لي يبينا عيت النفس تبغيه والي نبيه عيا البخت لا يجيبه

[♥} آمـل الـ عٍ ـشآق ♪]

دخلت علي عمتي نورا..وكان شكلهاا غريب..يعني ما احس انهاا كانت حاقده علي..رغم كل المصايب اللي صارت...اول ماجلست جنب السرير...
قلت لها: وين وافي؟؟؟..كيف حال عمي؟؟"
عمتي نورا بهدوء: وافي رجع السعودية..انت عارفه انه طلقك؟؟..صح؟؟"
قلت وانا احاول اتماسك رغم صعوبة الواقع: ايه...عاارفة...كيف حاله؟؟"
عمتي نورا بنعومة ودموعها تلمع: بخير...ماعليه وعمك...بعد بخير..ماعليه..."
ابتسمت براحه: الحمدالله.."
عمتي نورا وهي معهاا اغراض بكيس جلدي:هالاغراض لك يا ملكه...عشان اذا سافرت الرياض..بالفجر ..ان شاء الله.."
اخذت الكيس وشكرتهاا: كلك ذوق يا عمتي...عممي...."
وسكت مابي ابكي..ولااني قادره انطقهاا بلسااني...
عمتي نورا بخجل: آسفه يا ملكه...آسفه...عمك عصبي مرة..وصدقيني افضل لك انك تعيشين بعيد..."
قلت بتردد: تبرى مني يا عمتي.....عارفه وش كبر هالكلمه؟؟"
عمتي نورا وهي تمسح دمعه صغيرة نزلت من عيونهاا: معليش..سامحيه يا ملكه...الله يخليك..ساامحيه.."
هزيت راسي بتمرد: لااا يمكن اسامحه..كان بيذبحني..ماراح اسامحه لااا هو ولااا وافي....لأنهم ذبحووني..."
عمتي نورا بكت بصمت..ولاا قدرت تقول لي اي شيء...كان يألمهاا انها عارفه الواقع....واكيد حاسه اني بريئة...براءه كامله...مايشوبهاا اي شيء..
طلعت من عندي بعد دقايق...وضليت انا اطالع بالكيس اللي حطته بايدي...كان فيه بعض الاغراض حقت زواجي..طالعت بالأغراض وصرخت بقوة وبحسرة..وانا اضم الكيس بقوة لصدري...

،
،

[♥} آمـل الـ عٍ ـشآق ♪]

رجعت الرياض اخيرا بطيارة الفجر...وكنت لوحدي...في الطيارة كنت انتفض واشاهق بصمت وانا اشوف العالم من حولي..وكلهم مع اهاليهم واناا وحيده مالي احد..حتى زوجي تركني وراح بدون مايفكر فيني..
ماحد كلف نفسه يوصلني المطار...انا اللي رحت وخلصت اموري كلهاا...كنت احس بشعور غريب يرافق شعور الحزن اللي بقلبي..كنت احس بالوحده واخيرا الاعتماد على نفسي...
عرفت اني خلااص انا وحيده وماحد راح يفكر فيني فأنا اللي لاازم اضبط اموري...ماكان عندي استعداد اسكن في بيت اهلي من جديد....
قالت ساره وهي توصف للسواق بيت اهلي: متأكده انك بتنامين الليلة هناك..ملكه انا خايفه عليك.."
مارديت عليهاا...كنت افكر بوافي...وافي..هه...عمرك ماكنت وافي طول عمرك غادر وقاسي...وين الحنان اللي عيشتني فيه الايام اللي فاتت...وين كلمات الحب والحنان والوعود...
تركتني بأول مشكله صادفتنا....حتى بدون ماتتأكد اذا كنت انا مظلومه او لااء؟؟...
ساره وهي تتألم: ملكه...لااا تسوين بعمرك كذا...مصير وافي يرجع لك...وانت ترمينه.."
قلت واناا امسح دموعي: مابي اشوف وجهه ابد...عمري ماراح اسامحه يا ساره...ظلمووني..وهانوني...وذلو وني.."
ساره برقة: خلااص..انسيهم..وعيشي حياتك..والله يعينك.."
ماعلقت على كلاامها وانا اشوف انا وصلنا للبيتي...وقف السواق قبال الباب...وترددت شوي قبل ما اخذ اغراضي وانزل من السيارة...
نزلت معي ساره...ووقفت جنبي وانا واقفه اطالع الباب...لمسته بتردد وغمضت عيوني اللي بدت تحرقني... وقلت كأني اكلم ابوي: كنك يبه عارف اني راح ارجع من جديد لبيتك.."
وسلمت على الباب برقة...ودخلت المفتاح بتردد..كانت ايدي ترتجف بقوة...وتطيح المفاتيح وارجع اخذهاا...
انفتح الباب اخيرا...وحسيت بهواء يدخل قلبي ويقبضه ببرودة...وانا اشوف شكل الحوش اللي كله غبار...والزرع اللي مات...دخلت رجلي اليمين اول وبعدها اليسار...
دخلت وراي ساره...ودق جوالها بهاللحظة...طالعت فيهاا وهي ترد على امهاا: ايه يمه...لالا ماراح اطوول...ان شاء الله يمه.."
طالعتني ساره بخجل..وقالت وهي تهز كتوفها: امي ماتبيني اتأخر..."
رديت ببساطه وانا ارتعش: عادي عيوني..روحي..وتعالي لي بكره.."
ساره وهي تطالع بالنور اللي بدا يشع: ماتخافين؟؟..."
قلت وانا ابتسم: لااء...ليش اخاف؟؟..اهل البيت ماتوا ورحلوا...ماراح يكون احد معي..."
ساره اللي شكلها ارتاحت قالت وهي تغطي وجهها: خلاص اجل بكره بتكلم مع اخوي عن الكهرب حقت البيت والموية...وبشوف وش بيسوي؟؟؟"
قلت لها بتأكيد: مو مشكله...يله مع السلاامه.."
ووصلتها لحد الباب وقفلت الباب بعدها..وارتكيت عليه اطالع في بيتناا الكبير...
شفت الباب ينفتح..وتطلع منه امي...كان شكلهاا يهبل...وابتسمت لي وهي ترفع المغرفه حقت الأكل..وتقولي: يله تعالي ساعديني...وش تنتظرين؟؟؟"
وشفت اخواني يلعبون بالمراجيح اللي قبال الباب...وابوي قاعد يقص الزرع...ويقطف لي ورد وفل..
التفت اطالع بالحوش اللي فيه كورة مكانها ماتحركت...رحت للكورة ودموعي مليانه...وضميتهاا بقوة...تذكرت اخواني يوم كانوا يلعبون فيهاا مع ابوي...ويسددون هدف ورى الثاني....شلت الكورة معي...ورحت للبيت....وفتحت بابه بمفتاح ثاني...وقفت عند الباب مترددة لفترة طويله..وانا اسمع صوت الرياح يعصف بالمكان...واتهيأ اصوات اهلي...وهم يسولفون يا بعض...او اخواني وهم يتهاوشون...
صرخت بأعلى صوت وانا ارتعش: كاااااااااافي..."
وحطيت ايديني على اذني وماقدرت ادخل البيت رجعت قفلته من جديد وجلست على الدرج واناا اصيح بحرارة...اصيح كل شيء...ياااه يا الدموع صرتي جزء مني...صرتي ماتستغنين عني ولااا انا استغني عنك...صرتي لي مثل الهواء ماقدر اعيش بدونه...صرتي مثل الوافي غالية علي على طول حتى وانت قااسيه...صرتي مثل الدفاا في عز البرد والبرودة في عز الصيف...انت يا الدموع الصديقة اللي مو قادرة استغني عنك...انت اغلى من الغلاا نفسه...لأنك تريحيني كثير..كثيييييييير....

