{..تراتيـــــل العشــــاق..}

[♥} آمـل الـ عٍ ـشآق ♪]

!
آنا الحب في رسمة
..
انا الحبيب في حسنة
..
انا البدر في نورة
..
ف ملك قبله الحبيبه
..
بقصائد البدر غير مريبه
..

[♥} آمـل الـ عٍ ـشآق ♪]

قَصِيْدَةْ : الحُبْ عَبْدِيْ و سَيِّدِيْ ..

لا تشد القيد ...
تجرح يدي ... أو تجرح القيد ...
قيدك غدى يوجع يدي ...
سجني أنا انت ... وسجنك أنا ...
والحب ... الحب عبدي وسيدي ...
لا ... لا تشد القيد ...
دمي ... جرى ... دمك ...
همي إني اشوفك في يدي ...
وإلاّ يدي همّك ...
في معصمي صرت ...
إنت السجين في معصمي ...
وكانك تصبرت ... أنا مقوى الصبر ...
دمعي في عيني ... وصرختي تملا فمي ...
سجني وسجاني ... أحزانك احزاني ...
وشلون ابنساك ... وشلون تنساني ...
محبوس في عيونك دمع ...
وزنزانتي ... تقطيبة الحاجب ...
وحاول توارى في الجفا ...
يا وجهه الصاحب ...
بتشوف نفسك في يدي ...
قيدٍ رقيق ...
قيدٍ سلب حريتي ...
ليته طليــق ...
يا صاحبي ... ما به ابد قيدٍ طليق ...
لا ... لا توجع يدي ...
سجني انا انت ... وسجنك انا ...
والحب ... الحب عبدي وسيدي ...

::

قَصِيْدَةْ : أَوْرَآقْ الزَمَنْ ..

ادفن يدي .. تحت الثرى ..
واسقيها من جفني ارق ..
يذبل مابين اصابعي ..
عشب و ورق ..
ادفن يدي .. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن ..
وانام ..

في حلقي الليله جفاف ..
شربت أيامي .. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام ..
كل ما اشد اصابعي ..
على العيون المتعبه ..

جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد .. جاني قصيد ..
ادفن يدي تحت الثرى .. فوق الثرى ..
واعيش انا بباقي يدي ..
نصفٍ يموت .. ونصفٍ درى انه يموت ..
يا سيدي .. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإماني اكون ..
يارب .. اكثر من بشر ..

[♥} آمـل الـ عٍ ـشآق ♪]

قَصِيْدَةْ :حَسَـآيْفْ ..

التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...

حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... ما جت على وقت الوعد ...
إلا ذاك اليوم ...
و عمرها ... ما بكت .. و ما ضحكت ...
ما حكت له .. واسكتت
مثل ذاك اليوم ...
كانت أجمل من خياله ... كانت انضر ...
كانت أكثر ... من أماني عمره الظامي حنين ..
و اختفت ... من كساها الليل باللون الحزين

اختفت في الطريق اللي معه ...
كانت تجيه ...
كيف دربٍ جمعه معها ... خذاه ...
ليتها اختارت سواه ...
تزرع القرقا لياليها ... عليه ...
وحسايف ... حسايف ...

::

قَصِيْدَةْ :الإِخْتِيَـآرْ



ودي اختار.. الليله درب ..
ما تعرفه ..
ودي اجلس في مكان ..
ما يذكرني بصدفه ..
أو وعد ..
ودي أحكي يا حبيبي .. مع احد ..
غيرك احد ..
لجل النهار .. وحريتي ..
اعطيني .. لحظة اختيار ..
وحدي وغديت أنت الزحام ..
وحدي أبد .. وانت الكلام ..
نورك وما غيره .. ظلام ..
عذب الحروف .. طاغي الطيوف ..
أبعد عن عيوني .. بااشوف ..
لجل النهار .. وحريتي ..
اعطيني .. لحظة اختيار ..
ابي درب .. مايوصلني لدارك ..
ابي وعد .. ماحتمل فيه انتظارك ..
وابي ليل .. مايجي بعده نهارك ..
ودي ادري .. هي حياتي ..
اختياري .. أو اختيارك ..
ودي انسى .. ليله وعدك .. أنسى وعدك .. ماأجيك ..
وش يضرك .. لواخونك .. مره واختارك عليك

[♥} آمـل الـ عٍ ـشآق ♪]

قَصِيْدَةْ :بَسْ أَحْلَمْ ..! ..


