طـــــــــــلال


دخات غرفتي وطفيت اللمبات ما ابي احد يدخل علي ويكلمني شغلت التكييف ورميت روحي على السرير حطيت ايديني ورى راسي وتوسدتهم حاولت الاقي حل للمشكله وش اسوي انزل لابوي واكلمه
طيب وش اقول له مو هم يدرون اساسا شلون عمي يتصرف بهالطريقه
ولا حد يقول لي انه مجرد كلام ما يصير اظل طول عمري متعلق بأمل وفي لحظه وحده يسلبونه مني ضغطت على راسي بقوه اااااااااااااااه يا راسي
راسي يعورني مره وكله بسبب الطرق المقفله لكن ما في الا.....

قطع حبل افكاري صوت دق على الباب هذي اكيد علياء جتني مرتين تبي تعرف وش فيني بس انا كنت ارد عليها انها مشكله في الشغل واكيد عقب اللي قلته في المجلس ما صدقتني
فقلت :- عليا ..صدقيني ما فيني غير عوار راس
ردت علي زين على الاقل كل لك لقمه علشان تشرب لك حبتين بنادول وترتاح
عرفت انها ما بتستسلم فتحت النور وبعدها فتحت الباب
:- تفضلي
ابتسمت وحطت الصينيه على الطاوله اللي قبال التلفزيون ومسكتني من يدي جلستني وقالت
:- ممكن تتفضل وتاكل
اكلت سندويشه بالغصب وبلعت رواها حبتين باندول وكل هالوقت وعلياء تناظرني نزلت كاسه الماي وقلت
:-اللحين تطمنتي ..يلا بنام

ناظرتني وعلى وجهها علامات القلق:- لا ما تطمنت من جد طلال وش فيك وش قال لك خالد

اغتصبت ابتسامه وقلت :- مشكله في الشغل اظطرت خالد يطلع من البيت حتى من دون ما يسلم عليك واللي ذبحني ان هالمشكله بطيح على راسي خاصه ان حلها بياخذ وقت وخالد عنده مشاريع ثانيه يتابعها
( اشرت على نفسي ) يعني ما في غير الفقير لله يحلها ويتحمل مسؤليتها

طالعتني علياء وكأنها مو مصدقتني :- زين اذا هو سوى المشكله ليش انت تحلها

ابتسمت :- لانها مو ظمن تخصصه انتي تعرفين خالد شغلته تعاملات اداريه عقود صفقات تعرفين مدير اداري والمشكله ماليه يعني من تخصص(اشرت على نفسي ) مدير الحسابات

ابتسمت :- تدري اول مره اعرف انك محاسب ؟

ضحكت احاول اغطي على همي :- مو حنا وحده اداريه متكامله
ابوي وعمي اداره اعمال وخالد شؤون قانونيه وانا ماليه وتركي هندسه

استغربت :- توك تقول خالد اداره اعمال

ابتسمت :- لا تستغربين ترى الخبره خلت خالد يتولى بعض الامور الاداريه مع الشوؤن القانونيه ترى زوجك يتدخل في كل شي تلاقينه
يلم بكم شغله في المحاسبه والهندسه ( ابتسمت لها ) والله يستر بكره يتدخل لك في امور البيت والمطبخ

اشتعل وجه علياء وصار احمر من الحيا استأذنت وطلعت وكلها كم دقيقه ودقت وداد الباب دخلتها
:- امري وش تبين تراني تعبان وابي انام

ابتسمت وداد :- اذا عليا اللي صار لها كم يوم معانا عرفت انك متضايق حيل وان السالفه اكبر من مسائل شغل تبيني انا اصدق
انه ما بك شي

طبعا ممكن اكذب على الكل واداري عنهم بس لان وداد تعرف كل السالفه والاهم تعرف حقيقه شعوري قلت لها كل السالفه

جلست على الكنبه وجلست قبالي على الطاوله وقالت
:- علياء تقول دخلت عليك المجلس ولقتك في حال غير الحال
وبعدها رقيت لغرفتك من غير ما تكلم احد وش صاير يا طلال

رفعت راسي اناظرها :- وما قالت لك اني قلت ان خالد ذبحني
فتحت وداد عيونها على وسعهن واخذت نفس قوي :-
ليش وش سوى خالد والسالفه تخص عليا ولا ...