[♥} آمـل الـ عٍ ـشآق ♪]

في العصر





استغربت ان الباب يطق...ورحت بسرعه ابي اعرف مين يطق باب بيتنا الفاضي...
قلت وانا مرعوبة: مين؟؟؟..."
سمعت صوت صيته: اناا يا ملكه...صيته...افتحي لي الباب.."
قلت وانا ابكي: رووووحي عني...لااا تجين...ماابيك...وش تبون فيني؟؟؟...روووحواا"
صيته وهي متضايقه: ملكه الله يعافيك...افتحي الباب..ترى نفسيتي تراب وماافيني اتهااوش معك..."
فتحت الباب واول ماشف صيته ضميتهااا بقوة وانهرت ابكي بحظنهاا...وصيته بعد كانت تصيح وسكرت الباب وراها..
قالت وهي تمسح دموعهاا: وش صااار؟؟...اشرح لي..."
قلت وانا انتفض: صار اللي صار...وماعاد نقدر نرد شيء...تخيلي ان وافي طلقني.."
صيته وهي تصيح من جديد: علمني...وليته ماعلمني...وش صار يا ملكه...ريحني الله يخليك..."
وسكتت فجأة واخذت تطالع في الحوش....وطالعتني من جديد: لالالالا انت لاا يمكن تسكنين هناا....راح تموتين او تنجين يا ملكه..."
قلت بحرارة: لاااا هذا بيت اهلي..مالي غيرهم يا صيته.."
صيته بعصبية وهي تمسح دموعها: اهلك ماتوا..ومابقى منهم شيء...مو من صالحك تعيشين هناا..."
قلت وانا ارتجف من البرد: لااا تقولين كذاا.اهلي لسه حيين...بقلبي عايشين...والله اني سمعت اصواتهم.."
فتحت صيته فمهاا ورجعت سكرته من جديد...وقامت تهز راسهاا كانهاا مو مصدقة..
قلت لهاا: ليت عندي شيء اضيفك...بس توني ساكنة بالبيت..."
صيته وهي تمسك حلقهاا: مابي شيء..ابي اعرف وش حكايتك انت واخوي؟؟..كنتوا قمة السعااده..كل شيء كان بينكم خيالي...ليش يطلقك؟؟..لييييييييش؟؟"
قلت وانا اتذكر وافي: اخوك يعتقد اني خنته....اخوك..ضربني يا صيته....اخوك فضحني عند عمي..."
ماردت علي صيته...كانت تبكي بحرارة....وتحاول انهاا تستوعب او تتكلم لكن ماقدرت...
: مين علمك بمكااني؟؟"
صيته وهي تهز كتوفها: ساره خويتك..كانت خايفه عليك حيل..."
: يابعد عمري يا ساره...قلت لهاا راح اكون اوكي...لكن ماصدقت.."
صيته بعصبية: اي اوكيه؟؟...شوفي كيف شكلك؟؟..طالعي شلون الغبار مالي وجهك وشعرك...ملكه...امشي معي المزرعه..امشي معي...وافي موب فيه ولاا راح يدري..."
قلت وانا اصيح: ماقدر...ماقدر يا صيته...راح امووت من الحزن...وافي ماقدر اقربه ولاا اقرب اي شيء يمسه...صيته اناا لسه احب اخوك...اذا مات هالحب في قلبي راح اجي ازورك.."
صيته بقهر: تحبينه؟؟؟...وهو طقك وهانك وطلقك؟؟...اللي مثل اخوي حلاال فيه الموت...ما اصدق ان اخوي يسوي فيك كذاا...واناا اللي كنت الوم صالح على قسوته..."
: لااا تقطعين قلبييييييي...ترى اللي فيني كافيني.."
مسحت صيته دموعها والكحل اللي سال واختلط... وقالت وهي تطالع بالكيس اللي كان بايدي وبعبايتي اللي عند الباب: طيب...تبيني اساعدك بترتيب البيت؟؟..واجيب لك ملاابسك؟؟؟.."
قلت وانا مرتاحه لتغيير الموضوع: ما اقدر ادخل البيت...يبي لي كم يوم عشان تجيني الجرأة اني افتحه وامشي فيه...انت روحي هالحين...وانا ان احتجت شيء دقيت عليك..."
صيته بتردد: بسس!!..انت حتى ماعندك جوال.."
قلت كاذبة: راح اطلع جوال وادق عليك...بوسي لي بناتك... وعلميني عن اخبارك...اوكيه؟؟؟..."
صيته وهي تهز راسها باستسلاام: من عيوني..."

