كيف نعود اطفالنا علي الايجابية

**بروق الفجر** · 21-09-2016, 11:32 AM

كيف أعود طفلي علي الإيجابية ؟
التفكير الإيجابي بيبدأ من كلامك انت كأم \ كأب…ازاي؟!
من صغره بنسمع كتير كلام سلبي زى ( يووووه اسكت يا زنان بقى …هو كده مش بيبطل عياط …ده وحش اوى فى اكله ) متخيلين ان الطفل مش حيستوعب كلامنا لكنه للاسف يعي بطريقته الخاصة ، ومن هنا يبدأ يكون صورة سلبية عن نفسه …
ويكبر شوية عشان يستكشف البيئة اللى حواليه ، فيجرى هنا وهناك ويحط الحاجات في بقه ، واول كلمة يسمعها ( كخ وبعديييييين .. يعععع .. شيل ده من بقك ) وهنا يبدأ الطفل فى الكف عن الاستكشاف ….
عشان تنمى التفكير الأيجابي فى اول سنتين .. خلى طفلك يسمع كلام إيجابي كتير ، ودايما اديله بديل ، يعنى لو حاط حاجة فى بقه او جرى يلمس حاجة ، شيله بهدوء فى حضنك وادياه حاجة بدالها تشغل ايده وفكره ….
كيف أعود طفلي علي الإيجابية ؟
مع تقدم سن الطفل زود عنده استقلاليته بانه يلبس لوحده ، ولو قال مش حعرف قله انا واثق انك حتقدر …حاول ..الموضوع محتاج تدريب … يعنى درب نفسك انت كأم او أب على توجيه كلام إيجابي ، بدل ( خلي بالك …مش حتعرف ) ولو حسينا ان الموقف اكبر من قدراته ، نقوله ( تحب اساعدك ) …
وبكده تدريجيا الطفل بيتعود على الايجابية فى حياته ولما يجى يحكيلك مشكله هو طالب حل لها ركز معاه على الحلول مش تفاصيل المشكلة ….علمه ان فى خطوات علمية للتغلب على المشاكل واحكيله قصص واضرب له امثله ….
بإيدك تخلى طفلك يكون أيجابي او سلبي ….بمجرد بس كلامك معاه والكف عن نقده او احراجة ادام الناس …علمه يعنى ايه مبادر يصحح الغلط اول ما يشوفه ، بدل ما يقعد يتكلم عنه ، مثلا لو وقع حاجة فى الأرض بدل ما افضل الومه وانقده ( ياڜيخ ارحمنى ليه وقعتها ..انت دايما كده ..) وقائمة الكلام السلبي بلغه عالطول حتتصرف ازاى شيل او امسح الارض …وهكذا ..
اختاروا موضوع اسبوعيا واتناقشوا فيه …او مشكلة بتواجه الاسره وازاى نحلها ، اوعى تستهين بفكر طفلك …او صغر سنه ..
.الطفل كنز يا تدفنه يا تظهره …