خذنا من الواقع دروس وتجاريب

[عبدالله اللحيم]

خذنا من الواقع دروس وتجاريب
فيها ملذاتٍ وفيها معاناه
خبرة ثلاث عقود حلٍ وتغريب
بإدراك وادرايةْ حكيمين وادهاه
المعرفه عدٍ عذي المشاريب
كل المراجل هيم وعلاجها ماه
مساعي العرّاف جمرٍ تحت طيب
وطيبٍ بليا عرف مايِسلم اذاه
والمرجله وهبه ومنها مكاسيب
وتبين في الرجال بالفعل والجاه
واخير كسب الرجل حرش العراقيب
قعس الظهور ام الرقاب المعراه
وامراض خلق الله لها طب وتطيب
الا الردى ماحدٍ قدر يكشف دواه
والمجتهد بالصبر نال المطاليب
ولا كل مجهد يدرك اللي تمناه
كلمة نعم تدرا عن الكِبر والعيب
كلمة نعم ساداتها لجلها رعاه
وحنا على هقوات عكف الاشانيب
دربٍ ماهوب يعزنا مامشيناه
من طاب طبنا فوق ماطاب بالطيب
واللي يتردا بالردا ما جزيناه
الذيب لو انه قريّب محاضيب
ماكب سوره للحصيني يتعشاه
لنا مواجيب وعلينا مواجيب
واللي يمد كراب كفه يبي املاه
نِتعب على كلمة نعم شمخ النيب
ونجاهد الطالات بايات منحاه
لو لاح بالحانا من ايامنا الشيب
مانشكي ظروف الزمن غير لله
مايفرحون مدورين العذاريب
تباعة الغرّات والطيب تنساه
عن مثلهم. نلقى ضيوف ومعازيب
الذيب مايسرح ويضوي مع الشاه
عمر الفتى شمسٍ لها وقت و تغيب
شارة سهوم الغيب واسبابها ارماه

عبدالله اللحيم

[زمن النسيان]

دائما متميز في الإنتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك
لكـ خالص إحترامى

[نسمات الجنة]

الله ع الكلمات الراقية يسلمو

[زينة]

يعطيك العافيه على الطرح القيم
الله لايحرمنا من عطائك المميز
احترامي وتقديري