((الجزء العاشر))

(ابي املكك)


اكثرنا اذا مو كلنا حبينا... بعضنا كان حب مراهقه واكتشف بعدين انها مجرد مشاعر اعجاب... وبعضنا كان حبه حقيقي بمقدار حقيقه وجودنا وطبعا بعضنا فقد حبيبه في اول او نص او حتى نهايه الطريق لكن هل هالفئه حاربت علشان حبها وصرخت بكل لغه ممكنه(( انت لي وابي املكك......لانك اذا ما كنت تدري ....انت لي انا وبس ))

ويبقى السؤال حتى بعد هالصرخه بتقدر تستعيد اللي فقدته او لا؟؟؟؟؟؟؟؟؟
وش حال اللي مو عارف اساسا يترجم مشاعره ؟


سعـــــــــــــــاد


اليوم على الفطور كان الوضع كئيب ما حبيته امي وابوي كانو يتبادلون نظرات ما فهمت معناها وطلال كان واضح على وجهه انه تعبان مره ومو طايق ياكل وشكله جلس معنا على الفطور غصب ...انتقلت بنظري لوداد واضح انها مهمومه وتاكل وبالها مو معنا وكل شوي ترفع راسها تناظر طلال شكلهم بينهم شي ...اما عليا كانت تناظر بصحنها وتقلب
الاكل اللي فيه بالملعقه ...اما فيصل فهو الوحيد اللي كان ياكل ولا هامه شي ...كنت ناويه اسأل وش فيكم بس صوت عليا قطع الصمت

رفعت راسها عن صحنها ونادت :- يبه
ابتسم لها ابوي :- امري يبه

ناظرته وناظرت من بعده امي :- تسلم لي يبه ...يبه انا ابي اروح البحرين

الكل التفت لعليا واستنينا نسمع رد ابوي

تسند ابوي على كرسيه :-احم ... ليش يبه عسى ما شر ؟؟؟(ودار عيونه بينا ) احد قايلك شي ؟ او سامعه شي ؟

ردت عليا باندفاع:- ابد بس زواج جاسم ولد خالي عقب كم يوم وانا ابي احضر عرسه ومن بعد اذنك ابي اقعد اسبوع هناك

زفر ابوي زفرت ارتياح وقال :- من عيوني ...واليوم بحجز لك على اقرب رحله للبحرين

قام ابوي من على السفره ناظر طلال وقال :- يلا يا طلال والا منت بناوي تداوم اليوم ؟

وقف طلال :- بس بنزل شويه اوراق عندي فوق وبتلاقيني وصلت الشركه قبلك

ناظره ابوي باهتمام :- عن السرعه (والتفت لنا ) هاااا تامرون على شي قبل ما اروح

طبعا اول شخص رد هو امي :- سلامتك يا بو طلال

طلع ابوي وكلها دقيقتين وطلع عقبه طلال وانا توجهت لعليا :- انت من جدك بتجلسين في البحرين اسبوع ؟!!!

ابتسمت عليا :- كنت حابه اقعد اكثر بس استحيت اطلب من ابوي اكثر من اسبوع

تخصرت وقلت :- لا والله .. استحيتي هااا ...وانااقول هالاسبوع باستغلك وكل يوم نطلع لمكان شكل بحجه نعرفك على الرياض

ابتسمت عليا و وداد ولا هي هنا انتبهت لها :- دودو وش فيك ؟ من صباح الله خير وانتي مبوزه ومو على بعضك ؟

وداد ناظرتني وكانها ما فهمت وش قلت لها لكنها ردت :- ما فيني شي بس انتي يتهيأ لك ( وناظرت امي تكلمها ) يمه ابي اروح بيت عمي بو خالد

وقفت امي ونادت الشغاله ترفع الصحون من على الطاوله :- ستي نظفي المكان عدل و بلغي الطباخ اننا اليوم بنتعشى بره ( وقبل ما اسأل وين بنروح ردت على وداد ) اجلي روحتك اللحين ترى كلنا المغرب بنروح عازمتنا خالتك ام خالد على العشى

راحت امي وتركتنا و وداد راحت غرفتها وبقيت انا وعليا قلت لها بهمس :- تظنين ليش هالعزومه ؟ ليكون على شرفك ؟