ما كملت خلت جملتها معلقه وكملت بدالها :- السالفه تخص العنود
ضغطت بيدي على راسي وكملت :-عمي اتصل على خالد وخبره
ان في رجال جاه يخطب بنته وان عمي اتفق معاه يمره بكره عقب صلاة العشا و........
قاطعتني وداد :- انت متأكد انه يخطب العنود مو يمكن يخطب نجود

رفعت راسي لها :- يا ريت لنجود .. بس المشكله انه خطب العنود

رجعت وداد تقول وهي مو مصدقه :- انت متأكد انه خطب العنود

مسحت وجهي بيدي :- بنفسي سمعت عمي يقول لخالد ( اليوم جوني خطاب لاختك وادري اني محيرها بس الرجال طلبني وانا اعطيته
وما اقدر ارجع في كلمتي) .....حتى خالد ما وع لنفسه الا وهو يقول لابوه( ولمن حيرتها مو كنت عاطي كلمه كيف رجعت فيها ) لكن اللي كسرني وخلى خالد طلع على وجهه لمن قاله عمي ( المشكله اللحين اني ما ابي اعطيها للاثنين علشان كذا ابيك تجيني ضروري )

حطيت يدي في شعري وشديته بقوه :- وما في غيرها محيره لي عرفتي يا وداد ان الخاطب جا للعنود

ردت وداد وتبي تتعلق بأوهام :- بس عمي قال ما يبي الرجال يعني اكيد بيلاقي له حل وبيرده ولو انه يعرف انه يوم طلبه انه يبي العنود كان ما تمم له

ابتسمت بسخريه :- بس عمي قال بعد انه ما بيعطي بنته حتى للي محيرنها يعني ما بيعطيني اياها وش اسوي يا وداد وش الحل

رفعت كتوفها علامه ما ادري وقالت :- ما ادري ..ما ادري ..طيب طيب ليه ما تروح بكره وتحجر عليها و........

ما كملت لاني قلت لها :-فكرت اسوي كذا ...بس ولو مو انا اللي اخذ العنود غصب عن اهلها انا ابيها برضاها ورضى اهلها واولهم عمي

ابتسمت وداد :- بس العنود تبيك مثل ما تبيها

مسحت على راس وداد:- لكنها ما تبي واحد ابوها ما يرضاه لها ولا انا ارضى لها تاخذ واحد ابوها ما يبيه

ابتسمت لوداد:- عرفتي اللحين ليش احس اني مذبوح ليش احس ان الدنيا خانقتني وظاغطه بكل ثقلها على صدري (دمعت عين وداد مسحت دمعتها وكملت ) بس انا زين والدليل اني ما زلت اتنفس ما زلت حي
(وكملت في نفسي....وان كان الموت ارحم....وواصلت اطمنها ) وبكره ان شاء الله نفتك من الخاطب الجديد (تنهدت ) وبعدها انا بشوف وش اللي يخلي عمي وابوي زعلانين علي

غلطت وجبت سيرت ابوي وداد ما فاتها هالشي لانها قالت :- وابوي ؟!!!!!!!! ليش وش فيه ابوي

اصطنعت ابتسامه وكانت باهته وقلت :- الظاهر اني مسوي غلطه كبيره مره وانا ماني حاس لاني اول ما قلت لابوي عن اتصال عمي قال لي
(اعرف الرجال طلب عمك وعمك تمم له قبل يعرف طلبه لكنه ان شاء الله بيشوف له حل وللثاني بعد ) ساعتها سألته من الثاني ليكون ما قدرت اقول انا فقلت اللي محيرنها ورد علي يا وداد ويا ريته ما رد لانه قال ( ايه تراه بعد ما يستاهلها ) انا ما استاهلها يا وداد انا طيب يمكن اكون ما استاهلها بس مو يحرموني منها