صحيح اني انسى الحوادث والملامح و الاسامي..
لما أكتب عن غرامي .. شعر ابعد ما يكون عن مجرد
جرح دامي ..
يمكن أقرب للجنـــــــــون...
من تفاصيل الحكاية..الاساور والمرايه..
عندي همــــــوم القصيده غامضه صعبه عنيده..
وانت عاشق للوضــــوح ..
ودك بسري ابوح..و انا اخر همي بــوحي
اعبر الشارع ... في الرصيف الثاني قهوه
فيها اربع طاولات ..وحده اجلس فيها وحدي ..وحده للي بيجي بعدي .. وحده لأغلى حرف عندي..أما اخر وحده دايم للي فات..
من هموم وذكريات ..زحمة لكن كل من في القهوه ربعي
كلهم دمي و دمعي ليه ما تجلس مكاني
وهذا شوفي وهذا سمعي اطلب اقلام ودفاتر ..وحاول اكتب عن شعور ..لاهو ظلما و لا هو نور ..
قلب مابين السطور .. وانا اكتب اغنيه مثل الرسايل كنت اكذب .. و الخيال العذب كذب ..
كنت لازم اخفي سري و ما اقول
ان هالمره قصيدي هو خيالات الحقــول تطرد اسراب الطيور عن حقيقه عن شعور ....
ما هو في ذهب السنابل .. انما تحت الجذور ..
كســـــروا العشـــاق بابي ...
قطعوا لحمي ثيابي.. وخلعوا الادراج ..
طاحت مزهرياتي الجميله شققوا جفني كتابي وسألوا
وين الجديله
ودمعة العين الكحيله مالقوا في بيتي الا .. وما لقوا في صدري الا .. وما لقوا في قلبي الا ..
امنياتي المستحيله ..
و اني احـــلم بـــس احلــــم ..

::

قَصِيْدَةْ :أَجْمَلْ زِمَـآنَهْ


ما سألته .. إسمه .. عنوانه .. مكانه ..
ومرني .. أجمل زمانه ..
مر في قلبي وراح .. خطوته مست جراح ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..
يا إنت .. خبرني من إنت ..
جرحتني وين الدوا .. وين إنت ..
انامين انادي .. وليه أنادي ..
من أي وادي العطر ..
من أي شمس النور ..
ولا الشجن من أي شارع ..
وما سألته كيف .. ضيعته خجل ..
ما سألته ما مداني .. كلها كانت ثواني ..
حرف من خوفي قتلته ..
وحرف عانقني وعصاني ..
بس وقفت فـ مكاني ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..

[♥} آمـل الـ عٍ ـشآق ♪]

قَصِيْدَةْ :أَرْقَـآمْ ..


في آخر الصفحه .. يسار ..
خبر صغير .. حادث قطار .. مات أربعة ..
مكتوب في السطر الأخير ..
باقي التفاصيل .. في الصفحة العشرين ..
على الثرى .. وبين الورق ..
أجسادهم امقطعة ..
الأربعة .. لجل المساحة ماتشيل ..
وفي باقي الصفحة صور ..
فنان .. وحصان .. و كور ..
وابحث عن الخبر الحزين ..
في نهاية الصفحه يمين ..
حادث قطار ..
ماتوا ثلاثة وطفل ..
وباختصار .. شديد .. شديد ..
كان القطار .. هو الوحيد ..
اللي بأسم ..
بلا ملا مح .. أو أسامي ..
ليه كلنا نموت ..
ليه نهمل الجثه ..
ونتذكر التابوت ..
لأقدامنا صوت ..
من يسمعه ..
من يسمع الأقدام..
هم مروا من تحت الكلام..
الأربعة ..
وصاروا أرقام .. أرقام ..

أنا رقم .. اصقه ضرير ..
المشكلة .. مثلي كثير..
يجمعنا حب الهاويه ..
احلامنا .. انا نصير..
وقاماتنا متساويه..
نركض على ورق الحياه ..
لين ننمحي ..
المشكله مانستحي ..
إنا نمرّ ..
ماشافنا انسان ..
ولا سمعنا انسان ..
اكتبني يالنسيان ..
انا رقم ..

