«« امهات تكره ابنائها !! »»

هل فيه ام ممكن تكره اولادها ؟

على قد ما السؤال صادم ومؤلم على قد ما الواقع مليء بنماذج امومه وابوه مشوهه للأسف..

حنفكر في الموضوع ده سوا من ناحية نفسية جدا.. قد تكون نماذج متطرفه ولكن فيه منها درجات منتشره جدا

فى ناس قالت
ان فى امهات (وآباء) فعلا بيكرهوا اولادهم وده له صور واشكال كتير ..ليه ده بيحصل و ازاي نتعامل معاه ؟
خلينا نشوف امثله

(المثال الاول )
ولد ولا بنت !

الام اللى كانت نفسها فى ولد وبتحلم طول حياتها بالولد حتى من قبل ما تتجوز وبعدين خلفت بنات وقد تكون بتكره البنات ومش قادرة تتقبلهم ولا تحبهم
وده غالبا بيكون بسبب صدمة قديمة او برمجة متوارثة عن المجتمع زي ما شافت في اسرتها وهي صغيره
زى انها شايفة ان تربية البنات ماساه
وان البنت بتجيب العار
او انها مقتنعة بالمعتقدات القديمة الموروثه عن افضلية انجاب الذكور.. وقد تك'ن هي شخصيا تعرضت لتنييز لمونها انثى
فهى خلاص عايشة حياتها مع بناتها بفكرة انا مش بحبهم ومش هعرف احبهم وان ربنا ارسلهم لها كنوع من البلاء او العقاب

(المثال الثاني)
الام المطلقة
او اللى عندها مشاكل مع جوزها
او اللي حصلها حمل وهي مش مستعده نفسيا او بضغط من الزوج او الاهل
ودي حالة منتشرة جدا

*الام دى اللى هى كل ما تشوف اولادها تفتكر جوزها فبتسقط كل المشاعر السلبية على اولادها لانها مش عارفة تاخد حقها من حد تاني او انها بتحس انها كانت مجبرة او عاجزة
وبالتالى هى كرهت اولادها ..
زي ما قلت من قبل .. مش مبرر لكنه سبب واقعي وبيحصل
بمعنى انه مش كل ام بتتحط فيه الموقف ده بتوصل للكراهية لكن النموذج ده موجود

(المثال الثالث)
ولادها بيفكروها بحد بتكرهه !

الام اللى بتكره اولادها علشان بيفكروها بنفسها
الام اللي بتكون كارهة نفسها وشايفة بنتها طالعة شبهها فى كل حاجة وهى مش عارفة تغير حاجة فى نفسها وشايفة ان مأساتها بتتكرر تانى فى بنتها
فكأن المأساة اصبحت مضاعفة ليها
وبالتالى فهى كرهت بنتها
** الام اللي شايفة ان ولادها نسخة من ابوهم
بتصدر كل ردود افعالها ضد اولادها بدلا من الزوج
و مابتقدرش تفصل بينه وبينهم في المشاعر
**اولادها شبه اهل جوزها.. شبه مامتها.. شبه اي انسان هب مش متقبلاه.. في هدفيه عقلها الرابط بيفضل موجود لحد ما يتعالج

(المثال الرابع)
الباحثة عن المثالية!

فى امهات بيبقى عندها نماذج و اطار فى دماغها شايفة ان ده النموذج الصح عايزة اولادها كده
اى حاجة غير كده لا..
هى مش بس مش راضية او فى حاجة هى عايزة تعدلها ....لا....
هى ناقمة تماما على حياتها وعلى حياه وشكل اولادها
ومهما عملوا عمرهم ما هيوصلوا للشكل اللى هى عايزاه ..وبالتالى هى كرهتهم وكرهت عيشتهم لانهم طول الوقت بيفكروها لا وعيا بعجز وفشل في تحقيق الصوره اللي نفسها فيها دي

(المثال الخامس)
اولادها عائق !

الام اللي شايفه ان اولادها عائق في حياتها امام تحقيق ذاتها .. تخلت عن حلم سفر او دراسة او ترقية ... او حتى حرموها من الراحة او نمط الحياة اللي كانت فيه قبل الزواج او الانجاب
بتعيش على فكرة انها ضحت .. و احتمال تعيش تذلهم بالتضحية العظيمة دي .. وهي في الحقيقة بتتغافل عن انه اصلا كان اختيارها وبكامل ارادتها مش تضحية.. مهما اقنعت نفسها بغير كده

(المثال السادس)
يابختهم !

الام اللي شايفة ان اولادها كان ليهم حظ ونصيب في الحياة افضل مما حصلت هي عليه .. اب افضل .. او حياة ايسر .. او تعليم افضل ..
الام دي بتكون حاسه انها اتظلمت وانها لو كانت اخدت فرصة اولادها كانت حتكون انسانه افضل .. وطول الوقت تحسسهم انهم مش مقدرين النعمة.. ولو فكروا يعترضوا بس.. تنزل بقائمة العطايا اللي تقريبا خساره فيهم..

اكيد فيه نماذج اكتر واكيد فيه درجات مش كلها مشاعر متطرفة ..

لكن الحقيقة انه اه فيه امهات "حرفيا بتكره اولادها"
______________________________________

الجزء الهام بقى بعد كل الكلام ده ..

لو انا كأم اكتشفت جوايا اي مشاعر من دي ولو بنسبه بسييييطه .. لازم اعمل الاتي:

1- انتبه لها كويس .. احاول اعرف مصدرها .. فهم المشكلة نص الحل

2- اسأل نفسي .. هل اللي قدامي ده يستحق المشاعر السلبية دي ؟؟ هل انا كده راضية عن نفسي كأم ؟؟

3- لو الاجابة لاء .. ببساطة افصلي .. قبل كل كلمة او حرف تقوليه لابنك او بنتك خدي نفسك واسألي نفسك للحظة .. التصرف ده صح ؟ مفيد ليهم ؟ حيعلمهم حاجه او يغير السلبيات اللي مش عاجباكي فيهم ؟؟
خليها عادة عندك .. قبل ما تنتقدي قيمي انتقادك ده بانك تسالي نفسك الاسئلة دي

4- لو بعد كل المحاولات والتدريبات دي فضلت المشكلة عندك لازم تلجأي لمختص .. لسبب بسيط .. انها مش حياتك لوحدك .. فيه حياة ناس تانية متأثرة بالمشكلة دي .. وبعد سنين حتكون حياة "اسر اولادك " كمان ..

__________________________
اخيرا....
لكل حد عنده الام دي او بيتعامل معاها من قريب او من بعيد ..
الام دي عندها اسبابها اللي وصلتها لكده .. واكيد مش فرحانه بكده .. بس هي ممكن مش واعيه كفاية لمشكلتها .. واكيد لو كانت تعرف تحلها كانت حلتها
ارفقوا بيها .. وتقبلوها على ما هي عليه .. انصحوها برفق تلجأ للمساعده ..على الاقل عشان ماتزيدش الفجوة بينكم .. يمكن يوم من الايام تقبل منك النصيحة او المساعده او تغير من نفسها بنفسها .. التقبل حل سحري جربوه :)