ديوان سالم السيار

[ــــــــ]

فصل الفراق

الشتاء فصله يجي بعد الفراق
والحزن غيماته في جبد الوله

الرعد قلت الرعد هذا اشتياق
يضرب عيوني وتدمع مرحله

ليه راحو ليه جوني في نفاق
تقفي وجيه وجيه مقبله

صرت انا خارج مداهيل النطاق
ماسوى قلبي بيد يني احمله

رغم وسع الكون اشعر باختناق
كل وجه في ضلوعي اسعله

ليه كل شخص يسفرني بعناق
القى جرحي بالورق من منجله

شي يطاق وشي والله مايطاق
مهزله في مهزله في مهزله

طعم واحد في حياتك له مذاق
أسئله في اسئله في اسئله

الشتاء بقلبي يجي بعد الفراق
ليت في قلبي حديهم وأشعله

[ــــــــ]

الطيف

تجيني طيف ياعمري على جنحان شوقي لك
أخاف أرمش من عيوني وأبعثر صورة وصالك

حبيبي لاتجيني قول .وين أنت..وأنا أجيلك
أبيك تقول..وين أنت وعلى عيوني أنا اسعالك

وربي فوق روس الشوك لخلي القلب يمشيلك
واخلي ظلالي يسبقني قبل يحضني منزالك

ثواني بس أبي اتهندم من عيونك وباهديلك
في عينك ضحكة حتي تكحل عين عذالك

يقولو الناس بغيابي تشب القلب ويضويلك
حنيني ومن وهج شوقه يميل القلب لامالك

قضى دمعي من عيوني أبي من عينك ابكيلك
ابنثر من ورى عيوني دموع عيون ترحالك

تعبت اهرب من الأشيا البسيطه من تفاصيلك
تعبت اسأل زوايا البيت عن اول واخر أحوالك

وحتى الشوق من صبح الدرايش قام يهديلك
عصافير الرضا ترفرف على بيبان مدخالك

هنا ترمي صباح الخير قبل لا تروح وأدعيلك
وهنا تضوي مساء الخير في عيني من هلالك

انا من الليل يقطفني شعوري لك واغنيلك
أنا من الصبح يليلني الحزن من لون موالك

حرام الليل ماهو ليل اذا ماكنت في ليلك
وحرام الصبح ماهو صبح اذا ما كنت بظلالك

تروح وقلت احط روحي على كفي واناديلك
نزعت العمر من شفت الغلا بالروح نادالك

بربك قول و ش سوى الفراق بوجه منديلك
تسيل الوان طيفي فيه الا من البكا سالك

حبيبي لايبكيك الفراق ولا يهد حيلك
أخاف الدمع من عينك يجفف صورتي فبالك

تعال احتاج اسولفلك عن الايام و أشكيلك
وافض غيم الحزن و انثر حنين الشوق بأقبالك

تعال وحط في قلبي هموم الفرقا وأشيلك
لأن القلب ماهو قلب اذا في نبضه ماشالك

وقف دمعي من عيوني ابي من عينك ابكيلك
أخاف ابكي على طيفك وأبعثر صورة وصالك

[ــــــــ]

الدستور

فراق وكان له صوت يهز ويفتق المستور
يمر بين الحنايا ويجرح عروقي في زلزاله

انا المشطور في نصفي هنا وهناك بعد مشطور
وتحت هذا الركام اللي بقى هو قلب ب لحاله

انا كنت اكثرك كنتي اكثري ياكثري المهجور
وتتهاوى ضلوعي من صفير اليل وأغلاله

ورحتي والحزن يطحن تفاصيل الصور ويدور
ولكن مادرو مزن الصور في بالي هماله

يابنت اللا مدام أن النعم هي كلمة المجبور
قوليها والبحر يكسر شموخه من على جاله

الا ياليت هم يدرون عمر كل الحياه شعور
وان الحب بالعاشق تكون البصمه في باله

يحسبون الغلا قتل وجنازات المحبه سطور
مع أن الحب لو تقتل وصوله يزيد بأوصاله

أحبك والمدى أقرب من عيوني على العصفور
أحبك والجدار اللي أحتوانا طول ظلاله

أحبك ينتفض هذا المسى من أول يدين النور
احبك جوع يطفي حياتي ويشبع اشعاله

مثل حكي الندى لما يعانق بالحنين زهور
في قلبي شفت قطرات الوله في عين مواله

أنا قلت الفراق أطهر تراب داخل الديجور
وقلت أهدي من عيون الضوى دمعات ل هلاله

ونبت في داخل عيون المسى ضو من الممطور
وعرفت أن الوداع أزهر في قلبي قمرة أرحاله

[ــــــــ]