::

قَصِيْدَةْ :أَوْقَـآتْ

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنامدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..
أحبك .. مأقول أوقات

[♥} آمـل الـ عٍ ـشآق ♪]

قَصِيْدَةْ :تَرْحِيْبَـةْ الحُزُنْ و اللَيْلْ ..

لما يبعد ... في المساطيف المسافر ..
لما يخفيه الضباب ..
لما يرحل ... بالأمل وبفرح باكر ...
لما ينسا لي عذاب ...
هلا ... يا حزن ...
هلا بالصاحب الطيب ...
ابد ... لو تبعد قريب ...
هقيت إنك مع الفرقا ... تبي تنسى حنينك لي ...
هقيت انك بعد مليت ...
من الماضي عذابك لي ...
عسى ما جرحك فرحي ... عسى يا حزن ...
أنا لو خنت في جرحي ...
وضيعني ... الهنا ليله ...
ترى ما في يدي حيله ...
هقيت إني لمحت النور ...
بيمسح دمعي المبهور .. بمنديله ...
سحرني حلو ترتيله ...
لما يسري في الفضا .. نجم السهاد ...
لما يطفيه السحاب ...
لما يملى عمرنا الماضي السواد ...
تصبح البسمه ... صواب ...
هلا بالليل ..
هلا والله ..
يا ضاوي لو أضمك لي ..
على صدري ... وافني فيك أشواقي ..
أماني ...عمري الباقي ...
هلا بالليل ...
حبيبي كسر الفرحة على صخر الجفا الجاير ...
حبيبي حزنه الزاير لياليا ... يحبك ليل ...
يقول ازرع ضنى شوق النوى فيا ...
وأنا في موعد الشكوى ...
أبي شكوى ... أبي دمعة ضنى تسوّى جراح العمر ...
هلا بالليل ... يا ضاوي بالحنين المر ...
هلا ... والله ...


::

قَصِيْدَةْ :أَتْرَآمَىْ
اترامى
هذي عاداتي
في كل العمر مره .. اترامى ..
وصدقيني في حياتي ..
ما هقيت اني عقاب .. ولا يمامه ..
انما لعيونك إنتي ..
طرت لاجمل إبتسامة
لين قلتي وين جناحانك..؟
وين جنحاني .. ؟! وطحت ..
طحت من أعلى غمامه..
أنا ما ادري مريت بين أصابعك رمل ..
او على خصلات شعرك .. ماء ..
كانت غبارٍ وظلما
وكنت أطيح ..
وهذا آخر مااتذكر ..
وين ظنك با تجرح .. واتكسر
فـ أي رمل .. أي صخر .. او عدامه ..
ما هقيت أني عقاب ولا يمامه
انما لعيونك إنتي ..
طرت لاجمل إبتسامه
وما ابي غير السلامه
من الجروح .. ومن التداوي
كيف أمس الأرض .. واطيح متساوي
انا صدقت الصغار .. يوم قالوا :
من يحب القمرا يرحل .. لآخر أرض
وينتظر تالي نهار ..
ولا ظهر منها شبر ..
عانق القمرا .. طمر ..
كيف ضاعت كل أحلامي هقاوي ..
يوم قلتي : وين جنحانك ..
وين جنحاني .. ؟! وطحت ..
طحت من أعلى غمامه..

[♥} آمـل الـ عٍ ـشآق ♪]

قَصِيْدَةْ :آهْ يَا الجِرَآحْ ..

لا جيت أنا بــ سامحك..
تبكي الجراح ما ودها..
مشتاق ودي أصافحك..
عيت يدي لا مدها...
آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك ..
آه يا الجراح .. راح اللي راح..
وراحتي .. من يا ترى بيردها ..
لا تحاكي عيوني .. يمطر سحاب الملح ..
ولا تلمس أشجوني .. ينبت في قلبي جرح ..
ناظرني يا خلي .. جرح انا كلي ..
وشلون أبـ ارضى الصلح ..
فصل الخريف حبي ..حزن وورق أصفر..
...ودعني يا قلبي..وخل العذاب أقصر..
آه يا الجراح .. راح اللي راح..
وراحتي .. من يا ترى بيردها ..


