرجديدك
دمتي بحب

[مطعون بسهام الغدر]

والله ما أهين النفس ولا ني بناوي
رزقي وعمري كافله خالق الناس

[بنت ابوها]

ربي يسعدكم
منوووورين

[ح ـآلم]

قصيدة جميله
وتحمل نصائح رائعه

صح لسان الشاعر ولاهنتي بنت ابوها على اختيارك
يعطيك العافيه
.

كل الود

[بنت ابوها]

ربي يعافيكـ من كل مكروهـ
أسعدني تواجدكـ