الغيبوبه

بنادق مهجتي معبى فشقها والغلا نيشان
ابطلق روحي في قلب القصيدوانبض ابياته

ابذبح حزني من اقصى الشعور لأول الاخوان
وأسيل عمره وتشرب عيون العمر دمعاته

وحيد ولامعي الا اخويه بداخلي غفيان
ترفرف ضحكته واطلق نعاسي لصبح ضحكاته

في بالي يرقد وأدري حزين وشارد وبردان
وانا انثر برده من فوق الخيال وجمر سجاته

ينام واعقد بعين الاغاني جمرة التحنان
ينام واعقد بعين البدايه كل نهاياته

يدور القلب تتفتت ظلوعه يطحنه حرمان
يجوع القلب يحضني في جوعي واكل فتاته

واطل من الألم احضن حياة الشارع الولهان
يلملم حسرتي ويكسر وجودي بشوق أضاءاته

ياخي اقعد الدنيا رمت من تحتي النيران
وهذا العمر مايحمل بجوفي الا انكساراته

تعبت امليني طعون تصب من خنجر الخلان
تعبت استنزف عيوني دموع لعين طعناته

ياخي ليه تغيب وليه تتركني واناشفقان
لقرم يقلب جبال الهموم بعزة ثباته

أعرفه لاوصل كنه صقر من صفوة الويلان
يكش جلد السما ان شافت مخاليبه وهداته

رجال تربط حزام القبيله وتنفلت شجعان
واخويه يربط رجال القبيله حزام هقواته

كريم ماهو من يبني فعايل صيته الديوان
في صدره دلته وهيلهوفناجيله وتمراته

اذا كان الكرم حمس الهلا في مهجة الضيفان
اخويه من حمس قلبه لضيفه وصب فزعاته

وكم تكفى انرمت بين البشر ممزوعة الوجدان
اخويه قبل لاترمى عليه يقط نخواته

حزين السيف بكفوف الاوادم طافي ذبلان
بعد مانام دم اللي سقى فعله ومضاته

ياخي اقعد وقعد خضوعي بداخل الشريان
تنام ولابقى هم قطف من دمي غفواته

غريبه شلون يكسرك الغياب ويغلبك نسيان
ودفتر جيتك ياخي طوى من عمري صفحاته

يجيني مدري ولكن اعرفه لاوصل جيعان
قسم وان جاني لانحرني لجوعه تحت خطواته

وصل زوله هذاك اللي وصل مايشبهه انسان
هذاك اللي وصل شايل عذاب العمر واهاته

وجيت الحين ياخيي بعد ماشالتك امتان
بعد ماودهم غسل الجسد عن كل نزواته

ابد لاينغسل هذا الشهم مغسول بالفرسان
أخويه من غسل روح الجسد في طهر نياته

أيا دفان دخيل الله لاتدفن ايا دفان
دخيلك خلني أدفن في بالي جمر بسماته

وأهف بسماته من هذا المكان لأخر الأحزان
وأنا اطحن موته في جوع الكلام واخبز سكاته

أنام شلون لاصار الاخو جايع وانا شبعان
اخوي اللي كسر قلبه لجوعي وجاع لحظاته

اخوي اللي يمزمزني معاليقه اذا عطشان
اخوي اللي ثنى عمره من اجل اطلع مسافاته

يدين القبر ضميني وسط حضن الاخو نعسان
ابرقد دام لي قلب دفن وياه نبضاته

اكيد انه وسط قبره سمع طق الخطاوي الان
الا ياليت انا المدفون وانا اسمع طق خطواته

[ــــــــ]

