قصه لاتفوتكم مع القصيده

[بنت ابوها]

السلام عليكم ورحمة الله وبركاته

حبيت نغير شوي من القصص والرويات واحضرت لكم قصص زمان اللتي

كانت هي نديمة العرب ومنها تاتي الاستفاده من كل فعل حميد

وترك كل مابه عيبه او نقص على الجنسين سواء..اتمنى ان تعجبكم

هذي الله يسلمكم قصة شاعر وفارس يقاله له بداح العنقري كان من امراء ثرمداء ... وكان رجل تاجر ... وكانوا يجونه البدو كل سنه يشترون منه بالدين اغراضهم وحوائجهم وكان رجل آمين وخلوق وكريم وصاحب مروه وشهامه ... وكان يديّن اللي يشترون منه الي السنه اللي بعدها يجون يشترون منه ويعطونه فلوسه الاوله ....


وحدى السنين جاه احد خوياه يشتري منه وكانت معه بنته مزيونه .... المهم ان بداح رحب بهم واكرمهم واشتروا منه ورجعوا لديارهم بالباديه .... فقرر بداح ان يتزوج بنت صاحبه ...


وفعلن عقب مامشوا منه وبعد كم يوم من مشيهم .. ويوم هقا انهم وصلو ديارهم شد على فرسه ولحقهم ... ايام وليالي لاوالله الا هو واصلن عندهم .... فرح خويه بالحيل وهلا به واكرمه ... وثاني يوم قال بداح لخويه انا جايك طالب ايد بنتك هيا ... فقال ابرك الساعات وارخص لي اخذ راي البنت ... فراح الابو ونشد بنته وبداح يسمع حيث ان صوتهم كان مسموع .. وقالها يابنتي بداح العنقري جاي يطلبك حليلتن له وش تقولين ؟؟ قالت البنت : هذا حضري .. خيال تصفيح مايصلح لي ولا أصلح له .... سمع بداح كلام البنت ... فجاء الابو مستحي وماتكلم .. قاله بداح ماله داعي الحيا والزواج قسمه ونصيب .. مير انت بيض الله وجهك وارخص لي هالليله ابي انام والصبح ابي امشي لاهلي ...


المهم جاء الليل وعجز لا ينام بداح من القهر من اللي سمعه ان البنت ماتشوفه شي وانه ماهو شجاع ولا به خير .. فتمنى بس لو يجي موقف يقدر يثبت به وجوده ........


المهم يوم اصبح الصبح مع الفجر .. يوم صاح الصياح .... الغزو الغزو .... اثاري قبيلة ,,,,,,, غازين وماخذين حلالهم .. فتفازعت القوم والحقوا الفضول وبداح قاعد ايتقهوى ماتحرك ابد (( لان الضيف مايلزمه شي )) فجته البنت هيا اللي كان يبيها تناظر له باحتقار وتقول حضري خيال نظره ..... حضري خيال نظره .... تعني انه بس مظهر ومحتقرته لانه مافزع مع القوم ...........


المهم وهم يلحقون الفضول واتشابك السيوف ويعجزون اهل الحلال لا يفكون حلالهم وهم يرجعون حول الضحى منكسرين وخايبين ولا ردوا شي .... وبهكاللحظات والناس والحريم كله طالعه تناظر الحال فقام بداح يوم شاف ان معازيبه انكسروا وقدام الكل والبنت تشوفه وركب فرسه وخذا رمحه وطنب يم ,,,,, يبي يرد الحلال لحاله ..... الناس استغربت والبنت اندهشت ... وهو يلحق ,,,,,, وادخل بينهم واذبح واذبح والبخيت اللي نجا .. وهو يرجع بالحلال حروة العصر لحاله ... وكانت الناس تستقبله كله .... واول ما اقبل يم الديره ومعه الحلال اركضت عليه هيا وقامت تهلهل مثل انه تعتذر منه وقابله الزواج به .... فركز رمحه عندها وقال :



الله أحد ياما غزينا وجينا
وياما ركبنا حاميات المشاويح


وياما على اكوارهن اعتلينا
وياما ركبناهن عصيرن مراويح


وياما تعاطت بالهنادي يدينا
وياما كسبنا من حلال المصاليح


وراك تزهد يريش العين فينا
تقول خيال الحضر زين تصفيح


الطيب ماهو بس للضاعنينا
قسّم على كل الوجيه المفاليح


البدو واللي بالحضر نازلينا
كلن عطاه الله من هبت الريح


يوم انجمر رمحي خذيت السنينا
واودعت عنك الخيل صم(ن) مدابيح


هيا عطينا الحق .. هيا عطينا
وان ماعطيتيناه والله لا صيح


لاصيح صيحت من غداله جنينا
والا خلوجن ضيعوه السواريح


ياعود ريحانن بعرض البطينا
ومنين ماهب الهوا فاح له ريح


يابو نهيد(ن) تقل فنجان صينا
والا كما بيضن للمشقا ذوابيح


لاخوخ لا رمان لاطلع تينا
ولا مشمش البصرة ولا هن تفافيح




ويقولون عقب القصيده مشى وخلاها ماتزوجها فقامت هيا من زود القهر وحطت الرمح بصدرها وماتت قهر انها عييت عليه وهو عيا عليها

بنـــــــــــــت أبــــــــوها

[بروفيسور ينبع]

اولا بدايه بالشاعر بداح العنقري

انا من المعجبين بقصائده كثير واغلبها مع قصص مع بنات الباديه


طبعا القصه هاذي نستنتج منها اشياء كثيره

واهمها عدم الاستهانه او الحكم على شخص من خلال مظهره او قبيلته

كما قيل سابقا يضع الله سره في اضعف خلقه

وهو رجال اللي قفا وخلاها



طبعا انتقاء ليس مستغرب

قرائتها كامله واستمتعت بقرائتها

كثيرا


تقبلي اطلالتي الصباحيه مع اشراقة شمس حروفك البرونزيه


بروفيسور ينبع

[بنت ابوها]

ياهلا فيك أخوي أسعدني تواجدك في صفحتي

[•°بسمـــہَ خ ـجل°•]

قصه رائعه
بإنتظار المزيد

[بنت ابوها]

الاروع مـــــــــرورك فديتك