[♥} آمـل الـ عٍ ـشآق ♪]

مرت علي اول ليلة في البيت بصعوبة...وكنت راح انهبل من الخوف...كان شيء يخوف مرة...خصوصا ان البيت مظلم حيل حتى ايدي ما اقدر اشوفهاا...ومافيه ولاا شمعه تضوي علي....
لكن قدرت اني اخطي هالليلة مع قراءة المعوذات وايات الكرسي ...واقنعت نفسي ان اي شيء اشوفه هو مجرد حلم وتخيلاات واوهام وان الفجر قريب...
لكن مثل ماحنا عارفين ليل الشتا طووووووووووويل طويل...كنت استمد الامان من بعض الاصوات اللي اسمعهاا في البيوت الثانيه..وكنت ارتاح يوم اسمع صوت الأذان واتمنى يطول ولاا يخلص..
لكن ماكل مايتمنى المرء يدركه...كذا مرة اضطريت اترك باب البيت الرئيسي مفتوح واجلس جنبه بعبايتي....وكنت ادعي ان صيته ترجع او ساره..او اي احد يسوي فيني خير ويطل علي...
لكن ماحد فكر يمر علي...حتى ساره وانا متأكده ان اهلها منعوهاا من زيارتي...وصيته مو بأيدها المزرعه بعيدة مرة وماتقدر ترجع كل شوي..تمنيت اشوف مهاا...صراحه هي الوحيده اللي ارتاح لشوفتهاا مرة...واتمنى احط راسي على صدرهاا وابكي واشتكي لهاا من خالهاا وظلمه...خالها اللي الى الآن لو يرجع ارمي نفسي على صدره واعتذر له...رغم اني مو عارفه اعتذر له عن ايش؟؟..







بعد شهر...





