السلام عليكم وربحمة الله وبركاته
من خبره سنين في الأردن وماجيت منها غير قبل ايام قليلة حبيت انصح اخواني اللي يبيون يسافرون او لهم اقرباء ودهم يسافروا:
الشعب سواء اردني او فلسطيني معظمه محترم ومؤدب وعندهم أمانة قل ماتجدها في الأخرين مع ان حالتهم الماديه صعبة جدا وهذا للأغلبية لكن الصورة اللي كونتها عنهم هي ماسبق ذكره .
هناك فئة تتصيد السياح وخصوصا الخليجيين لذلك نصائحي كالتالي :
1-اللي يحترم نفسه يجبر الأخرين على إحترامه .
2- البعد عن الأماكن المشبوه .
3- الإحتراس من اصحاب التكاسي بالنسبة للعداد فالعداد محكوم عندهم تسعيرة السائح مثل ولد البلد يفتح العداد على خمس وعشرين قرش فالحذر الحذر اذا ركبت التاكسي انتبه للعداد لأن بعضهم مايصفر العداد لامنه شافك خليجي وخلك ذيب وذا رفض او تحجج باي حجة قله وقف وانزل من التاكسي او طلع الجوال وقول له راح اتصل على الشرطة ويحكمون بيني وبينك ترى الأمن عندهم ماعنده لعب يبهذل السواق ويحجز سيارته ورخصته وغرامات وهم يخافون من هاالشيء جدا .
لاتركب التكاسي (اللي مكتوب عليها مميز) غالية في العداد.
4- اي واحد يبي يسافر للأردن لابد يعرف عملتهم كم تساوي بالريال السعودي .
الدينار = 5.3 ريال
من القصص والشواهد :
*
فيه واحد طالب يدرس بالجامعة الأردنية ( خليجي ) يركب لمدة اسبوعين مع تاكسيين المهم ركب في يوم من الأيام مع تاكسي سواقه يخاف الله وبعد ماخلص مشواره كان العداد مكتوب فيه 2.70 يعني دينارين وسبعين قرش .
طلع الطالب ثلاثين دينار واعطاها السائق وقال له حسابك سبع وعشرون دينار هات الباقي السائق استغرب من المبلغ قال له الأجرة دينارين وسبعين قرش رد عليه الطالب انا لي عشرة ايام اركب مع تاكسيين تقريبا بهذه الأجرة ونصو\حوني مااركب مع غيرهم لأنهم راح ينصبوا عليه المهم سائق التاكسي اقنع الطالب بعدة طرق نادى له عامل بلدية وقال له إقرا العداد 2.7 دينارين وسبعين قرش ونادى شرطي مرور وقال نفس الرقم .
* فيه واحد خليجي راح للأردن لأول مره مع العائلة بسيارته وهو يبغى منطقة اسمها الجبيهه ساقته الأقدار الى منطقة وسط البلد نزل يتلفلت ماهي المنطقة اللي وصفوها له شافه سائق تكسي وسأله قال أبي الجبيهه قال انا أوديك إمشي وراي ومشى وراه لين المكان المقصود ويوم وصل قال الخليجي كم حقك قال سبعين دينار يعني اكثر من 350 ريال والمشوار بالتكسي مايكلف اربعه دنانير يعني عشرين ريال وشوي .

* اذا رحت لأي موول لوحدك بدون عائلة ترى في بنات يتربصون بالخليجي ماتدري إلا هي حاطه يدها في يدك ومدخلتك المحلات وتشتري وانت تدفع .
الحل لاتستحي صرخ فيها وارفع صوتك تقوم تذلف عنك .
( هذي النقطة بالذات مشهوره عندهم في المولات السيف وي وغيرها عشان يقولون على الخليجي خروف )

* بعضهم يجيك يقول فيه ناس غلابى ومن هاالقصص جوابك توكل على الله .

* بعضهم يجيك وهو لابس دشداشه ويتكلم خليجي ويكون معه طفل او حرمه في تاكسي او ماشيء ومن القصص اللي انتم عارفينها جوابك له رح لسفارة بلدك تحل موضوعك .

* بعضهم يجيك بقصة مشروع كفالة يتيم او تبرع ترى لهم قصص متنوعه لايضحكون عليك .
اخيرا انصح اخواني بتقوى الله والبعد عن الزنا وتذكر قوله تعالى :
وَالَّذِينَ لا يَدْعُونَ مَعَ اللَّهِ إِلَهًا آخَرَ وَلا يَقْتُلُونَ النَّفْسَ الَّتِي حَرَّمَ اللَّهُ إِلاَّ
بِالْحَقِّ وَلا يَزْنُونَ وَمَن يَفْعَلْ ذَلِكَ يَلْقَ أَثَامًا. يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا ....


هذا مايحضرني وماكتبته الا ابتغاء وجه الله تعالى

منقول بتصرف