فتحت عليا فمها :- هاااا لا ما اظن لو السالفه جذي كان خالتي قالت لنا
...اكيد عزومه عاديه (سكتت شكلها تفكر في كلامي بعدها قالت ) عن اذنك بروح اشوف وداد شوي

تركوني لحالي كنت ناويه اسلي نفسي باتصال لنجود بس قلت اكيد هي نايمه اللحين احسن شي اخذ لي قصه اتسلى فيها


علــــــــيــــــــاء


صعدت فوق وصلت لغرفة وداد دقيت الباب ما ردت اخذت نفس ودقيت الباب مره ثانيه فتحت الباب شكلها كانت بتقول شي بس اول ما شافتني قالت :- دخلي عليا (واشرت على سريرها ) تعالي هنا ما لي خلق اجلس على الكنب
قعدت على السرير وسندت ظهرها على مخدتها وتغطت بلحافها وسحبت
الدبدوب حظنته ... قعدت قبالها على السرير ميلت راسي على جنب

:- وداد ... ما بسألش وش فيش لان اللي فيش في طلال ...وداد طلال وش فيه ؟

تنهدت وداد ونزلت راسها تلعب في الدبدوب:- طلال اذا ما انحلت مشكلته بيموت وهو حي

ما ادري ليش قلبي قام يدق بقوه وخوف على طلال :- ليش طمنيني وش السالفه ؟

قالت لي وداد سالفه الخطاب وكلام عمي وطبعا قبلها وضحت لي شكثر طلال و العنود يحبون بعض .... حسيت بالعجز وما عرفت شلون ارد او اواسي وداد لكني قلت
:- الحمد لله ان عمي بيرد هالرجال وهذي بما انها محيره ما في اسهل منها
فتحت وداد عيونها وقالت :- طيب وش استفدنا ما دام عمي مو قابل طلال بعد

عضيت شفتي وانا افكر بعدين قلت :- تدرين هذي حلها عند ابوي
المفروض طلال يكلم ابوي ويشوف ليش هم معارضين
(حطيت يديني على خدي وتأففت ) اساسا انا ما اصدق ان طلال ممكن يسوي شي يزعل احد منه ....اكيد طلال فهم السالفه غلط

ظمت وداد الدبدوب بقوه وقالت :- وانا من رايك علشان كذا كنت ناويه ازور العنود واعرف منها السالفه ...بس امي الله يهديها ما رضت اروح

رديت بتساؤل :- زين ليش ما اتصلتي عليها ؟
لوت وداد بوزها :- حاولت بس جوالها مغلق

وتركت وداد وهي تحاول تدق على العنود تذكرت هاجر قلت اتصل اتطمن عليها من اللي صار لها امس وابشرها اني بكره او بعده بكون عندهم في البحرين لكني دقت لين قطع الخط ومحد يرد
غريبه عمرها هاجر ما تأخرت في الرد على موبايلها حاولت مره ثانيه لمن عطاني اشاره ان الهاتف مغلق... هالشي وترني وخلاني احاتيها
توني بدق على بيتهم لقيت موبايلي يرن في يدي
طالعت لقيت المتصل لهيب الروح (وش يبي هذا اللحين داق ) استجمعت قوتي ورديت :- سلام عليكم

رد بجفاء :- وعليكم السلام ..كل هذا الخط مشغول من كنتي تكلمين ؟

ضايقني السؤال بس ما لي مزاج اخذ واعطي معاه فرديت :-كنت ادق على رفيقتي

رد باستهزاء :- واكيد خبرتيها عن سفرك للبحرين ...وانا متى كنتي ناويه تخبريني ؟ عقب ما تروحين ولا مو على بالك

قهرني اسلوبه فرديت :- ما في داعي تعرف ما دام ابوي يعرف وسمح لي

رد باستهزاء :- يعني انا رايي مو مهم طيب بنشوف من بيحجز لك ..وشلون بتسافرين من غير اذن زوجك ...اوه نسيت اساسا شلون بتسافرين وجوازك معي ..مع السلامه