حسيت اني بانهار علشان كذا طلبت من وداد تتركني لحالي


ســـــــــــــاره


فتحت الدرج وطلعت الجوال الثاني فتحته لقيت فيه مسجات كثيره ما اهتميت اقراها وعلى طول رحت لقائمة الاسماء وصلت لاسم خالد اللي سجلت رقم تلفونه عندي بعد ما خليته يتصل على امي في المزرعه
المهم فكرت اضغط على زر الاتصال واكلمه بس تراجعت ...اكيد بيعرف صوتي وساعتها بتنقلب الامور ضدي ... طيب خليني ارسل له مسج
يا ربي وش ارسل له فتحت المسجات اللي واصلتني عل وعسى الاقي مسج مناسب لكن كلها كانت .....وينك؟ وحشنا الصوت والله ؟ واخرها من عصام يطلب يشوفني ........ افففففففف والله انك فاضي
شفت كم مسج عجبوني وتوني بأرسل واحد منهم الى خالد الا الجوال يرن في يدي والمتصل عصام افففففففف اللحين وش يفكني منه رفعت السماعه قال لي :- هلا بعمري هلا بقلبي ....والله اني مشتاق لك مووووووووووووت صارلي زمان ما سمعت صوتك

مديت رجليني وفكيت شعري العب فيه :- ابدا ... بس كنت مع العايله في المزرعه ولا قدرت اخذ الجوال معي (تنهدت ) انت بعد وحشتني

رد بهيام :- دامك مشتاقه لي تعالي نطفي نار الشوق ونقعد مع بعض
فتحت عيني وعظيت على شفايفي :- لا ما اقدر الوقت ما يسمح غير ان امي حاطه بالها علي هاليومين

تنهد ورد بحزن :- يعني ما اقدر اشوفك ؟ ترضينها لي اتعذب ؟ وانتي تدرين انك الهوا اللي اتنفسه

ابتسمت ورديت بدلال :- اكيد ما ارضاها لك ..واتعذب لعذابك بس
سالفه اننا نشوف بعض خليها لوقتها ...(وحطيت يدي على خدي )
علشان تشتاق لي اكثر

وظل عصام على هالحال ربع ساعه يقنعني اننا نتقابل الى ان وعدته
:- طيب انا اللحين ما اقدر بس اوعدك اول ما تبدأ الدراسه ادبر لي يوم ونلتقي

صرخ عصام صرخة انتصار :- تسلمين يا عمري اللحين بس ردت لي روحي ... ااااه يا من يصبرني لين تبدأ الدراسه

ضحكت بنعومه :- علشاني اصبر ...ولا نا ما استاهل

عصام بلهفه :- الا تستاهلين ونص بعد .... يلا قبل ما اتركك تأمرين على شي

ضحكت :- سلامتك حبيبي

سكرت التلفون ورحت على المسج اللي كان ((تعاتبني نفسي عند ذكراك الا اوفيك حقك ..واخبرك بان قلبي لا ينبض الا بحروف اسمك ))

لا غيرت رايي المسج قديم وما يصلح غير ان خالد بيطنشه ولا بيعطيه وجه الاحسن استنى الى ان تبدأ الدراسه وساعتها ابتدأ الشغل
اول مسجات من فاعلة خير تبعد عليا من طريقي وبعدها نقلب الى المواساة والعواطف الى ان اكسب قلبه
عجبتني الفكره ايوه كذا هذي الطريقه المناسبه لشخص مثل خالد

رضيت عن نفسي وشغلت الكاسيت ورقصت لين تعبت


الى هنا وانتهى البارت
انتظر ردودكم وتعليقاتكم وتوقعاتكم

ارق واعذب التحايا