((الجزء السادس عشر))
(تحديات)
لمن تؤمن بفكره معينه ساعتها تقاتل وتتحدى الكل علشان تحقيقها .... وأكيد راح تلاقي اللي يساندك علشان توصل لخط النهايه ....بس لمن تكون الفكره مجنونه او مضره او حتى جبانه
فأكيد بتتزايد العقبات قدامك وساعتها فعلا بتحتاج لانك تتحدى الكل.....
بس الشي اللي فعلا استغرب له هو ليش في بعض المواقف ما تظهر روح التحدي الا علشان نحطم انفسنا ؟!!!!!!!!
بعض ابطالنا راح يتحدون علشان يتخلصون من الالم اللي يعصر قلبهم ....لكن هل سينجحون ؟
واساسا هل كلهم اذا فازوا بالتحدي فعلا بيرتاحون ؟
طـــــــــــــــــــلال
ما صدقت اني اخلص مشاويري بهالسرعه و لحقت ارجع البيت قبل اذان الظهر تحممت ولبست استعدادا لصلاه الظهر نزلت الصاله لقيت وداد توها داخله من الباب سألتها
:- ها وش الاخبار قلتي للعنود ؟؟وش ردت عليك ؟؟
اشرت على وحده وراها وقالت :- هذي هي عندك اسألها بنفسك
ورقت لغرفتها وتركتني مع العنود في الصاله لحالنا قربت من العنود اللي تراجعت للخلف ما حبيت اخوفها فقلت لها
:- العنود انا كنت ابي ......
قاطعتني بانها قالت بصوت هامس
:- ممكن تبعد شوي ؟
انتبهت اني ساد عليها الطريق لفوق ابتسمت
:- اول توافقين على طلبي (ومن غير ما استنى ردها ) العنود وش رايك نخليها ملكه و زواج مره وحده؟
رفعت راسها بحده وقالت بصوت مهزوز من الانفعال:- مستحييييل
وتفادتني ورقت لفوق بسرعه صحيح ان خالد قال لي ان العنود مستحيل توافق بس بعد صدمني ردها ...يعني توقعتها تفكر شوي او حتى ترد علي عن طريق وداد ...بس بعد ضحكني رد فعلها رغم انها ما قالت غير كلمه لكني حسيتها تختزن بداخلها الاف المشاعر... توتر وانفعال وخجل ....( خساره لو بس وقفت شوي كنت اكيد باقنعها )...طلعت من البيت لقيت سياره تركي برى (اوه يعني العنود ما بتجلس عندنا ) قربت منه سلمت عليه ولفت نظري انه متضايق حيل
:- لا تقول ان الحريم اتعبنك في السوق
حاول يبتسم:- ابدا وتراهم ما خلصوا مشاويرهم
اتكيت على دريشه السياره وقلت له :- ولا يهمك انت ارتاح وبكره انا بوديهم
ضحك :- ريح حالك لا انا ولاانت سلطان بيتكفل فيهم
بوزت :- يعني اللحين فضى سليطين
قربوا خوات تركي من السياره فقال :- زين اخليك علشان الحق ارجعهم البيت واصلي واروح لاشغالي
كنت بابعد بس حبيت اشوفها فطولت السالفه مع تركي:- طيب بس الليله اكيد بتجينا ؟
خساره نجود هي اللي جلست قدام وما سمعت من كلام تركي غير نهايته
:- .............عازم الربع وبسهر معاهم
خلاص مالي نفس اطول كلام بس علشان ما يحس تركي قلت
:- رتب مع ربعك على عشا متأخر ...وتعال هنا اول (غمزت ) ولا تفوت عليك منظر ماجد الليله
ضم تركي حواجبه مستغرب :- ليه وش فيه ماجد؟
ابتسمت :- ابد غار مني ويبي يتملك بسرعه ..والليله بيجونا يحددون موعد الملكه
جمدت ملامح تركي وراح اللون من وجهه وكأنه صعق بهالخبر وفتح فمه بيقول شي لكنه تراجع استغربت حاله وقبل ما اسأله وش بك قال بصوت مبحوح
:- ما اظن بس بحاول ...يلا في امان الله
رفعت ظهري وسلمت عليه توجهت لسيارتي وانا بالي مشغول فيه يا ترى وش فيه تركي معقوله شكوك خالد صحيحه وان بين تركي وماجد شي ؟....يعني المفروض انه يفرح لصديق عمره بدل ما يعبس كذا ...ركبت السياره واتجهت للمسجد وانا فكري وبالي مشغول بشي واحد
العنوووووووود واللي بسويه ( رفضتي نعرس اللحين وهذي نقطه لك ...لكن بنشوف وش بتسوين يوم الملكه ) انعشتني الفكره وخلتني طول اليوم في حاله من الروقااااااااااااااان