ابتسمت بنعومة وانا اشوف الأطفال ناموا...كانت اشكالهم روعه وواضح عليهم السلم والامان..
مابغوا ينامون...خلوني اقرا لهم اربع قصص...بس الحمدالله بعد رابع قصه كانوا في سابع نومه...
غطيتهم زين...وبست جبينهم..وطلعت من الغرفه بعد ماقفلت الباب...ورحت لغرفة ثانيه عشان اتأكد اذا ناموا الكبار او لاااء..
لقيتهم قاعدين يسولفون..ابتسموا بوجهي اول ماطليت عليهم...
قلت: ماراح تروحون معنا بكره لفيفا؟؟"
ردت وحده فيهم: ودي اروح...بس لااء..عندي اختبار بعد يومين.."
والثانيه قالت بسرعه: اناا بروح معكم...متى بتروحون؟؟"
قلت وانا اطالع بالساعه: ان شاء الله 8 الصباح..راح يفتحونهاا لناا...ودي وحده تجي معي...اخاف يضيع واحد من هالاشقياء وبعدين اموت.."
ردت علي بسرعه: بعيد الشر عنك..لاا تجيبين طاري الموت الله يعافيك..."
هزيت راسي: ان شاء الله...عااد لاا اوصيكم لاا تسهرون..."
وقفلت اللمبات فوق روسهم وسمعت صراخهم بعد ماقفلت الباب...وضحكت غصبا علي..هالبنات غاليين عندي كثير..كنهم خواتي اللي امي وابوي مانجبوهم...
رحت لغرفتي..ولقيت ملكه الصغيرة نايمه على سريري..كان عمرهاا سنتين لقوهاا ضايعه وسألوا عنهاا كثير وسوينا اعلاانات...لكن محد جا وطالب فيهاا..
كنت متهاوشة مع المديرة ابي اسميهاا...بس هي عيت...وقررت انوا هي تسميهاا..وسمتهاا ملكه...على اسمي...يمكن لأني ماقصرت على هالملجأ بأي شيء..
خصوصا بعد مابعت الفله حقتنا...وحطيت نص فلوسهاا هناا..والنص الثاني تبرعت بمعظمه لجمعيات خيرية كثيرة...
بست خد ملكه بحنان وضميتهاا بقوة وتضايقت كثير..فتركتها مكانها وفتحت صندوق كنت مخبيته تحت السرير....وطلعت منه صورة مرسومه لوافي....
تلمست الصورة ونزلت مني دمعه حارة ...بست الصورة وضميتهاا لصدري..ورجعت جلست جنب ملكه...تمددت على السرير...وكلمت الصورة: افتقدتني؟؟؟...ولاا لسه متأكد من خيانتي؟؟...سمعت انك راح تتزوج قريب...الله يهنيك اذا تزوجت انا مقدر امنعك يا وافي...بس اتمنى تكون وحده ما اعرفهاا.."
رجعت الصورة للصندوق الخشبي..وطالعت بصورة عفاري...وتبمست لهاا بحنان...ورجعت لصور امي وابوي وبستها صورة صورة...وسولفت معهم شوي بعدين قفلت الصندوق ورجعته مكاانه...
تلمست بطني بتردد...لسه توهاا مابدت تكبر...صغيرة مرة...مرات اشك اذا فعلاا كنت حامل او لااء؟؟..بس الدكتورة اكدت لي حملي..واحرجتني وهي تسألني عن زوجي..فاضطريت اعلمها الصدق واقولها ان زوجي طلقني وراح...
يارب ماتكون بنت...يكون ولد...عشان يآخذني معه ونبعد عن كل النااس ونعيش لوحدناا...ويمكن آخذ ملكه معي...تبسمت في وجه ملكه من جديد وغمضت عيوني...ونمت!!

.

[♥} آمـل الـ عٍ ـشآق ♪]

شهرين ثانيين
......في زواج ساره.....





