رسالة لكل ام

[نبضة انيقة]

برغم تقل الموقف ده علي قلبي و أعصابي إلا إني هحكيه لأول مره في حياتي
من حوالي سنه جتلي أم بتشتكي من إبنها عنده 5 سنين إنه عنيد جدا مبيسمعش الكلام و عنيف و مهما عملت معاه مبيجبش نتيجة
و كان سؤالي : حضرتك بتضربيه و عصبية معاه دايما ؟
و الرد : أيوه طبعا مبعرفش أمسك نفسي من اللي بيعمله و علي فكره هو بقي مبيهموش أي حاجة و بيقعد يقولي إضربيني عادي مبحسش إن زعيقي و ضربي فارق ولا مأثر فيه .
قابلت الطفل 3 مرات و كان الظاهر فعلا طفل جامد مبيستجبش لأي حاجة كنت بجتهد أنه ميحسش إني بضغط عليه بس كان سلوكه صعب جدا و كنت بحاول أحسسه أنه طبيعي و أنا متقبلاه و بمدحه
بعدها بفتره لاقيت الأم بتكلمني و تقولي أنه عايز يقابلني اتقابلنا و سلمت عليه و مامته بعدت عننا و بدأ الحوار :
الطفل : هو أنا وحش و مقرف ؟
أنا : لأ طبعا ليه بتقول كده .
الطفل : محدش بيقولي إني حلو .
أنا : إنت عارف إني لما سألت ماما أنت فيك إيه حلو قالتلي كلام كتير جميل .
الطفل : ماما مش بتحبني
أنا : عرفت منين ؟
الطفل : علي طول بتزعقلي و بقولها يا ماما متزعقيش مش بتسمعلي و بتحب تضربني ! أول ما بتيجي تضربني و أعييط بتضربني زيادة و بفضل أقولها خلاص يا ماما كتير و ببقي خايف.
الغريب جدا أنه قال كل ده و هو هادي و مش بيعيط و بعدين سألته :
عايز تقول إيه كمان ؟
بدأت دموعه تنزل بقوه و إنهيار و في تنهيده البكا قالي : أنا بحب مامتي ..
لسه جايه أرد عليه لقيت فجأة ملامحه فيها خضة و حاطت إيده علي بنطلونه و بيقولي متبصيش عليا و صوته بيترعش غمضت عيني و حسيت بمشيته تابعت بعيني انه وصل لمامته و مشيت .
و في الخلفية سامعه صوت مامته "العالي " و هي بتقوله :إيه اللي مغرق بنطلونك كده حرم عليك يا شيخ .....
ده اللي خلاني أروح أكتب البوست ده و أنا في قمه الإنفعال يمكن كنت بحاول أنتصرله هو و غيره أطفال كتييييييييييييييييييييير
علي مدار أكتر من 8 سنين شوفت دموعهم و شخصيتهم اللي إتهزت و كل حاجة وحشة حصلت في سلوكهم علشان بيتربوا وسط الشخط و الضرب
و لسه الأهالي مقتنعه أنها عارفة هي بتعمل إيه و تعليقات كتير جت علي البوست أنه قاسي علي الأم اللي مستحملتش كلمتين هي بتسمع إبنها أضعافهم قسوة .
النهاردة هجنب المشاعر و أتكلم عن العصبية و الضرب من جانب علمي بحت لعلها المحاولة الأخيرة لإقناع الناس أصحاب جملة "ما إحنا إتربينا و كنا بناخد علق جامده و طلعنا دكاتره و ناجحين !"
*كلام علمي يعني أبحاث علي كم هائل من الأطفال اللي اتربت في ظروف هادية و بين اللي اتربوا في عنف لفظي و جسدي لحد ما توصلوا لنتايج واضحة جدا بأضرار العنف .
*أي حد هيقولي الضرب مسموح بيه في الإسلام يقرأ شروطه كويس هيلاقي إن ملهاش أدني علاقة باللي بنعمله و يقرأ الإسلام بيقول إيه في معاملة الطفل في كل حاجة
و يقرأ الرسول عليه الصلاة و السلام كان بيتعامل إزاي مع الأطفال و يشوف هو بيعمل كل ده ولا خد دي بس .
اخر دراسة اتعملت علي العنف ضد الأطفال وصلت إن 93% من أطفال مصر بيتعرضوا للضرب و العصبية الدائمة !
فلك أن تتخيل إحنا هنطلع للمجتمع جيل شكله إيه ؟
*لما بضرب إبني أو أصرخ بيحصله ضغط نفسي و ده بيؤدي إلي :
1-جزء من المخ اسمه "Hippocampus" مسئول عن التعلم و التذكر حجمه بيتقلص .
2-جزء من المخ اسمه "corpus callosum" مسئولة عن الإتصال بين شقي المخ و عن العاطفة حجمها بيتقلص .
3-"المخيخ" المسئول عن تنسيق حركة الطفل مع تنفيذه للحاجة اللي عايز يعملها بيتقلص .