خــــــــــــــــالــــــــــــــــد
ما ادري كيف قدرت اخلص الاجتماع مع بو نادر وانهيت كل شغلي معاه ...احس راسي بينفجر خلاص رديت الفندق واخذت لي شاور وحبتين بندول نايت وحاولت انام لكن القلق والتوتر كان اقوى من الحبوب علشان كذا طول على ما اخذ مفعوله .....اخ للحين يتردد كلامها في راسي ما توقعت ان نهايه حوارنا تكون كذا ....اول ما تكلمت حسيت بتعاطف معاها ولمن بكت حسيت بالندم حسيت باني جرحتها واهنتها حسيت اني كسرتها إلا حرقتها بشكوكي ...لكن تماسكها في البدايه خلاني احسبها قويه بس لمن انهارت عرفت شكثر هي ضعيفه وهشه... شعورغريب دفعني لاني اضمها مو علشان تهدأ لا ....ضميتها علشان تتطمن وعلشان ما تذوبها حراره الدمع علشان تحس بالدفى علشان تحس بنار الندم اللي تكويني علشان تعرف انها لي وبسسسسسسسسسسسس.....لدرجة اني اعتذرت ...ايه اعتذرت يمكن ما يكون اعتذار صريح بس انا كنت اعتذر كنت اقول لها من ورى كلامي اني ما شكيت وما اهنت الا كدفاع عن كرامه تنزف نيران حولت قلبي الى رماااااد ..... الكرامه اللي جرحها ما التئم حتى عقب اللي قالته
كرامتي وغروري كرجل اللي هدتها لمن قالت انها مغصوبه علي يعني رافضتني وهالمره غرست خنجرها للاخير حتى وصل للعمق وحركته بقوه في الجرح وهي تقول بكل بساطه
:- خالد احنا ماننفع نكون مع بعض .......خالد طلقني ........
وش تبي من المطعون غير انه يصرخ ويأن فقلت وانا احاول اني اكون هادئ
:- نعم!!!وش قلتي
وعادتها مره ثانيه وهالمره حسيتها طعنه في الروح :-طلقني ...حنا مستحيل نقدر نعيش مع بعض
خلاص ما عندي قدره على الاحتمال الصبر نفذ هذا اذا واحد يقدر يصبر على الالم وهو ينازع الموت ليش احس بالموت ما ادري كل اللي عرفته انه الم لا يطاق في راسي وصدري ما قدرت اصرخ لكن الغضب والاصرار واضح في صوتي المنخفض
:- طلاق مافي يا بنت عمي
استفزتها لهجتي وعدم انصياعي لرغبتها فطعنتني مره ثانيه
:- بس انا ما ابيك ...يعني بتعيش مع وحده ما تطيقك تكرهك ؟؟
اعماني كلامها عن اني اتكلم بمنطقيه وخلاص اصلا ما عاد للمنطق مكان
:- مو مهم انتي وش تبين او ش تحسين المهم اني طلاق ماني بمطلق
ما تراجعت ولمع في عيونها تحدي اكبر
:- ليش هو غصب ...ولعلمك اذا ما بتطلق من نفسك بتطلق غصب عنك ...بقول لابوي و.....
عندها قدره جباره على تعذيبي وهالمره صرخت ومن غير احساس
:-اللي ما طولينه بايدك واصليه برجلك ....والطلاق لا تحلمين فيه ولعلمك زواجنا عقب شهرين (صديت بطلع قبل ما ارتكب فعل اندم عليه وقلت وانا صاد عنها )وصدقيني كل غلطه او حركه مستفزه بتقصر المده
.....يمكن اكون قسيت عليها ويمكن اكون اخترت الاسلوب الاسوء ويمكن اكون ارتكبت غلط
في ردة فعلي وتعاملي مع الموضوع يمكن ما كنت منطقي او موضوعي .....لكن من متى يفكر الشخص في الاسلوب الافضل لانقاذ روحه من الهلاك
ليش اعتبرها روحي لا لا ....انا جالس ابالغ كل السالفه انها جرحت كبريائي وغروري واثارت روح التحدي في داخلي ....ثانيا هو الزواج لعبه علشان الطلاق يجي بهالسهوله ..هذي خلاص صارت حرمتي يعني لي لي انا وبسسسسسسسسسسس..... صحيح ان الزواج مو غصب ولا تعايش بالجبر مع الطرف الثاني ....بس انا اعرف انها مستحيل تكون لغيري مهما يكون اللي بيعترض طريقي......ريحتني هالفكره او الحبوب اخذ مفعوله ما ادري لاني عقب كذا نمت ولا حسيت بشي حولي........