صرخت مو مصدقة وانا اشوف مهاا قدام عيوني....كانت هي بعد تطالعني مو مصدقة...ركضت وضمتني بقوة مرة..حتى اني كنت راح اطيح على الأرض...
قالت وهي تلمس وجهي مو مصدقة: ملكه...انت قدامي...مو مصدقة اناا..."
قلت وانا ابتسم لهاا:ههه.. الناس تطالعناا...اششش...لاا تفضحيناا..."
مهاا وهي تلفت حولهاا: لالالا احلى صدفه في العالم...ماتوقعت اني راح اشوفك لو بعد مية سنة..."
: ليه يا ساتر؟؟..تراني لسه موجوده بالرياض.."
مهاا طالعت في ككل...وبعدين قالت بتردد: حاام...حامل؟؟"
قلت وانا مستغربة: ايه...بس شلون عرفتي؟؟"
مهاا وهي تطالع بجسمي: طالعة لك بطن صغيرة مرة..وانت عادة بطنك لاصقه بظهرك.."
: ههههههه...يقطع ابليسك..مايفوتك شيء.."
مهاا بقهر: اممم..ليت امي معي..ماحد جاا معي غير خالتي صيته.."
قلت واناا اطالع في الناس اللي لاابسين افخم الملاابس وجالسين باماكنهم: مين عزمكم على العرس؟؟"
قالت مهاا: اناا اعرف اهل العريس..."
: حلووو..ماتوقعت اني بعرس خويتي راح اشوف اهل طليقي..."
مهاا ضربتني على خصري بعدين تأسفت: اووووه...آسفه نسيت ان فيه بيبي...مرة آسفه...بعدين تعاالي...طلااقك من وافي مايعني انوا خلااص علااقتنا انتهت...رغم انا مقهوورين على هالشيء.."
قلت وانا آخذ نفس واعدل فستاني الذهبي: وين صيتوه؟؟..ابي اشوفهاا..."
مسكتني مهاا من يدي وسحبتني لعند طاولتهم...كانت صيته جالسه تسولف بالجوال...اول ماشافتني طاح الجوال من يدهاا..وتمت تطالعني مفجوعة...
وصرخت بأعلى صوت: ملـــــــــــــكه...وش تسوين هناا؟؟"
قلت وانا اسلم على خدهاا: عرس صديقتي...يعني وش اسوي فيه؟؟؟..انتم اللي جيتكم ماكانت على البال..."
سحبت مها لي كرسي وجلست وانا مرتاحه...
قالت مهاا وهي ترجع غرتها شوي ورى: تصدقين ان ملكه حامل؟؟"
صيته وهي تطالعني لسه مو مستوعبة: حاامل؟؟..بسس..وافي مايدري.."
قالتهاا لمهاا..
قلت بسرعه: ولاا ابيه يدري...الله يعاافيكم...لاا تقولون له..."
صيته بقهر: ملكه هذا ولد اخوي...بتحرمينا منه...بتحرمين جدتي منه...بتحرمين اهلي منه..."
قلت ادافع عن نفسي: وافي ماراح يرحمني يا صيته...راح يآخذه مني...ماراح يتردد لحظة وحده..."
صيته هي ومهاا بنفس الوقت: وافي تغير.."
قلت بجفا: وافي عمره ماراح يتغير.."
صيته بصراحه: والله ان قلبك قاسي يا ملكه...طاوعك قلبك تغيبين عناا هالشهور كلهاا..ماتركت رقمك عند احد..كأن الأرض انشقت وابلعتك..حتى صديقتك ساره غيرت جوالهاا.."
مهاا وهي تهز راسها:نسيتيناا بسرعه يا ملكه...ترى عمر الطلااق ماكان نهاية الكون.."
قلت ببساطة: صح عمره ماكان نهاية الكون...لكن..طلااقي من وافي..كان شيء الى الآن مو قادره اطلع منه..ما ابي اي علااقه فيكم عشان ماتحسر على شيء مات وانتهى.."
مهاا وهي ترجع شعرهاا ورى: مافيه امل تنصلح حياتكم..."
قلت وانا ابتسم والمس بطني: لاااء..كلهاا كم شهر واتطلق من وافي واتزوج واحد ثاني يعتني بولدي.."
صيته وهي مصدومة: تفكرين بالزواج؟؟..ملكه الله يخليك..فكري بوافي راح يمووت لو تزوجتي غيره.."
قلت وانا مو مهتمة باخبار وافي: خلوه يموت..."
لااحظت ان صيته ومهاا سكتوا...وشكلهم تضايقوا من كلاامي...قلت لهم وانا ابي اغير الموضوع بس فيني فضول: وافي بيتزوج قريب صح؟؟.."
مهاا تكلمت قبل صيته: لاااء...صح انه خطب مرام بعد مارجع من دبي بفترة قصيرة...بس رجع وتركهاا...ولا له نية يتزوج ابد يا ملكه..."
صيته بلعت ريقها وقالت وهي تعطيني فنجال قهوة: ترى وافي القديم مات.."
قلت بقسوة: الله يرحمه..."
مهاا حبت تغير الجو الكئيب هذا فقالت وهي تبتسم بوجهي: مدري عني اناا وفارس..."
: آه صح وش صار لكم؟؟"
مهاا بفرح: ماراح اتطلق منه يا ملكه.."
قلت وانا صدق مبسوطة: والله؟؟؟...مبروك حبيبتي...اخيرا عقلتي..."
مهاا بحرارة: انا عقلت من زمان...فارس يحبني كثير..وانا صدق مرتااحه له مرة...لو تشوفينه كيف اعتني فيني ايام عزا عفراء الله يرحمهاا من بعدها عرفت اني لاا يمكن الاقي رجل مثله..."

[♥} آمـل الـ عٍ ـشآق ♪]