خلف سيار

الوقت عتمه ودمك اليوم قنديل
من طيب دمك الف مجد شعلته

من قهوة جدودك ل هقوة هل الهيل
اركنت فعلك فوق اصلك وفحته

صبيت من روحك لمجدك فناجيل
ماقلت بس وكل عز شربته

اركزت فعلك في قلوب الأقاويل
في راس مجدك كل قلب نحرته

قسمت عمرك في عيون التهاويل
من يلمحك هول بعينك هولته

مطنوخ من طنخ النخاوي مع الخيل
مافيه صعب مانتخيت وكسرته

انا اشهد انك يالشهم تفضح الليل
وأنا اشهد انك للستر مافضحته

فززت مخلاب الوطن يومك تخيل
نصر شلعت بوسط نحره عطبته

شفت الوطن دايم يشيل الرجاجيل
بس انت شفتك يابن الاجواد شلته

وشفت السما عذرى تطش الهلاهيل
وشفت العلم رجال بيدك رفعته

المجد يالعالي يجيلك تساهيل
من طول اصلك كل علو قصرته

ايقنت انك يالشهم تشبه السيل
وايقنت صعبك لا وطيته جرحته

خلها تسيل الارض فعل وتماثيل
خلها تذكر دام فعلك ذكرته

جيتك وانا انبض من عيون الفحيحيل
يوم قلبك وسط صدري نبضته

الشعر ليل ويسكن بداخله ليل
لكنه اقمر يوم صيتك قمرته

جيتك عرفت ان الوطن بالرجاجيل
من يوم شفتك يابن الاجواد شلته

[ــــــــ]

الطيب

تضحك تظن الحزن انك دفنته
اخفيت حزنك صح لكنه بانك

ظنك طعنك العمر والله طعنته
من قبل يكونك موت كونت كانك

ساكنك جوع وجوع غيرك سكنته
ماعشت نفسك يوم مره عشانك

الطيب صنته لكن البخل خنته
ماصنت نفسك لكن الطيب صانك

تبي الصراحه كل هالكون عنته
اسمك يسافر فيه وانت بمكانك

ماتنعوج بانذال والطيب صنته
لو تنعوج بانذال عدل شانك

لاماسجنك الطيب والله سجنته
اطلعت كفك قبل يطلع لسانك

الطيب صنته واعرفك كيف صنته
أن خان كفك قالو الطيب خانك

[ــــــــ]

لا يالقصيده

معقول ما اقدر اكتب اليوم بيتن
ولا من الطعنات روحي جريحه

ماكني اللي كان بين المحبين
يرقى الهقاوي لارقت من مديحه

ولاكني اللي كان بين المعاديين
يرمح يصيب قلوب ناس شحيحه

الله واكبر كيف قلب الموازيين
شهرين ما فاض القلم من قريحه

يعني انكسار المجد بالذات تبغين
ولا يموت المجد من دون صيحه

كنتي الظما وتروين ناس كثيرين
كنتي المضيق وتمنحين الفسيحه

كنتي الهوى وقت الأغاني تضمين
قطرة ندى تزلق من عيون شيحه

كنتي على جال المشاعر تشبين
صوت الوطن لاهب بالعز ريحه

والحين ماودك طلوع المياديين
ماخفتي الله من عيون الفضيحه

ان كان ودك من عيوني تطيحين
طيحي مع موتي اذا فيها طيحه

[ــــــــ]

حفيف الجرح

اشعر بعض احيان عقلي ب مجنون
واحيان انا ألقى عاقل في جنوني

وأحيان أقول يدين عمري هي غصون
وقت المصافح شفتهم يقطفوني

دايم أردد وسط بالي يمونون
بس هاه.. ماعمري نطقت بعطوني

أرمي المراجل ياعسى فيهم تكون
ولا قد لقيت الا طلبتك تكوني!!

واثر المراجل هم لها وجه وعيون
ماتعيش في شخص ....ودوني

هذا حفيف الجرح من هبت شجون
ولا سقوط وجيههم من عيوني

معقول فوق الجرح دايم يغنون
ولافيهم اللي شاف زرقة طعوني

هذا انا من العام طايح ومطعون
لالوقت وقتي ولا القصايد لحوني

الحر مكسور الجناحين ومغبون
فوق الكسر مرو علي وألعنوني

يعني أعيش بمثل ماهم يعيشون
لاطعم لا ريحة ولا اللون لوني

الناس صارو اشباح فيني يمرون
يسحبني الأول وعشره اقطعوني

قلت اتعلق بالاغاني على هون
حتى أيتقطع وصلهم في جفوني

[ــــــــ]

