ريــم الصبايا..

**سولافه** · 24-04-2011, 07:22 AM

كل ماطابت هجوسي قمت اسولف للزوايـا
عن فتاة كان يملا صوتها صمـت المكـان

عن فتاة غير عن كل الي قرينـا فالحكايـا
صمتها طيش وقصيد وطيشها صمت وامان

باقي فيها من اللي فـي طفولتهـا بقايـا
شيطنة ضحك وسوالف ..رقة شعور وحنان

كم تزاعلنا وكـل ينتظـر دمـح الخطايـا
ثم نسكت والقضيه تعتبر ضمـن الرهـان

لين ما تنهي زعلنا ضحكة بيـن الشفايـا
ضحكة غابت ولكن شانها مازال .. شـان

ماذكرت الا عيوب ومـا تركـت الا مزايـا
سود الله وجه حظي ..والليالـي والزمـان

مترفه خلت دلعها صـورة بيـن المرايـا
وين ما لديت فيها شفت ضحكات الثمـان

شفت شامه فوق جمره سوت بقلبي سوايا
ليتها تدري بقلبي وين كان وكيـف كـان

بس ..ياذاك الخفوق اللي تلج بك الحنايـا
شد عزمك لا تخاذل مايطيـح الا الجبـان

مالك الا ذكرياتك وانت من بيـن الهدايـا
ساكن بـاعلى مكانه غالي ما يـوم هـان

كل ما خلت وراها غالـي ريـم الصبايـا
والله اني من غلاها رحت واغليت المكـان

زياد بن حجاب بن نحيت

......