سكر الخط قبل ما ارد عليه اوف هذا وش فيه كل شي يعسره وانا الغبيه
استفزيته ادري عنه واقف لي على الحبه والمصيبه ان جوازي عنده
يا ربي ما لي غير ادق عليه

حاولت ادق عليه لكن ابد حاقرني ولا رد وصلت عدد المكالمات عشر مكالمات اخرتها انقهرت سكرت الموبايل توني بحذفه بس تذكرت هاجر يمكن تشوف المكالمات وترد اخذت التلفون ونزلت تحت
ما لقيت احد في الصاله طليت بره لقيت فيصل يلعب كره وسعاد عند المسبح تقرأ تذكرت طلال والعنود فكرت اخليها تدق على نجود وتعرف منها السالفه بس تراجعت ما حبيت ان الكل يعرف وساعتها تكبر المشكله
مليت ما عندي شي اسويه فقررت اشغل نفسي في المطبخ دخلت المطبخ لقيت خالتي ام طلال هناك تكلم الشغاله وتوصيها تقول للطباخ على كم طبق حلاوه فقلت
:-ما عليه خالتي الحلو انا بسويه
ردت خالتي :- بس انا بوصي على اكثر من صنف ناخذه معنا بيت عمك
:- مو مشكله انتي قولي لي وش تبين واللي ما اعرفه الطباخ يسويه

عددت ثلاثه اصناف كلها اعرفها وكلها تبي منها طبقين ابتسمت ورديت
:- خلاص خالتي ما في داعي انا بسويهم كلهم (كانت بتعترض ) ترى انا مو متعوده اقعد من غير شغله تملي وقتي

اعترضت :- بس يعليا ما يصير تتعبين حالك والطباخ موجود

ابتسمت :- تعبكم راحه اللحين بابتدي بالاطباق البارده وعقب الغدا بشتغل على الفرن

رفعت خالتي كتوفها علامة استسلام :- على راحتك (ابتسمت ) وبيضي وجهنا ترى جدة خالد وخالاته هناك

طلعت وتركتني متوتره حيل خايفه من هالناس الجدد اللي بشوفهم والكريه اني اكيد بكون محل تقييم وما ادري وش الانطباع اللي باتركه عندهم بيحبوني او لا


((وداد))


نزلت العصر لقيت امي وعليا وسعاد جالسين في الصاله وامي تتقهوى وجلست بين امي وسعاد
:- متى ان شاء الله بنروح بيت عمي ؟
ردت سعاد :- عقب صلاة المغرب علشان امي تساعد خالتي (وغمزت ) وناخذ معنا الحلا اللي مسويته عليا

التفت لعليا بدهشه :- انتي اللي سويتي الحلا ؟؟طيب والطباخ وينه

هالمره امي تكلمت :-اختك لزمت ...ويلا ما بقى شي على الاذان علشان تصلن وتجهزن حالكن ترى ام خالد عازمه عمتك هذا غير امها وخواتها

سعاد من سمعت ان اهل خالتي معزومين نطت واقفه ومسكت عليا من ايدها تقول :- وللحين جالسه يلا ما في وقت ..لازم تكونين برفكت

ضحكت امي على جنان سعاد وقالت لي :- وانتي بعد روحي مع خواتك

ابتسمت لامي وسألتها :- مع من بنروح ؟

:- مع السواق ..لان ابوك بيطلع من المسجد على بيت عمك

سألتها مره ثانيه :- وطلال متى بيروح ؟

قامت والصينيه بيدها :- ما ادري ... ليش عاد تسألين ؟

وقفت اخذت من ايدها الصينيه :-ابدا بس اذا بيتأخر ..نروح انا وعليا معاه (وكملت اعلل) ما يصير العروس تروح كذا من وقت

ما اهتمت امي لكنها ردت :- اجل دقي عليه وبلغيه

فعلا اتصلت عليه ولزمت عليه يودينا الى ان وافق صراحه ما كنت حابه انه يروح بيت عمي في هاليوم لحاله وخذت سالفه عليا حجه علشان ما يردني