الزبرجد

اذا هالقلب ماينبض معاليقه على الميعاد
أنا وشلون روحي في دروب المجد أصعدها

مشيت ولا معاي ألا جروح بالدروب جداد
ومعايه شيمة ترقى على ضلوعي تهودها

صحيح الروح مكسوره ولاتقوى تشيل شداد
ولافكرت أحط روحي على روح تسندها

رقيت جروح وخليت الصبر فوق الجروح ضماد
أنا لاقلت أضمدها أنا أعرف كيف أضمدها

تثور الخيل من قلبي وأقول ان الهقاوي جياد
وأشوف القلب من دم الجدود يفور يلكدها

يا أما موت من سيف الشعر يحييني للميلاد
يا أما النفس في صمت الشعور تموت وأغمدها

أنا البارح يناديني النعاس ولا يجيني رقاد
سهرت أنوم القمرى على عيوني وأقعدها

من بلاد قلايدها النجم في جيدها وقاد
وعرفت أن السما تلبس من بلادي قلايدها

وضوى هذا السهر يمشي على هذا الجفن بركاد
يموجني الغلا ويطيح من جفني على يدها

وأشوف الليل يترامى تحت عمري ويصير رماد
وأشوف الضوء يغتال الظلام اللي يسودها

هي الفضه من اللولو على هذا الفضا تزداد
أم أن هذي الرمال اللي ولدتها من زبرجدها

وكاد انها ضوت عمر القصيد ورحلت القصاد
وأجيب أقمار من دمي على فمي وتقصدها

وأصب النبض في قلب البلاد وينبض الأنشاد
ويطيب القلب ويتنفس شعوري من قصايدها

يوديني غلاها وجيت من أقصى الغلا وراد
عليها وجيت أخذها علي ورحت أوردها

أحبك ياعطر عمري وطلعة عمري بالأعياد
أنا همت أكسر ضلوعي في عيدك جيت موقدها

وأقول العيد فيك بخير لأنك خير كل بلاد
وأجيب أيام خير سنين عيدي وفيك أعايدها

لأنك دنية الدنيا ومنك ترتوي الأوراد
لأنك أرض كل الأرض ولا غيرك يوردها

وحتى الغيمه من تلمح يدينك تحضن الرعاد
تبي تنزل عليك من الوله تروي تنهدها

ألا يادار يابنت الهقاوي وهقوة الأجداد
ألا يابنت من روحه فدى عيونك يبددها

عفيفه لاقعد وجه الفجر من خشية العباد
يطيح الليل لارتفعت بذكر الله مساجدها

هي الرفعه من شموخ السجود وجبهة السجاد
أبوها لو يسجدها لوجه الله سجدها

يرتبها الفجر في فوضة طيوره ويبكي بعاد
ويتنهد على شمس تجي من أصبع تشهدها

وتفوح الشمس أذا قلب المدارس يحضن الأولاد
وبنت ترمي تلويحة وداع بعين والدها

صباح الشمس يا أرض العزاوي وعزوة الأسياد
صباح الأرض يانور الصلاه بروح ساجدها

يهيلها الكرم من صدر أهلها طيبين أجواد
يشبون الهلا للي يمر والطيب يوقدها

تشوف العز بعيون النشامى يلتفت هداد
شلع لارفرفت كلمة (كفو) يطلع ويظهدها

ألا يادار يابنت الهقاوي وهقوة الأجداد
ألا يابنت من روحه فدى عيونك يبددها

عزيزه حره ماترضى تلامس يدها الأصفاد
تحط الموت في روح الكفوف اللي تقيدها

عنيده لاركبت راس الحرايب تلتهب بعناد
تمر مثل الحرايق في هشيم الحرب ترمدها

أصيله مضمره بالمجد تقود المجد ما تنقاد
تمر مثل الوميض ولا قدرت عيني تجودها

مثل ما مرت وشبت عيوني بداخل الميعاد
انا قلت أشعل ضلوعي من عيوني وأعايدها

[ــــــــ]

عساك بخير

عساك بخير


.
.


عساك بخير
وش أول وأخر جروحك
وش أخر و اول فراقي
يقولو من المسى
اتلملم بقايا نبرتي وتروح
على اول ذكرى بالشارع
نسينا كل سوالفنا عليه
وكل مواجعنا
وصرنا فيه ندورونا
ندور من ملامحنا
ملامحنا
ندور من تشتتنا
تشردنا
ألين أنا ندور في وجيه الناس
تصور
ولاقطره بوجيه الناس
تشبهنا وتشربنا
وأرد ضاميك
وبعد مثلي
ترد ضامي
وأقول ان المسى كاسك
وأصب عيوني لأ حساسك
وانا اتكسر
مع كل اغنيه تفتح
هدبها
وألمح عيونك
ياعون الله تلاقينا
تصور......
بأغانينا تلاقينا
عساك بخير
وش أول وأخر جروحك
وش أخر و اول فراقي
يقولو من المسى
أتلملم بقايا قمرتي وتموت
نسيت اسأل
صحيح تموت ؟
.