::

قَصِيْدَةْ :إِنْتِ حِلِمْ

انتظرتك .. عمري كله .. وانتِ حلم
ومرت الايام والله .. وانتِ حلم..
ليه تأخرتي علي ..
توهي مره واسالي ..
كوني في غير الزمان .. والا في غير المكان
كوني عمري .. عمري كله..
اللي باقي .. واللي كان..
انتظرتك عمري كله .. وانتي حلم ..
كل نجمه شعشعت والقلب عتمه .. كانت انتِ ..
كل حرفٍ حرك شفاهي بكلمه .. عنك انتِ ..
وكل حبي اللي مضى والحب قسمه .. منك انتِ ..
كانوا الاحباب ظلك .. بعض احساسك ونورك ..
ما عرفتك يوم كلك .. ياللي في غيابك حضورك ..
انتظرتك عمري كله .. وانتي حلم ..
هذا إنتِ .. قولي والله إنه إنتِ ..
وين غبتي ؟! .. عني هذا الوقت كله ..
وين كنتِ ؟! ..
شيبت عيني طيوفك .. وما أصدق إني أشوفك ..
ياللي قلبي في كفوفك .. نقش حنا ..
وفي جديلك عطر ورد ..
آتمنى .. لو تكوني في فراغ اعيوني وعنى
وفي سموم ضلوعي برد ..
ليه تأخرتي علي ..
وما طرى لك تسألي ..
ليه نأخرتي علي .. وما طرى لك تسألي ..
إنتظرتك عمري كله عمري كله .. وانتي حلم

[♥} آمـل الـ عٍ ـشآق ♪]

قَصِيْدَةْ : أَحْ ـبَـآبِكْ سَرَوا ..

مابه احد غيري يابنت.. احبابك سروا..
لاتسأليني تغيروا.. يمكن نسوا او مادروا..
ياحلوتي ضاع الوعد.. وباكر بعد..
مري على دروب الجراح.. وتلقين احد غيري..

بالله لاتبكين عندي.. والى رحتي سوى اللي تبين
مالك عزى.. فـ قلبي الحزين
محتار انا اسكت.. ومدري ايش اقول
لاني سبب جرحك.. ولاعندي الحلول
لكن ابوصيك بصبر.. لابد للغايب عذر
وياحلوتي ضاع الوعد.. وباكر بعد...
مري على دروب الجراح.. وتلقين احد غيري


غطي سنا خدك بشال الليل..
وغيبي ياشمس اللي ضيها لغيري..
اه .. لو تعرفي وش كثر انا احبك.. لو كنتي تدري بي
ياعيونها السود.. مابه احد موجود.. غيري انا الموعود
جرحي.. وتعذيبي..
ياحلوتي ضاع الوعد.. وباكر بعد...
مري على دروب الجراح.. وتلقين احد غيري...


::

قَصِيْدَةْ : تَعَـآلِيْ


عتيم الليل ...
قمرنا من زمان والله ... فقد نوره ...
عتيم الليل ...احس النظره تتكسر ...
على سوره ..

سهرنا ... في عتيم الليل ... حزين الهمس ...
قدرنا ... ننتظر باكر ... شعاع الشمس ...
تعالي ... طالت الغيبه ... وانا مشتاق ...
انا مشتاق ... انا الاشواق ... انا العشاق ...
تعالي من جسور الليل ... تعالي ضي ...
تعالي في هجير العمر .. حنان وفي ..
وربي ... طالت الغيبه
حنون الليل ... وصوتك همسة التحنان ..
حنون الليل .. بيروي بالامل عطشان ...
حنون الليل .. وانت بتسمعي صمتي ...
تحسي بي ...
تقاسي فيّ تعذيبي ...
تشديني من الامواج ...
ترسّيني على مينا ... وصوتك في ليالينا ...
أبد ساري ...
حنون الليل ... وانت الريح والساري ...
تعالي ... طالت الغيبه
وربي طالت الغيبه ..

[♥} آمـل الـ عٍ ـشآق ♪]

قَصِيْدَةْ :جَرْحِيْ .. بِـ خِيْرْ ! ..

