شاب قرر أن يكمل نصف دينه
وطلب من أمه أنها تدور له عن بنت تناسبه , الأم في ثواني بس تطرح امامه عشرات الفتيات
فلانة بنت فلان
فلانة قريبة فلان
فلانة صديقة فلانة
تختار وحدة منهن تروحون لبيتهم وتخطبها يوافق الأهل وتوافق البنت
تحددون يوم لكتب الكتاب يجي الشيخ ويعقد بينكم
الكل قاعد يباركلك هذا الزواج وأنت في قمة سعادتك
وما أن يعلن الشيخ بأنك أصبحت زوجها حتى تبدأ بالتحليق في خيالك
بزوجتك وبيت الزوجية ويوم الزفاف وليلة الدخلة والأولاد
والبنت نفس الشي مجرد ما يبارك لها الجميع هذا الزواج وتسمع الزغاريد والتهاني
ورغم خجلها الشديد إلا أنها لاتتوانى في التفكير في بعض الأمور
ووسط هذه الفرحة والتي تغمر الجميع..
يسأل الشاب الأب..
الشاب/ عمي متى اشوف المدام
العم/ الوقت اللي تبيه البنت صارت حليلتك
الشاب / والإبتسامة واصلة لأذونه .. ممكن الحين ..؟
العم/ أكيد....ياخالد أزهم على اختك زوجها بيقعد معها
الشاب من يسمع زوجها بيقعد معها...عاد حدث ولاحرج...
المهم طلع الشاب في غرفة وجت زوجته وشافوا بعض ماصارت بينهم سوالف كلهم مستحين
شلونك
الحمدلله
شلونك أنت
الحمدلله
طق طق طق
ولا الأب داخل ..يالله يبه اطلع الجماعة برا بيباركون لك
طلع الشاب وهومستانس لأنه متأمل بيرجع يشوفها مرة ثانية
لكن عند مين ..
جا اليوم الثاني والشاب طلب من الأب يحدد موعد علشان يوم التلبيسة
حددوا اليوم لبسوا الخواتم والشاب ياعيني فرحان بيقعد مع زوجته لحالهم
يادوب لبسها الخاتم إلا طلعوه لديوانية الرجال
الشاب / ياعمي ياجماعة اقدر اقعد مع المدام شوي
الأب / وش هالكلام وانا ابوك خل قعداتكم لبعد العرس
الشاب / ياعمي لازم نقعد مع بعض نسولف نفهم بعض نتقرب من بعض
الأب / والله ياولدي على دورنا الرجال مايشوف مرته غير يوم العرس
الشاب / طيب ياعمي متى تحدد يوم العرس انا اقول خلينا آخر الشهر أنا جاهز
الأب / وش آخر الشهر ليش مستعجل مافي زواج غير بعد سنة او سنتين
لين تتعرفون على بعض زين
الشاب/ طيب ياعمي شلون نتعرف على بعض وانت تقول خلوا قعداتكم لبعد العرس
الأب / عندك التلفون كلمها وسولفوا للصبح
طبعاً الشاب مضطر يوافق وبالفعل بدت المكالمات وبداية أول يومين كانوا يسولفون 12 ساعة
هذا إذ كانوا مشغولين طبعاً وماعندهم وقت..
الأب ماعجبه حال البنت طول اليوم ماسكة الجوال وكل شوي منحاشة بلها زاوية
مسك بنته وقالها من اليوم وطالع لاتكلمينه لين يجي يوم العرس
والعرس بعد سنة...يعني بعد 12 شهر...يعني بعد ....واحسب وانت طالع
لازيارات لامكالمات ...
رغم انها زوجته ومن حقه يقعد معها وهو ماطلب منها شي غير السوالف
بس الأب عنده قناعة إن شباب هاليومين لعابين
الواحد يخطب البنت يقابلها كلمة من هنا كلمة من هناك لمسة من هنا و ..و...و...
وبعدين تطيح الفاس بالراس والبنت تطلق والأب يحمل عارها طول عمره
هذي الفكرة عند أغلب الشيبان وسمعنا قصص من هالنوع كثير
مابالغت وماجبت شي من عندي
لاتخلي بنتك تقعد مع زوجها لين يوم العرس
طب إذا كان يوم العرس بعد سنة او سنتين من يوم الخطبة وش اللي يمنع أنهم يشوفون بعض..؟
طب شلون الأب يتطمن على بنته وأنها ماتغلط بشي قبل يوم العرس؟
وش الحدود اللي لازم يتقيد فيها الشاب إذا بيقابل زوجته في بيت ابوها..؟
والبنت يحق لها تطلع له بكامل زينتها ولاتتحجب وتطلع الوجه والكفين علشان ماتثير الزوج..؟
وبرايكم المدة او فترة الخطوبة إذا كانت طويله إجبارياً
بسبب الظروف يحق للأب وقتها يمنع الزوجه عن زوجها..؟
والنظرة السيئة اللي ماخذينها شيبانا عن الشباب هل هي حقيقية وتنطبق ع الجميع..؟
وش هي الأسباب اللي تخلي الشباب يتصرفون بهالدناءة مع زوجاتهم ..؟
أتمنى التفاعل وإعطاء آراءكم بكل صراحة
وأعتذر ماقدرت اختصر أسئلتي لأنها مهمة ومحتاجة لإجابات
خاصةً للي مقبلين على الزواج...
المفضلات