صحيت من النوم على صوت جوالي تنبهت للوقت فتحت عيني على الاخر
:- معقوله نمت تقريبا يوم كامل
حسيت ان جسمي متكسر وما فيني قوه تجاهلت المتصل ورحت على طول علشان اتحمم وصليت كل الصلوات اللي فاتتني استغفر الله اول مره اسويها خلصت من الصلاه فتحت جوالي اللي كان مليان مكالمات لم يرد عليها من تركي وطلال و.....رفعت حاجب عليا
توني بدق عليها بشوف سبب اتصالاتها لكن منعت نفسي هي اللي تبيني وانتبهت للمسجات وحده من طلال
((وينك اتصل ما ترد ....المهم العنود ما واففقت على فكرتي ..وانا ناوي ....ولا اقول تعال بسرعه وانا اقول لك ))
ابتسمت هالمجنون متى بيركد اخاف اذا زوجناه يجن زياده
فتحت المسج اللي بعده وكان من تركي
((ضــــــــــــــايق مررررررره ...احس اني بختنق يا خوي ....خالد تعال تكفى تراني احس بيومي قرب))
الهواجس لعبت في دماغي وابليس يوسوس في صدري وش فيه تركي؟؟ اتصلت عليه لكن جواله مغلق اتصلت على البيت ردت العنود
:- نعم ؟
وحشوني وبالذات العنود من سافرت وانا اسمها اسمعه من طلال يوميا وهذا اللي خلاني اشتاق لها اكثر
:-السلام عليكم ...هلا بالعروس
واضح انها استحت لان نبرتها انخفضت وصارت اقرب للهمس
:- وعليكم السلام ...اخبارك واخبار عليا
زفرت كل الحراره اللي بصدري :- تمام (وعلشان ما تسأل عنها اكثر قلت ) وينه تركي
العنود :- في الشركه على حسب علمي ليش ؟؟؟
ما حبيت اقلقها :- ابدا بغيته في شغل وجواله مغلق ....خلاص راح ادق عليه في الشركه
سكرت من العنود ودقيت على مكتبه لكن ما في اي رد
رميت الجوال وقمت اجهز شنطتي خلااااص الليله برد السعوديه سكرت الشنطه الا جوالي يدق من جديد لقيت المتصل عليا كنت بتجاهلها عقاب للي سوته بس ما قدرت رديت عليها ببرود
:- نعم ؟
ما تكلمت مره ثانيه قلت :- نعم ؟داقين خير انشاء الله ؟
جاني صوتها الهامس :- اليوم زواج جاسم .... ابي اروح الصالون وبعدها الصاله
كنت ابيها تطلب اذني بصراحه فقلت :- ما فهمت وش المطلوب ؟
ما على صوتها لكن نبرتها شابتها شي من الحده :- مهما يكون لا زلت زوجي فقلت اخذ اذنك
ما ادري ليش ابتسمت :-مع من بتروحين ؟
سكتت بعدها قالت :- مع واحد من عيال خالي
سألت :- لحالك مع ولد خالك ؟
تنهدت :- لا مع بنات خالي
يعني مو عاجبك اني اسأل طييييييب يا عليا :- ومتى بتروحون ومتى بتردون ؟
ردت وهي تحاول ما تبين انزعاجها الواضح :-بنروح عقب ساعه الصالون واول ما نخلص بنروح العرس لكن متى نرد هذي على حسب الوقت يمكن وحده يمكن اكثر ويمكن اقل
على طول قلت لها :- لا تروحين
ردت بحده من صدمتها :-نعم ؟!!انت وش..
ما كملت لاني قلت :-لا تروحين مع حد انا باخذك كل مشاويرك
عليا :-بس انا وعدت البنات اكون معاهم و........
قاطعتها بتأنيب :- المفروض ما تواعدين قبل ما تشاوريني ...وترى البنات بتكونين معهم في نفس المشغل وفي قاعه الاعراس بعد ...جهزي حالك اقل من ساعه وانا جاي
سكرت الخط من غير ما استنى ردها اساسا انا تكلمت اكثر من اللازم ..أووووه تذكرت اني لازم ارجع السعوديه باسرع وقت ..بس لو تركي يرد واعرف وش فيه بالضبط ... غير اني من خوفي على تركي نسيت عليا مو معقوله ارد السعوديه واتركها هنا خاصه عقب اللي قالته امس ...لكن بكره باذن الله بكون هناك
المفضلات