ومرت سنه .. على فراقك
على صوتك .. واشواقك
غريب كيف االزمن يرحل
واحلام العمر .. تذبل ..
سنه مرت .. وانا أول ..
حبيبٍ يوقد الشمعه
لجرحه في يوم ميلاده
هلا .. بالحب .. واعياده
وكل عامٍ .. وجرحي بخير

مشيت دروبنا .. خطاوي قلوبنا
ومريت الوعد .. وعدنا العام
ماكان الوعد .. ولا الأيام .. هي الايام
وما ادري ليه هالشارع .. نسوه الناس
ومتى هالمقعد الخالي .. يجوه الناس
حبيبي .. ليه فـ غيابك .. يغيبوا الناس
حبيبي .. ايه والله حبيبي .. ايه والله
نساني العمر.. لو انساه
نساني الفرح .. لو انساه
احبه .. ما ظهر نجم .. ونبت عشب .. وسرى براق
أحبه .. لا زمن يشقي جروحي .. لا جفا .. وفراق
أنا هذا الهوى كله .. وقلبي آخر العشاق ..

::

قَصِيْدَةْ :خَطَأْ


خطأ..
تبخل .. وأنا كلي عطا..
خطأ ..
ضاعت على الدرب الخطى ..
خطأ ابتدينا ..
وان نهيناها .. خطا !!
تزرع طريقي .. بالألم..
يا خوفي .. لا توطاه القدم ..
تجرح ظلايل.. فيتك ..
وتدمي ..أماني جيتك ..
لو فرحت.. بجيتك !!
بعد الظما.. وبعد الهجير ..
تخفي حنانك .. بالضمير ..
لو ما جنت ..
عينك علي بنظرةٍٍ .. لو ما جنت
ولو ما رضيت .. تحدني ..
روح الشقاوي .. ما عنت ..
واستهونت درب الهوى ..
ولو ما غدى جرحي دوا ..
ليته غدا..
عودتني منك الحنان .. عودتني
وطال النوى وجار الزمان .. صبرتني ..
وإثر الهوى .. مثلك غريب ..
ماله .. على نفسه حبيب ..

[♥} آمـل الـ عٍ ـشآق ♪]

قَصِيْدَةْ : أُغْنِيَـةْ فِيْ العِشْقْ و المَوْتْ ..

ضمي مَلامح صورته ..
ضميه .. لعله يفيق ..
يَشهق .. أو يَردّ النَّفسْ ..
ضمّيه لعَله حبس ..
صٌوته .. رعشة عرٌوقه ..
وخيم حزين الصمت فُوقه ..
مات .. مات
من قبل ما يكتب له فـ قٌربك حياة ..
من لبسه ثوب البياض ..
من سبل عيٌونه ..
مسح غبرة جبينه ..
وش يفيد ..
اللي زرع نصلٍ حديد ..
في قلبه الطيّب نسى ..
قولي عسى .. ما تلمحي ..
فـ طرف ثُوبك له دما ..
يا خٌوفتي .. اللي سبح في نهرك الجَارف ..
غد اموته ظما ..
ضمّي ملامح صورته ..
ضمّيه لعله يفيق ..
يشهق أو يرد النفس ..
صوته جرس ..
ينحب على بوابة الليل ..
يوقظ خدر جرحك ..
يتل من عينك احبال الدّمع
ضمّيه لعله سمع ..
انك تحبينه ..
ولا ..قلتي تحبيه ..
ولا .. قلتي تحبيه ..


::

قَصِيْدَةْ : تِخَيَّلْ ..!


تاقف على اطراف الهدب .. وماشافتك عيني
صافحتني ومدري يدك هي لمست ايديني ...
سلم .. ابارد السلام ..
وهذا ترى كل الكلام ..
اللي بقى بينك وبيني ...
تخيـّــل ...
من وين ... ومنين ومتى ...
بالله ذكرني ...
بالله ذكرني ... متى
جيتك انا فـ ليلة شتا ..
تهزني ريح الشمال ...
محتاج انا لبسمه وشال ...
تركتني لبرد الطريق وانا على بابك ..
اتذكر انك قلت لي بالله وش جابك ..
ودعتني قبل السلام .. وهذا ترى كل الكلام
اللي حصل بينك وبيني ...
تخيّــــل ...
اليوم لعيوني السما والارض البعيد ...
اليوم ولغيرك انا يطري على بالي القصيد ...
اشتقت للقلب الخلي ..
وش هم .. لو تعتب علىّ ..
جيتك انا فـ ليلة ألم .. قلبي على كفي ...
همست لي روح ياغريب الشوق مايكفي ...
سلم ابارد السلام ...
وهذا ترى كل الكلام ...
اللي بقى بينك وبيني ...
تخيّــــل ...