اخذت نفس وحسيت براحه: عقبال ما اشوف بزرانكم ماليين الدنيا..."
مهاا وهي تهز راسها: ماراح انساك..وانت هالحين راح تعطيني جوالك..وعنوانك..عشان اجي ازورك..."
: من عيوني...بس شوفوها امانه برقابكم...ماابي احد يعرف عني شيء...بالذات وافي..."
صيته قالت بحسرة: يا ملكه هذا طفله...وافي يحب الاطفال...راح تذبحينه وهو حي.."
قلت وانا مقتنعه: ماراح يدري عنه وانتهى..وقفلي السالفه..وعلميني عنك...كيف مع الطلااق؟؟..كيف حياتك هالحين؟؟"
قالت صيته وهي تبتسم: انا رجعت لصالح من فترة طويله..."
: نععععم؟؟؟..رجعتي له؟؟؟...ليييييش؟؟"
سألتها بقهر...
قالت صيته وهي تآخذ نفس: صالح تغير يا ملكه..."
قاطعتها: اللي مثل صالح ووافي عمرهم مايتغيرون..."
صيته بحرارة: لاااء والله يتغيرون...الدنيا تغيرهم وتعلمهم ان الله حق..."
قلت ادافع عن وجهة نظري: عقب وشو؟؟..عقب مايخسرون كل شيء حولهم...عقب مايحطمونا ويذبحوناا ويلعبون بمشاعرنا..عقب مانصير بقايا مشاعر وبقايا انسان..عقب وشوو يردون لناا؟؟...عقب ماخلااص ننسلخ وتروح هويتناا؟؟..ليش دون نوطي روسنا لهم؟؟؟..عمر الجبل ماينحني للرياح يا صيته...وانت جبل..."
صيته بقوة وبصوت عالي وهي تقاطعني: بس صالح تغير...يا ملكه...صالح انشل..نصفه السفلي كله صار زي قلته.."
فتحت فمي...وغمضت عيوني بقوة..ماكان عندي حكي اقوله..كنت مصدومه..ليش انشل؟؟؟..حرااااام...حتى لو هو قااسي...حرام ينشل...يصير بقايا انسان...مثلي انا..اناا بقايا...
مهاا وهي تحاول تهدي الوضع بيناا: ياما رجالنا غفروا لناا...فالمفروض انا نغفر لهم بعد..."
: انا اسفه...ماكنت ادري انه...انشل.."
قالت صيته وهي تمسح دموعها: تخيلي بعد شهر العسل حقه...صار له حادث..تركته زوجته على طول اول ما درت انه مشلول..وطلبت انه يطلقهاا....من ايش مخلوقة ذيك الانسانه؟؟.."
قلت وانا اضم نفسي: فيه ناس كثير مثلهاا..ناس قساة مايهمهم غير نفسهم وبس..مثل عمي...مثل وافي...مثل الاغلبية..."
قالت مهاا: اناا معك يا ملكه ان وافي غلط بحقك..وسوا فيك اللي مايتسوى لكن سامحيه...وافي تغير هاالحين..وافي صار شخص ثاني...انا حاسه انه راح يموت بأي لحظة.."
صيته بفزع: بسم الله على اخوي..."
مهاا بصراحه: الدكتور قاله قبل كم يوم...يوم دخلناه المستشفى عشان النزيف اللي بمعدته...قال اذا هو رافض الحياه...ماراح الحياه تفرض نفسها عليه..."
طالعت بمهاا وانا مصدومة...مريض؟؟.. ومادريت اذا اضحك او ابكي...ودي اضحك عليه لأن ربي عاقبه...وودي ابكي علشان الناس اللي تحبه..ولاا هو ماعاد يهمني...وقمت من عندهم بعد ما استأذنت بلباقة...ودخلت على ساره وسلمت عليها وطلعت من القصر..ما اقدر اجلس اكثر...احس المكان بدا يضيق علي...

[♥} آمـل الـ عٍ ـشآق ♪]

ركبت السيارة وطلبت من السواق يروح للملجأ...وش هالدنياا الغريبة؟؟..رجل صيته انشل ورجع لصيته مثل الكلب الحقير وعرف قدرهاا زين...مهاا صارت تحب فارس وعرفت اي فارس تزوجته؟؟...ساره تزوجت اخيرا وتحقق حلمهاا الوردي...
واناا؟؟...اناا ملكه وش تحقق لي؟؟..تحقق لي الحزن والالم...صرت حقودة...صرت انسان ثاني..انسان انا نفسي ما اعرفه..حتى يوم اطالع بالمراية استغرب من نفسي...
راح الحنان اللي كان يميز ملاامحي..صرت اشوف بنت ماهمها باحد...تاكل وتنفس بس عشان تعيش...لو بيدهاا تذبح عمرها كان ذبحت عمرها من زمان وارتاحت...
تصدقوني اذا قلت لكم ان وافي ماعاد يسكن قلبي...تصدقوني اذا قلت لكم اني ماعدت احبه؟؟...
والله هذي الحقيقة..حب وافي اختفى مني للابد...حتى صورته قدرت اقطعها واحرقها بدون ما اتأثر او تنزل مني دمعه..صرت لمن اذكره احس بانقباض بقلي...هو وعمي وبدرية ومساعد اول ناس علموني الكره...
تصدقون اني طول عمري كنت اتمنى اكره..كنت احب واحب واحب وواوزع حبي على الكل...كانوا الناس يستغربون يوم اقولهم والله اني ما اكره اي احد...كان ودي احس بالكراهية تجاه احد...لكن هالاحساس كان يرفض انه يزورني...كان بعيد عني...متباعد شامخ...يمكن مايبي يحمل قلبي الضعيف اكثر من قدرته...
اناا هالحين ما احب احد غير الملجأ وعيال الملجأ وطفلي اللي فبطني..هالطفل اللي بيكون النور بحياتي...
فيه شخص ودي اقابله واشكره من كل قلبي..سلطان...فعلاا ودي اشكره...وودي اقوله اني موافقه اتزوجه واروح معه...انا ابي سلطان...لكن...تتوقعون سلطان راح يرجع لي؟؟...ما اظن...لأن سلطان صار يحب سمااح وراح يتزوجهاا قريب...صرت ما اعني له اي شيء..هذا هو قدري...اللي يبينا عيت النفس تبيه واللي نبيه عيا البخت لاا يجيبه...!!