.

[ــــــــ]

البرزخ

.
.
.
.


مسافرين كلنا
اي والله انا كلنا مسافرين
الموت ميناء
ايامانا
ميناء
وبحرها المقبره
بحر من عظام وكسور
نرسي وترسي حمولنا
وابحار للقبر الحزين
بأمواج كف احبابنا
سفينة الموت الحزين
تابوت
نترك سيول العاطفه
تجرح مواطي النظر
كل ماذكرتنا دور
نترك سواد ايامنا
للمغفره والنور..
نترك موايل الحزن
تطحن بنا وتدور
يمكن نستنا اشجار
ويمكن بكتنا دور.
يمكن
ويمكن
ويمكن
ماتنفعك يمكن
لاصرت وسط قبور
لاصارت الدنيا اهل
واحباب فوقك بالسما !!
وانت بقبر
واغلى عزيزنك وفا
يملون عينك
بالتراب !!
ماتعتبر
ياويلنا ياويلنا
اذا التئم عظامنا
ياويلنا ياويلنا
اذا اطفحت اعمالنا
من فينا مات
ونيته باطله
ومن فينا مات
ونيته طاهره
ياويلنا ياويلنا
من شقق
ثياب الحلم
من لبس
الطفله وهم
منهو نسى
طفله يموت
وسط الحياه
القاسيه
منهو جعل
سفن الذنوب
داخل ظلوعه
راسيه
مسافرين
كلنا اي والله
انا كلنا مسافرين
على الاخوه المسافرين..
على الرحله رقم
واحد
ورى
واحد
ورى
واحد
ورى
واحد
الرجاء
ربط النزاوي المرهبه
وفك اللسان بالادعيه
.
.
.

[ــــــــ]

ليه !!

ليه !!

.

.

.

.




هذا هو اللي تبيه .. ؟؟
اني ارحل من حياتك
واشعل عيوني ب ليه..!!
بس خلاص ..!!





هذا هو اللي قدرته ..؟
وقدرك ربي عليه ..
بذمتك هذا كلام ..؟
اني ارجع من جديد
ارجع افرش كل تعب
عمري وانام ..





زين لحظه..!!
لاسالوني الناس وينك ..؟
وان درو ضحكة عيونك
عن عيوني سافرت
ردت لعينك ..




بذمتك قول ..
وش اقول ..؟
قول قول قول قول
الله يخرب بيت بيتك
توني يادوبي بديت
بعت عمري واشتريتك
خطوه خطوه واشتريت
توني باطراف البدايه
مدري وشلون
انتهيت ..؟




ياخي حس ..!!
والله عيب اللي تبيه ..
اني ارحل من حياتك ..
واشعل عيوني ب ليه .

.
.
.


لاجبينك شمس واحساسك مطر ..
لاعيونك شوق وشعورك دفا ..
جبت لك ب ايدي ..
ابتسامات العمر ..
ليه تكسرها على اطراف الشفا ..؟؟
شوف ..!!
بعثرني احتياجي بالنظر..
شوف ..!!
وجهي امتلا منك ب افا ..
ماتجي منك ..
ولكن يابشر ..
منت اول من طعني بالجفا
ابرك أدفن كل جروحي بالسهر
ولافكر من ورى قلبك شفا
ول ياقلبك ..!!
مايجيب الا القهر ..
ول ياعمرك ..!!
ماعرف طعم الوفا ..




والا انا ..!!
مثل النهر ابقى نهر..
من تحوسه ترجع تشوفه صفا ..!!
فيني والله احساس لامنه ظهر..
يشعل ضلوعك اذا قلبك طفا ..


.
.
.



هذا هو اللي تبيه ..؟!!
وهذا هو اللي قدرته ..
وقدرك ربي عليه ..




بذمتك هذا كلام ..؟؟!!
اني ارجع من جديد..
ارجع افرش كل تعب ..
عمري وانام ..




وين اروح ..؟؟؟
شلون اجيب لقلبي المجروح .
روح
هذا هو اللي تبيه ..!!

[ــــــــ]

جمرة الثلج

هي قصه حقيقيه .

