جاني واحد ..!! قال :أبسألك كم سؤال ..؟؟
جاني واحد قال : بسأل كم سؤال.؟؟؟
وقبل يسأل قلت : أنا ماني خبير !
قال: جاوبي بس , يابنت الحلال
وكل كلمه حِطَّيهَا .. في بيتٍ صغير
قال نبدأ :وشو تعريف المُحال..؟؟؟
قلت:
خَل الكلمه
ف الشطر الأخير ..!
القهر : إن شفت دمعات الرجال
والوطن :(إنسان).. مِتغيِّر كثير
والطفل : لعبه على شاطي الرمال
والأمل : إحساس في عين الضرير
الوفا :[قلبين].. يجمَعهُم حلال
والرَجُل : اللي على أهله يغير
والرجا : لا قلت للواطي تعال
والفشل : مدري ولكنه مرير
الشعر : في وقتنا .. بدر وطلال
وكان أوَّل : حيل يعجبني جرير ..!!!
والغلا : إحساس إلى حَد[الخيال]
والعِشِق : لا شفت مَعشُوقِك تطير
والجفا : إعكس مفاهيم /[الوصال]
والوَصِل : يعني تأكَّد فيك خير
والعقل : تِسْفَه أقاويل الجهال
والجهل : إن قلت عن نفسك كبير
والخطر : لا صار ما عندك مجال
والبلا : إن صرت معدوم الضمير
والعجب : لا صرت تسأل منهو قال
والتعب : إن كنت تِبْحَثْ عن مصير
الغنى : بالنفس ما هو راس مال
والفقر : من كان .. بأعماله فقير
يكفي يكفي .. أسئله إنهي الجدال
ويلا..علميني عَن السِّر الخطير
ما أبي تضرب لي في غيرك مثال
قول:عنِّك وإعتبر سِرِّك في بير
جات طعنه مِن جنوبك والشمال
يعني وضعِك بين مِن حُولك خطير
صاحبي وإن ضاقت بعينك ليال
لك فرشت القلب مفروش الحرير
في[ بلاد الحلم]..ممنوع العقال
والمصيبه الشعب ما أختار الأمير
وما ألومك .. كان شدِّيت الرحال
دام بيتك جرح / وفراشك حصير
هذا تعريفي إلى كلمة:مُحَال
شي ودِّك فيه..ولا يمكن يصير..!!
المفضلات