بعض العادات الخاطئة ...لنرتقي بالذوق العام رجاء

[الحسام]

بعض العادات الخاطئة ...لنرتقي بالذوق العام رجاء .

بسم الله الرحمن الرحيم

اولا : اعتذر عن تقديم مثل هذا الموضوع لكن لأهميته لدى البعض وانا منهم عقدت العزم على اثارته ..
ثانياً : اتمنى من اصحاب (الكبود ) الضعيفة او المقبلين على وجبة طعام عدم قراءة الموضوع نهائياً.
..
رغم اننا كمسلمين نقتدي بهدي نبينا صلى الله عليه وسلم من ناحية النظافة والذوق العام
الا أن هناك بعض السلوكيات الغير مقصودة تصدر وبإستمرار ولعلنا نتطرق لبعضها وأكون سعيداً ان عالجت بهذا الموضوع 1% من هذه التصرفات .

اولا : على مائدة الطعام :- ( ابتكلم بالعامي )

1- مرة وحنا جالسين ناكل من الصحن وعددنا 5 اشخاص قام احد الاخوان هداه الله
بنفض يده على الاكل بعد كل لقمه وبكل نفضه يطرطش بواقي اكله علينا ...


انا ماادري هو يخاف يفوتنا طعم لغابيبه ولا يحط حدود لمنقبه علشان مانتعداها ...



2- احيانا وانت تاكل يكون بجانبك واحد مايقدر ( غير مبالي) .. و يتكلم بأمور مالها داعلي ..يعني مثلا
اذا جاك واحد وقعد يذكر انه تعب ذاك اليوم وطلع منه (بلغم به دم ) او انه استفرغ ..

وواحد يقولي ان احدهم فاتح اثمه يوريهم سنه اللي يوجعه .. طبعا اللقمة هنا تكون اما مخبيها بالطرف الثاني من فمه
او توه بالعها ....
الله يقرفك ماتدري ان ما ردنا عن طب الاسنان الا انت واشكالك ...



3- ارفع كمك .. نعم ارفع كمك ...
اذا جيت اباكل اتعمد اني اشمر عن ساعدي وابين للي قريبين مني ..البعض الله يهديه وبالذات اذا كنت تفطر وتاكل شيء يغمس به مثل الفول لاااااازم نص كمه بالفول او الزبادي ..يعني التتبيله اثناء الاكل ؟؟؟


4- هذي ماحصلت لي لكن ذكرت لي وماهي غريبه . اذا كان الاكل بأكياس مثل بعض بياعين الفول والعدس ... يجي اللي يبي ينظم الفطور يشق الكيس بسنونه .؟؟

5- بعد وجبة الأكل وبالذات بالمطاعم ..انتبه تجلس قريب من دورات المياه..ابتعد قدر المستطاع ..الكثيرين وهو يغسل بعد الاكل لازم يطلع من فمه نغمه موسيقية( ماادري وش لون اوصفها ) لازم يطلع بواقي الاكل اللي بالمريء..مايحس ان فيه ناس مازالت تاكل وتضايقهم مثل هالاصوات ..

...
ثانيا :- الذوق العام .( ماادري وش اسميها .. لكن امور عامة )

1- البعض الله يهديه وهو يسولف او بالصلاة بجانبك لا يتحرج من ادخال يده في انفه بكل وقاحه ..
طبعا هم من مناطق محدده لا داعي لذكرها .. اسئل الله لهم الهداية ..

احد المواقف اللي مرت علي .. وانا جالس منهمك بالسواليف مع اللي قدامي فجأة وبدون مقدمات ادخل يده بأنفه !!!
وبدأ بإخراج الشضايا .. وفركها بيده ..... ماانتهت السالفة هنا ... بعدها بدقائق جاء الفطور وكان من ضمنه طحينيه ..فقام صاحبي بتقطيع الطحينيه بيده الكريمة طبعا بدون سكين باليد لوحدها ....
كان طعم الطحينية شهي جدا !!!! ..

واحد قالي موقف ثاني .. وهو يصلي اللي بجانبه كان منشغل بتنقيب النفط اللي بخشمه .ويبدو أن هناك سدد بأحد ابار النفط
فسد أحد الابار بأحد اصابعه وشغل البساتم فانطلق مذنب من الفتحة الاخرى استقر بموقع سجود صاحبي راوي القصة ....انا اعرف انه هالامر بالتحديد نادرا مايحدث
لكن كون انك تدخل يدك بخشمك قلة ذوق والله .

3- نبتعد قليلا عن تلويع الكبود ...ونبحر بعبارة ( القيادة ذوق واخلاق)

وانت تريد تنعطف لليمين والاشارة حمراء يأتي البعض هداه الله ويقف بالجهة اليمنى ضارب عرض الحائط بمن خلفه ...
وش الحكمة من هالتصرف .. المشكلة ان المرور مايتدخلون بهالامر نهائيا ..

4- وهي للأسف تحصل دائما وأنت جاي مستعجل تبي تطلع بسيارتك من المواقف تلقى واحد مقفل على سيارتك بكل وقاحة وياليت انه يبي يجلس دقيقة او دقيقتين واذا جاء قالك آسف !!!!



.................
اكتفي بهذا القدر والا القائمة تطول ...ولعلكم تشاركوني بذكر بعض العادات السيئة .

ختاما اقدم لكم اعتذارين ::

الاول : اعتذر مرة اخرى و بشدة التطرق لهذا الموضوع والذي هو بحد ذاته قلة ذوق لكن لتكرر هذه التصرفات قررت وضعه في هذا المنبر لعل ان يصل صداها لاصحاب هذه التصرفات ...

الثاني : اعتذر عن اسلوب طرح هذا الموضوع والذي لا يرتقي لا من قريب ولا من بعيد لمستوى الطرح .. لكن احيانا تكون بعض الالفاظ وبهذا الاسلوب ذات صدى اكبر ..
..........

[بنت الحجاز]

شكراً جزيلاً لموضوعك

[خيالي]

وفقك ربي هاني

[على ادهم]

[align=center]مشكووووووووور
[/align]