ياكبر شرهات الايام

[عبدالله اللحيم]

ياوجودي يوم سجيت عن دمعي وسال
في محلٍ عند راعيه غالي و امحشوم

انتبهت وقمت مابغى مناقيد الرجال
واعتذرت امن المعزّب وانا كنت امعزوم

ناويٍ لي خايعٍ ما وطوه اهل الحلال
اذكره دايم واروده ليا صرت امهموم

فيه انا والنار والنجر مع صفر الدلال
وموتري وفراش نومي ولو مافيّ نوم

وبتداء ليل المعنى خلا واليل طال
والقمر ليلة عشر غاب واكهف بالنجوم

وابحرت سفن القوافي مع بحور الخيال
وانتقيت امن الدرر ما قضيت ابه اللزوم

ياكبر شرهات الايام ياسود الليال
تستبيح بظلمتك نور يومي كل يوم

الحرام اللي نعرفه حرام اصبح حلال
والقبايل فرّطت في العوايد والسلوم

والحرار اللي مواكيرها روس الجبال
الزمن حول بها وارتفع في الوكر بوم

والجمال اللي تداحم على شيل الثقال
بركت. بحمولها خاطي بعيرٍ يقوم

والنفوس كبارها صغر قدام. الريال
والذمم في سوقها عرضةٍ للي يسوم

اختلاف الوقت ماعاد لي فيه احتمال
باح صبري ماتذريت عن لفح السموم

اتوجد واتنهت واجر امن الطوال
واتضايق واتثاقل من الحزن الهدوم

هيه ياللي دونك الموت واحراج السوال
راحت ايامي كذيا وانا منك محروم

عبدالله اللحيم

[نقاء الروح]

صح لسانك ويسلم الايادى
الله يعطيك آلف عآفية
ننتظر جديدك آلقآدم

[زينة]

يعطيك العافيه على الطرح القيم
الله لايحرمنا من عطائك المميز
احترامي وتقديري