4-قشره الفص الجبهي في المخ المسئولة عن "السلوك" بيحصل دمور فيها .
5-جزء من المخ أسمه "Amygdola" مسئول عن الإحساس بالتهديد و إسترجاع الذكريات الأليمه بينشط جدا .
6- الكورتيزول المسئول عن طاقة الطفل بيقل .
7-الكهرباء في المخ بتقل .
*لما بيحصل كل ده للطفل منتظر منه يبقي عامل إزاي ؟
1-عنيد مبيستجبش لحد .
2-حساس علي اتفه الأشياء.
3-معندوش ثقه في نفسه .
4-مش بيعرف ياخد حقه أو بياخده بالعنف .
5-معندوش قدرة علي العطاء لغيره عايز كل حاجة ليه بس.
6-ردود فعله عنيفه .
7-بيكدب و يعمل أي حاجة تبعد عنه الإتهام .
8-ممكن يسرق كتعويض علشان يحس أن ليه شخصية حتي لو خد ورقة في جيبه .
9-مبيعرفش يكون أو يحتفظ بصداقات .
10-علي طول مش عاجبه حاجة و بينتقض.
11-ضعيف دراسيا .
12-بينسي و تركيزه ضعيف ميعرفش يعمل اللي يتطلب منه .
13-معندوش تمييز بالخطر الحقيقي لأنه اتعود أن ردود فعلك عامة قوية .
14- أنتباهه لإي مثيرات بيقل يعني ردود فعله بتبقي متأخره زي أني أقعد انده عليه و ولا كأنه سامع و علي طول أحس أن كلامي مبيتفهمش و أني بكلم نفسي .
15-تأخر الكلام و التهته .
16-تبول لا إرادي .
17-مص أصابع ,قرقضه أظافر,جز الأسنان ,لمس أعضائه التناسليه ....
18-فرط الحركة و قله التركيز .
19-كوابيس.
20- للأسف بتحكمي علي طفلك أن كل الناس تعامله بالشده لأنك جايبه معاه أقصي مرحلة .
21-في المراهقة بيبقي قاسي جدا و عاق مع أهله .
فعلا لو قعدت أكتب لبكرة اللي بيحصل لسلوك الطفل من العصبية و الضرب مش هخلص .
طب ايه الحل ؟
*لو أنت بتعملي كده علشان تعلميهم حاجة معينه شايفه إن سلوكهم بيتحسن و بيبطلوا فعلا الحاجة دي ولا الدنيا بتبوظ ؟
*إسألي نفسك و أنا بضرب إبني ببقي هادية من جواية و واخداها وسيلة للتربية ولا ببقي علي أخري و بفش غلي و خلاص ؟
*عندك 26 غلط تربوي قلناهم بالتفصيل كل واحد فيهم لوحده كافي أنه يأثر بالسلب علي سلوك الطفل قبل ما تلوميه شوفي أنت بتعملي كام من ال 26 و أشتغلي عليهم .
*لو عندك ضغوط خارجية و واصلة لمرحلة أنك عموما مش عارفة تتحكمي في عصبيتك مهم أوي تروحي لطبيب نفسي و تلاقي حل لعصبيتك ده هيبقي أحسن ليكي و لكل اللي حواليكي .
*إفتكري دايما إن وقف العصبية و الضرب أولا لأن طول ما هما موجودين كل نظريات التربية مش هتجيب نتيجة قوية .
*متهتميش بكلام الناس و متخليش ضغطهم عليكي يطلع في إبنك إنت هتتحاسبي عليه و هما لأ .
*أي مشكلة مع إبنك اقري عنها أو استشيري متخصص و متسأليش أي حد تاني .
*أقفي مع نفسك و صارحيها بطلي تبرري ليها .
*مترضيش بوضع غلط و تقولي كل الأمهات كده لو سمحتي لنفسك تضربي مره ايدك هتاخد عالضرب حتي لو ضربة خفيفة مع الوقت مش هتأثر و هتحتاجي تعلي عليها .
*أنوي و صدقي و ثقي في نفسك بأكدلك عن خبرة سنين و الله العظيم أمهات كتير جدا كانت بتضرب أطفالها بقسوة شديدة و بطلت تماما و حتي الزعيق بقي كل فين و فين .
*لما تكوني مستعده صارحي أطفالك بإن ده كان غلط منك و إنك هتحاولي تصلحيه .
*اقعدي إسبوع قبل أي رد فعل إدي لنفسك دقيقة بالظبط تفكري في أحسن تصرف .
*متقسيش علي نفسك و إكتبي كل خطوة بعمليها لصالح ولادك حتي لو صغيره و أقريها .
*مجرد ما تشوفي ثمار التغيير علي ولادك و إنهم بيتحسنوا في كل حاجة هتحسي أد إيه إنت بطلة و مستمتعه و فخورة باللي عملتيه أوعي تحرمي نفسك من الإحساس ده مهما كلفك الأمر لأنك تستحقيه ^_^
💕💟💕💟💕💟💕💟💕

[قمر الشرقية]

يعطيك الف عافية
لآعدمنآ جديدكالقآدم
تحياتى