عقب صلاة المغرب امي وسعاد سبقونا على بيت عمي جهزت حالي ورحت لعليا اخبرها اننا بنروح مع طلال .... مرنا طلال عقب صلاة العشا ركبنا السياره كان الصمت سيد الموقف ما عرفت وش ممكن اقول له كلها عشر دقايق ووصلنا بيت عمي وقف السياره مشينا ورى طلال وشفت تركي ماسك جواله يكلم احد بس اول ما شافنا سكر الجوال وتقدم صوبنا والابتسامه شاقه وجهه

:- هلا طلال واخيرا جيت ؟ (وقبل مايرد طلال التفت لنا وكمل ) حيا الله بنات عمي كيف حالكم ؟

طبعا مالي نفس ارد عليه فردت عليا :- بخير عساك بخير

و قبل ما نتحرك قال لطلال :- تعال ابيك تراني من عقب الصلاه وانا استناك

بس طلال رد بلا مبالاه :- مو اول خلنا ندخل المجلس نشوف وش بيصير وبعدين انا تحت امرك

لكن تركي مسك طلال من يده وقال :- لا ما يصلح تدخل المجلس ترى كل شي يخرب ... تعال ابيك في مشوار ضروري

لكن طلال ما همه تركي ورد وعيونه مليانه الم :- مشوارك مو اهم من اني احضر خطبة بنت عمي

تركي سحب نفس قوي وقال :- أي خطبه يا ابن الحلال !!ترى من اللحين اقول لك ان العريس بيردونه ... ومشوارنا اهم من هالخطبه
وخالد موصيني ان محد يروح معي هالمشوار غيرك

وقبل ما يعترض طلال سحبه تركي لناحيه السيارات وساعتها صرنا ما نسمع وش اللي يدور بينهم سحبت عليا من يدها وقلت
:- يلا ندخل قبل ما يطلع احد من الرجال وحنا واقفات هنا

دخلنا وكانت الصاله فاضيه الظاهر ان الكل متجمع في مجلس النساء
تركنا عباياتنا في غرفة العبايات واول ما وصلنا مجلس النساء سمعنا صوت ساره
:- اجل وين وداد وعليا ؟ والله ناويات ما يجون ؟
ردت امي :- تلاقينهم على الباب
ما لحقت امي تكمل جملتها الا ودخلت وانا ساحبه في يدي عليا كان الكل موجود ما عدا سعاد ونجود قامت العنود ومسكت عليا من يدها وقدمتها لجدتها
:- هذي جدتي (وقالت لام مالك ) وهذي عليا بنت عمي

تقدمت عليا من ام مالك سلمت عليها وباست راسها وايدها ابتسمت ام مالك ورفعت راس عليا :- الله يرضى عليك يا بنتي (والتفتت لبنتها ام خالد ) يا زين ما اخترتوا جمال واخلاق

طبعا عليا احمرت وزين انها قدرت تسلم على بقية الجماعه وعقب ما سلمت على ام نواف وام حياة خوات ام خالد راحت بتجلس جنبنا لكن ام مالك قالت وهي تأشر جنبها :- تعالي جلسي هنا جنبي

طبعا عليا ما قدرت تعترض وراحت جلست جنبها

اما انا قعدت بين العنود وساره اللي همست :- يعني اللحين لحقت جدتك تعرف اخلاق عليا
ناظرتها بمعنى وش هالكلام لكن العنود ردت :- طول عمرها جدتي تعرف الشخص من اول نظره ولا مره خابت نظرتها

لوت ساره فمها وقالت :- بنشوف

طبعا قضينا الوقت في السوالف اما الجده والخالات ما خلوا عليا فصفصوها من الاسئله خاصه انهم ما يعرفون عنها الا انها بنت يوسف بن سلمان وهي كانت تجاوب بكل لباقه وبكل صبر خاصه على اسئله الجده اللي في بعض الاحيان كانت خاصه لكن من وجه نظرها انها تبي تتطمن على عزيزها ومدللها اول حفيد لها خالد

اما انا كنت في علم ثاني احاتي طلال ومستغربه من العنود اللي ولا على بالها ...معقوله لانها تدري انهم بيردون هالخاطب .. وما تدري ان ابوها حتى طلال ما يبيه
وعلى سيره طلال يا ترى لوين اخذه تركي وليش ابعده ؟!!!!!