[♥} آمـل الـ عٍ ـشآق ♪]

واخيرا...وصلنا لنهاية مذكرات ملكه...مذكراتها اللي ماعادت رجعت وافتحتهاا....لأنها تأكدت ان خلااص حياتها استقرت من جديد..ووصلت لمرحلة الروتين..
ملكه اول مابدت تتكتب مذكراتهاا...كان لسبب واحد..هو سبب النكسه في حياتهاا...موت اهلهاا اجبرهاا انها تكتب كل شيء...كل تفصيل صغير بحياتهاا...كل لحظة حلوة وشينه فيهاا...كانت تبي ذكريات اللي تحبهم تكون مكتوبة في دفترها الخاص...عشان اذا رحلوا مثل اهلها تقدر تذكرهم بمجرد ماتفتح دفترهاا...
عرفت اشياء كثيرة بعدين...لكنها رفضت تكتبهاا...لأنها اعتبرتها وصمة عار مفروض ماحد يدري عنهاا...
ملكه كريمه بحفظهاا لاسرار بيت عمهاا...خصوصا بعد ماعرفت ان سبب كل الآثار اللي بجسمها هي بدرية....
وبعد ماعرفت ان بدرية اسوأ من الحقيقة اللي كانت تظهرها لهم...بدرية الصايعه الضايعه اللي تدخن وتحشش وعايشه اجواءها على الأخير....
بدرية اللي كانت صدمة ابوهاا فيهاا كبيرة...بدرية اللي ماتوقعت بيوم ان فيه احد راح يعاقبهاا عن اللي كانت تسويه بملكه...وعن كل الاذى اللي سببته لهاا...
كانت بدرية مبسوطة بحياتهاا...ومبسوطة ان يزيد بيخطبهاا قريب..ومبسوطة ان ابوهاا تبرى من ملكه...وخلاها ترجع لوحدهاا السعودية..
كانت تعتقد ان خلااص حكاية ملكه انتهت...وتسكرت كتبها ولاا عاد احد يدري عنهاا...
لكن ربي مايضيع حق احد....ميران رغم الخوف اللي كان فيهاا...خوفهاا من بدرية وخوفهاا من نظرة اخوانها لهاا قررت انها تعلم اخوها بكل الصدق...اعترفت باشتراكها مع بدرية بكل شيء ماعدا موضوع الكلب..اعترفت انها بعد حكاية الكلب تهاوشت مع بدرية لأنها خافت على نفسها كثير....
يزيد لمن عرف الموضوع....انهاار..وماكان متوقع ان فيه ناس وحوش بهالدنياا...كان يظن ان هالشيء اكبر من ان بنات مراهقات في عمر الزهور يسوونه...تذكر امه وشلون قتلت ابوه...ذكرته بدرية...وكره كل شيء يمسهاا وقطع علااقته فيهاا بدون مايقولها الاسباب...
بدرية ماعرفت ابدا سبب ترك يزيد لهاا وانهارت وتعبت كثير...اما ميران فراحت لأمريكا بعد مازعلوا منها اخوانهاا ولاا قدروا يسامحونها وقررت تعيش ويا امهاا...وتكمل دراسات عليا هناك...
عم ملكه...اللي كان من حال لأسوأ...بدت ملكه تحاصره بكل مكان...بأحلاامه بأفكاره بخياله...
كان يشوفهاا تصيح في كل مكان..وانهاار عند زوجته بيوم...وقالهاا انه حاس انه ظالم ملكه...وانه خايف من عقاب رب العالمين له...وانه لاازم يستسمح منهاا حتى لو هي فعلاا خانت رجلهاا...
زوجته...كانت واثقة من براءة ملكه...لأن عفراء كتبت رسالة قبل لاا تنتحر وضحت فيهاا ان ملكه بريئة من اي علااقة بمساعد...وان الرسايل اللي بغرفتها كانت بس من طرف واحد وهي عمرها ماردت له رسالة...وقالت بعد انهاا عرفت ان بدرية هي سبب الأثار اللي بجسم ملكه وان ملكه مو مجنونة ودخلت المستشفى ظلم...وهالشيء عفراء ماقدرت تعايش معه فترة طويله...لأنهاا كانت تحس بذنب كبير...اكبر من قلب عفراء الطيب... الابيض...
قررت زوجة العم نوره تحرك وتدق على وافي وتقوله كل الصدق...بس بعد ماحلفته ايمان انه مايأذي بنتهاا ابد..ويتركهم بحاالهم...وحلفته انه مايقول لرجلهاا عن هالكلاام كله..
وافي انهار كثير...وكان مصدوم..لدرجه انه قفل الخط بوجهها ولاا رد عليهاا...كان يتذكر ملكه..وشلون جرهاا قدام اللي يسوى واللي مايسوى...شلون ماراعى حياتها...شلون مافكر فيها مرتين...شلون نسى يتمهاا...شلون نسى حلفانها له..شلون نسى كل اللحظات الحلوة...وشلون مرغها بالتراب...
مرض وافي كثير....ودور عن ملكه كثير...لكن ماعرف ابدا وين مكانهاا...اختفت وكأن الارض انشقت وابلعتهاا...
دخل المستشفى فترة طويلة...كان يصارع في ذيك الايام شبح القهر والالم والندم...ايه الندم...الندم على شكه اللي خسره اغلى ماخلق ربي في نظره...خسرهاا...وكان متأكد من هالشيء...لكنه كان يبي بس يستمسح منهاا...بس يبيها تحلله عشان لو ماات..او اهي ماتت...!!
مساعد...حبيبنا المقهوور..اللي حاول يحطم ملكه مرة ورى مرة..هو الوحيد اللي ماندم على اللي سواه بملكه..وكان يعيش اسعد ايام حياته...وهو يتذكر وجهها وصدمتها بشوفته...
كان مبسوط ان اتفاقه مع بدرية حطم ملكه للابد...ملكه اللي من وجهة نظره دمرته..ولعبت فيه وتركته...لذا كان لاازم يدمرهاا...ودامه ماقدر يدمرها بخطته مع الريم...فبدرية هي اللي راح تساعده وفعلاا هذا اللي صار بدرية ساعدته وضحكوا بالاخير..وضحكوا كثير...
اتجه للشراب...وجمع البنات...وصار طول وقته بالحفلاات..كان مرات يحس بتأنيب الضمير...لكن لأقل من لحظات...
سماح...تزوجت بعد فترة طويله شوي سلطان...كان حفل هادي عائلي ومختصر جدا...ماحظرته ملكه اللي كانت تعاصر ندمها لرفض السلطان من البداية...
وياما قلنا لك يا ملكه ان مايبيلك الا واحد مثلك وسلطان كان مثلك...والملكات مفروض مايتزوجون غير السلااطين....
سماح كانت سعيده جدا ان سلطان فكر فيهاا وحبهاا بصدق..ويمكن اكثر من حبه لملكه بكثير...
لقى فيهاا نصفه الثاني وهالشيء خلااه يسعد ويضحك...رغم انه بكى معاها كثير على فقد عفاري وعلى فقد ابوهاا لكنهم تجاوزوا الموضوع مع بعض...لأنهم كانوا يد وحده وجسد واحد وروح مندمجه...
روعه رفضت مشااري كذا مرة...كانت تبكي على اطياف ابوها واطياف عفراء...وعلى اخوها المحطم...
قررت انها ماتبي تتزوج ابد...وطلبت من مشاري بكل طيبة قلب انه يدور وحده تناسبه..لأن روعه ماعادت روعه..روعه هي مجرد جسم بدون روح...بقايا مثل ملكه..وماتعتقد انها بتقدر تزوجه..
ماندري يمكن بيوم بعد كم سنة ترجع بكلاامها وتزوجه؟؟...ماندري كل شيء جايز...
مرام...حاولت انها تقرب لوافي كثير..حتى بعد مافسخ خطوبتها...كانت رافضه تستسلم..خصوصا ان وافي هو حب الماضي والحاظر والمستقبل...

