هتتعلمى ايه الفترة الجاية

[نبضة انيقة]

لو انتى معتادة على السؤال ده يبقى هايل... كملى
لو ده سؤال غريب بالنسبة لك يبقى ادّى نفسك فرصة تتعرفى على فكرة جديدة.. يمكن تلاقيها مفيدة... و مش بس كده, دى يمكن تغيّر حياتك
احنا صحيح كأمهات أكيد خلصنا تعليمنا من زمان
لكن عملية التعلّم لا تتوقف ابدا
دى سنة الحياة
حتى المواقف اليومية بنتعلم منها
و اكيد مهما كان معانا شهادات و عندنا ثقافة و معلومات و خبرات... برضو ناقصنا بعض المعارف
عشان كده انا باقترح دلوقتى فكرة اننا دايما نستمر فى التعلّم
نقرأ و نبحث و نكتشف و نعرف....
صحيح ممكن نقرأ كتب و مقالات و روايات... و دى حاجة عظيمة, لكن اللى اقصده نوع منظم من المعرفة
انك تختارى مجال محدد و تقرأى فيه او تدرسيه لفترة
طبعا ده هيفيدك لأن المعرفة فى حد ذاتها مفيدة بكل أنواعها... و كمان لأن فيه سيدات كتير بيحسوا بنقص فى ثقتهم بنفسهم بسبب إحساسهم بأنهم مش متمكنين ثقافيا و معرفيا
ازاى .. دى اسهل حاجة
دلوقتى فيه منصات اونلاين بتقدم كورسات متعددة, منها بمقابل و منها مجانى
و فيه مراكز كتير بتقدم دورات
و فيه معاهد خاصة
و فيه فكرة الاعتماد على النفس تماما, يعنى تقررى عدد من الكتب هتقرأيهم فى مجال معيّن
يعنى نقدر نقول ان ده تعلّم ذاتى... بس لا انصح بيه إلا للى عارف بالظبط هيقرأ ايه و بأى تدرج... يعنى لازم يبقى فاهم شوية فى المجال ده عشان يقدر يتعلم ذاتيا
يعنى ممكن تحددى مجال عايزة تعرفى فيه اكتر, و تحددى الفترة الزمنية اللى هتخصصيها للموضوع ده, و تشوفى ايه الطرق المتاحة للتعلّم
طيب نيجى للمجالات بقى
مااااااااا أكثرها
مش هاقدر ابدا احصرها
هاقول بعضها و يا ريت تشاركونى بأفكاركم
1- أغلب السيدات الحزينات التعيسات اللى على طول متضايقين... عندهم مشاكل زوجية. دى حقيقة لمستها بعد احتكاكى بعدد كبير من الأمهات. و لأن فعلا جيلنا ملىء بالمشاكل و الحياة مليانة مصاعب و نسبة الخلافات الزوجية مريعة و نسب الطلاق زادت... يبقى لازم نبحث عن حل. و الحمد لله الحل بقى موجود: الاستشارات الزوجية
و فعلا سمعت عن قصص كتير نجحت و الحمد لله
و بالنسبة للى مشاكلها عادية مش فظيعة, يبقى ممكن تكتفى بدورات او قراءات فى مجال التواصل بين الزوجين, و برضو الحمد لله بتعمل فرق و الأمور بتتحسن
2- مجال تربية الاطفال: مش عارفة اقول ايه عن أهميته.. بس يكفى انى اتكلم عن الاطفال اللى بتجيلهم عقد نفسية و اضطرابات فى شخصيتهم بسبب التربية الخاطئة. قررى انك تتعلمى و ابدأى, و حطى لنفسك خطة زمنية و تابعى التغيير, و ان شاء الله هترتاحى و الأمور هتتحسن
3- مجال التنمية البشرية: و ده واسع جداااا و مليىء بمجالات فرعية, وبالنسبة لبعض الناس بيبقى فعلا مفيد و بيعمل فرق فى حياتهم
4- مجال الدراسات الدينية: و ده أيضا ملىء بأنواع متعددة, من تدبر و تفسير القرآن, للتجويد, لعلم الحديث, للفقه, للعقيدة, للسيرة,... و غيرهم
5- مجال الهوايات: كلنا كان لنا هوايات يوما ما و نسيناها و أهملناها بسبب انشغالنا... ممكن نرجع نكتشف هواياتنا من جديد, او حتى نكتشف هوايات جديدة, ليه لأ؟
6- مجال الثقافة العامة: و ده كمان واسع جدا, و ممكن تختاريه حسب ميولك, أو حسب المجال اللى حاسة ان فيه نقص فى معلوماتك فيه. مثلا التاريخ, العلوم الانسانية, العلوم التجريبية, السياسة, الفن, الأدب, .....
و هكذا.....
و لو حد عنده افكار لمجالات تانية يا ريت يشاركنا بيها








أعجبني

[ينبعاوي]

اشكرك على النقل الجميل