[♥} آمـل الـ عٍ ـشآق ♪]

قَصِيْدَةْ :سَيِّدِيْ ..قِمْ ..

سيدي قم...
ما خبرت اللي يحب يشتهي النوم
سيدي قم...
لاتنام وفي السماء باقي نجوم
يا جريح البارحه
كيف طبت اليوم
سيدي .. يا سيدي قم

سيدي ...الليل للعاشق نهار
قم معي ... نجمع نجوم الظلام
سيدي ... لو عرفت الانتظار
ما غفا لك جفن .. .يا عذب الكلام
اه لو تدري الهوى والسهر مقسوم
يا جريح البارحه
كيف طبت اليوم
سيدي .. يا سيدي قم

سيدي ... لا تناظرني بغضب
ودي تحس مثلي بالغرام
سيدي ... ما وراك الاالتعب
ليت عيني مثل عينك تنام
اه لو تدري الهوى والسهر مقسوم
ويا جريح البارحة كيف طبت اليوم
سيدي .... يا سيدي قم

::

قَصِيْدَةْ :سِيْفْ الغَضَبْ



أفداك أنا كلي ..
عودي غصن يابس ..
لا تحرقيني اليوم ..
حر .. وسموم .. وصيف ..
إنتي إجلسي فــ ظلي .. ولا جا الشتاء يمدي
لا تجرديني اليوم .. خليني في غمدي ..
سيف الغضب ماضي خلي الكلام يموت ..
ووقت الغضب ماضي .. لا ترجعيه .. بصوت ..
وش كثر أنا راضي حبيبتي عندي ..
قولي لي يا بعدي .. يومين ماشفتك ..
يومين مالي عيون ..
محروقه أجفاني بشموع إحساسي
كانت دموعي فوق وجهي وانفاسي ..
وظلي على كتفك .. وراسي على زندي ..
أفداك أنا والله لاتسمعي رعدي
ولا يزعجك برقي ..
انا لو شكيت أحلم ..
ما به زمن نندم .. ومابه عمر للخوف ..
إنتي احفظيني فم .. ولا تحفظيني حروف ..
ولو غرقت فــ يم ..
لا تعشقي بعدي ..

[♥} آمـل الـ عٍ ـشآق ♪]

.. قَصِيْدَةْ ..: السَنَـآبِلْ ..

من يهني السنابل .. في ليالي عرسها
كل شعب الجزيرة .. اللي تعب في غرسها
يا جزيرتنا بناتك ..
ما تناسوا وصاتك ..
كافحوا .. واتخرجوا .. وتحت ظلك انتجوا
آه كل يومٍ .. في حايتك يا جزيرتنا أمل ..

البيارق خضر .. وفصولك ربيع
راية التوحيد .. يا عز الجميع
يا جزيرتنا بناتك
ما تناسوا وصاتك
كافحوا .. واتخرجوا وتحت ظلك انتجوا
آه كل يومٍ في حايتك يا جزيرتنا أمل ..


.. قَصِيْدَةْ ..: ظَمَا الشَمْسْ ..


الله يعلم إني حاولت .. حاولت
أسند على كفي السما .. وأناظر الشمس
أشرب عن عيونك ظما
أشرب ظما الشمس
وقلتي عسى ... جفنك عسى مايحترق
حاولت ماأغمض عيوني
حاولت أنا .. ما نفترق
..آه لو تدرين لوتدرين
لاعوّد العاشق حزين
يمشي على جفن وجبين
عزاه يالقلب الشجاع
ضاع الأمل .. وما لك عذر

من لمست عيوني الشعاع
زندي أنثنى .. ورمحي أنكسر
إن لمسني حزنك الطاغي
بغطي وجهي الوجل بيدي
وجرحيني .. جرحي .. جرحي
ثم ابعدي
ريحي الصمت بكلام
آه .. لو كلمة ملام

