موأساة لكل مبتلى

**ينبعاوي 1** · 16-11-2015, 03:11 AM

مأجور ياللي تبتلى بالمصايب
ما انتَ بأوّل من تجي له مصيبه

هذي هي الدنيا (كظل السحايب)
(يومين فادت) مير تقفي بمشيبه

ما فادت الدنيا كثير الحبايب
و لا ضحكت الدنيا لنّاسٍ مهيبه

و ما طال عُمر اللي على المجد ذايب
و ما عاش من هو ما يحل الصعيبه

انظر و اقرا عن ذيك العجايب
ازمان مرّت بس باقي عجيبه

يا صاحبي لو مات أقصى القرايب
و دموع عينك فوق خدّك سكيبه

و من العطايب جات قلبك عطايب
وفي صدرك المفجوع نار و لهيبه

لا تحسبنَّ الدمع بيعيد غايب
و لا تحسبنَّ الحِب رجّع حبيبه

كلًّ يحذّف بين صايب و خايب
و كلٍّ بهالدنيا بياخذ نصيبه

يا صاحبي في الموت مافي طلايب
و إلا فهدنـا كان يا طيب طيبه

يا صاحبي يمكن كهل عود شايب
تلقاه عايش و المنايـا تسيبه

و يمكن صغيّر دايم الدوم طايب
يجيه يومٍ هالمنايا تصيبه

كود الخرب يا صاحبي و الخرايب
ايّام ... ما تلقى عليها خريبه

ما فيه واحد طول عمره صعايب
و ما فيه واحد ما يذوق الصعيبه

يا صاحبي جمّع لنفسك زهايب
لنَّ المنايا مـن الخلايق قريبه

هذي هي الدنيا كظلَّ السحايب
يومين فادت بس تقفي بمصيبه

شعر:فهد السبيعي