.

[♥} آمـل الـ عٍ ـشآق ♪]

بعد سبع شهور....





ملكه جالسه على الرمال الذهبية قبال البحر....وشعرها الاحمر يتطاير حول وجهها اللي القسوة غيرت ملاامحه...رغم الراحه اللي ظاهره عليه....
ماسكه عفراء بيدينهاا...عفراء الصغيرة الملااك القمر...ببشرتها البيضاء الناصعه...وعيونها السود الواسعه المكحلة...ورموشها الكثيرة الطويله وحواجبها المرسومة...زي ابوهاا فكرت ملكه ببرود...وهي تقطب حواجبهاا...
فعلاا..عفراء..كانت تشبه ابوهاا كثير...بس فيه شبه غريب يجمعهاا بعفراء الاصلية......عفراء الله يرحمك...ويغفر لك...
مسكت اصابع بنتها الصغيرة بنعومة..وباستها لهاا..هذي طفلتهاا هذي املها هذي المستقبل وكل لحظة حلوة راح تنبني بحياتها...
هذي سبب رجوعهاا بقرارات كثيرة...ملكه مابغت بنتهاا تعيش بجو متفكك....محطم...وحيده..يتيمة مثل امهاا...
مابغتها تسمع الصياح والآهات المعذبه...مابغتهاا تكون مقطوعة من شجرة...لأنها يمكن بيوم تروح عنهاا فمين راح يعتني فيهاا...
سامحت ملكه عمهاا وسامحت عمتها....خصوصا انها كانت متأكده ان الدنيا علمتهم كثييييير...
خصوصا بعد ما اكتشفوا بدرية مع رجال غريب بالملحق...سبحان الله الزمن دوار...والظالم مرده ينظلم !!
ملكه رجعت بعد لوافي...لكن خلااص كل المشاعر اللي كانت بقلبهاا ماتت..لأنها حتى يوم شافته ابتسمت بوجهه ببرود...رغم ان الحب كان يطفح من وجهه...لكن قلبهاا اللي تغير..رفض يشوف هالمشاعر وشاف الماضي وبس...
تحركت بملل على الرمل...ووقفت واعطت وافي اللي كان واقف قريب منها يتأملها بنتهم....سوت شيلتها ومشت جنبه عشان يروحون لسيارتهم...
مد وافي يده بتردد وهو يطالع قدامه وماسك بنته بيده الثانية..كان يبيها تحس فيه..وترجع الأولية..لكن للاسف يا وافي ماتت الاولية بسببك...
كان يبي يلمس يد ملكه...لكنهاا بعدت عنه بكل قسوة وتجاهل يدهاا!!
ورجعناا للاسف لنقطة البداية..!!

الحب شعور جميل...ممكن ينموو وممكن يموت هو بالمهد...واللي يحب ممكن يكره***وجهة نظر شخصية***


( النهايه )


_ تمت بحمد الله وتوفيقه_