إرجعي تحت الظلام .. عوَّدي
في سنا القلب اللي توه يحترق
غمضت أنا عيوني
غمضت أنا عيوني
ياإنت بنفترق
والله يعلم .. إني حاولت

[♥} آمـل الـ عٍ ـشآق ♪]

.. قَصِيْدَةْ ..: السِيْفْ

من يطعن السيف ابـ حشاه .. ويجرح السيف ..
من يضرب السيف ابدماه .. ويقطع السيف ..
السيف .. المعدن البارد ..
نصل الشتا الحاد ..
له تحت جلدي .. طريق ٍ ضيق ٍ بارد ..
وله صرختين اجداد ..
حبيبتي .. يا نبتة الدم ..
السيف .. إما قتلتي اعناد ..
والا قتلتي هم ..
ومضة شعاع ٍ خاطفه .. السيف ..
الصمت قبل العاصفه .. الألم .. لا فارق اللحم .. العظم ..
كم .. لحظة ٍ .. يا انتي إنطحنتي خايفة ..
من موعدك .. قبل الوعد ..
ورديتها .. قلت ارجعي ..
وكم صرخة ٍ .. ياللي ان جرحتي .. توجعي ..
ولو انجرحتي توجعي ..
اطلقتها بعد العد .. وشقت ضلوع العاطفة ..
من يطعن السيف ابحشاه حبيبتي
ومن يضرب السيف ابدماه .. ويقطع السيف ..
وقفت وضلوعي ( الصفاه )
اغطي عيون الأمل ..
ابغترة الحزن .. واركعه ..
كان الجفا .. سيف ٍ يسيل ..
في لحظة قصاص ..
وكانت عيوني تودعه ..
تشتاق .. للموت .. الخلاص ..
يا نبتة الدم .. السيف ..
مره قتلني عناد .. ومره قتلني هم ..


.. قَصِيْدَةْ ..: شُعَـآعْ


شعاع ٍ .. يدخل الغرفة ..
بعد العصر ..
يزحف فوق سجادة ..
ويطلع فوق هالكرسي
ويمكن يلمس وسادة ..
ولحظة ما لمحته خاف
تراجع .. طاح من الكرسي ..
وركض قبل النهار يمسي ..
ورجع للشمس كالعادة ..
يذكرني شعاع العصر ..
عيونك .. تدخل ضلوعي
في غفلة من عيون الناس ..
وتمد اهدابها احساس ..
وتاخذ قلبي من قلبي ..
تضيق بصدري الانفاس ..
ولما ينتبه واحد من الجلاس ..
بسرعة تركض النظرة ..
على السجاد والكرسي ..
احس ان النهار يمسي ..
وتغيب الشمس كالعادة ..

[♥} آمـل الـ عٍ ـشآق ♪]

.. قَصِيْدَةْ ..: صُوتِكْ يِنَـآدِيْنِيْ ..

تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...

[♥} آمـل الـ عٍ ـشآق ♪]

حبيبتـي لا مـن غديتـي لـي سـراج اتبعـه
وكني غديت من الضما اركض ويطردني السراب

لا تبخلين اليا شربتك مـا شربتـك مـن سعـه
دامي من جروح الهموم الموجعه كلـي صـواب

اليـوم مرتنـي السوانـي والفصـول الاربعـه
اليـوم مريـت الموانـي والمبانـي والسحـاب

اليوم ما كني لقيت مـر صوتـك مـا اسمعـه
اليوم ما كنـي فقدتـك مـن سؤاليـن وجـواب

يا بنت في خدك وهج سيل الشمـوس الساطعـه
احرق بداخـل داخلـي انسـان ماهـو للتـراب

واللي خلـق ظلمـا الليالـي بالعيـون الهاجعـه
اني من الحرمـان اتسـاءل وحرمانـي جـواب

يـوم الـوداع اتخيلـي مالـي حبيـب اوادعـه
محروم انا و تخيلي محروم حتـى مـن العـذاب

يا بنت لـي قصـه تطـول بكلمتيـن موجعـه
هي باختصار اني انا اركض ويطردني السراب