.لأنسان لم يحصل على الهويه العربيه/ الجنسيه
وأكثر من تجاهل هذا الوطن..أقرب الناس له .
حكاية الظل الذي نبه اليتيم من طعنة عمه الاخيره ..
فقد تحمل هذا الولد طعنات كثيره من عمه ومن الوطن
ولكن بعد الطعنه الأخيره
رحل الى مكان لايعلم به احد وفي قلبه ثلاث اطفال ..
يقتسمون الجوع كل ليله مع ابيهم...
ولطيفه هي الانسانه الوحيده التي تراسله..
وهي من اقرباءه

.
..


.
.
هذي منك ؟
.
.
اقسى من طعنة عدوي..
اقسي والله حيل اقسى..
حيل تعبانه يدينك..
يقدح الخنجر واشمك..
هيل وجروح وأغاني..
عاد تدري.
شفت ظلك !!
ياما نبهني عليك..
كنت اكذب..
ظل وافي.
كان خارج..
من خياناتك..علي
أيه اعرفك
احضن الخنجر وأشمك
دمع وعيون واماني..
بس انا وياك والله
مو مع الطعنات ضدك !!
حتى شوف..
وش كثر أشره عليك
وانا مطعون بيديك
كان من اول تقول
وانا أطعن نفسي عنك
.
.
.
أأأأه عنك
.
.

[ــــــــ]

راح ..اروح

.
.
.

واحضن ظلالك..وأصب فيه الجروح..

ماتعودت الشموخ..

الا من اجل الشموخ..

ودنيتك فيها الفقارى وخبزة التيه..

السؤال /وأنحناء الذات/

وضحكة النفط وجوابه..

في ملذات الشيوخ.

من يوصلني.. سوى يديني..

ليديني !!..من يرجعني عليه

حتى ياخذني عليه..

وانا ماعندي

سوى هذالمغيب ..وريحة أمي

كل ما شميت

اول/اخر/أطراف الملافع/صرت اضئ..

واكتب النور../المعتق بالوفا..

وجروح جدي/ من عقيق..

صرت أنا امحي

أكتب

أمحي

وأشعل الليل العتيق..

كنت أقول الحب رمح..يخترقنا...

حتى نفقد كل توازنا ونطيح..

حتى شفت الأرض

../كل الأرض.. أنسان جريح..

وين قلبي

خفت أطيح

راح اروح...
.
.
.

يا لطيفه

كل ما الشمس

اتشرب بالسما شفة مغيبك..

انطريني..


وانا ادري

ما معاي الا الاماني/الاغاني..

وكلمتي لك انطريني

.وما معاي الا صداها...

أ

ن

ط

ر

ي

ن

ي
!!
.
.
.

يا لطيفه

ليه أضيع

هذا حنا..

موتنا..هو فينا منا..

الحسد ورثت يدينا

وان حسدنا ..ماحسدنا..

الا واحد من حدينا..

وانتي ياخذك النعاس ..وانا بعيوني سهر..!!

الحزن منا وفينا..

ومن يدينا الحزن

ياخذنا نتسول في عيون الأخرين

كل صدر طارقينه..مالقينا..

غير هم حاضنينه

الف صدر فيه دين

والف صدر فيه نار..

أول الدينار دين/واخر الدينار نار..

ليه اضيع..

وحنا والله مسلمين..

والف طفل يحضن عيون الشوراع ..

ثم يبيع..

وحنا والله مسلمين..

والاراضي اللي توقد في مسى الغرب

.. وتميع..!!

وحنا والله مسلمين..

في صلاة الجمعه بس..

حنا والله مسلمين !!

[ــــــــ]

صوت الشمس

صوت الشمس


أعوذ بالله من الشيطان الرجيم
((ثم جعلناك على شريعة من الأمرفاتبعها
ولاتتبع أهواء الذين لايعلمون انهم لن يغنو عنك من الله شيئا
وإن الظالمين بعضهم أولياء بعض والله ولي المتقين ))

صدق الله العظيم
.
.
.
.

للأسلام ولأجيال الأقصى وللشعر
حديث بين المأذنه وطفلة الأقصى
القراءه بالفصحى ولهجة طفله فلسطينيه

.

.

.


الحمدلله رب العالمين

وأشهد ان لاإله إلا الله ولي الصالحين
وأشهد ان محمد عبد ورسوله
لاتزال طائفة من أمتي
على الحق ظاهرين لعدوهم قاهرين
لايضرهم من خذلهم ولا من خالفهم
أين هم يارسول الله
قال في بيت المقدس
أما بعد
يا أهل بيت المقدس
كونو كما كنتم
رافعين لأصواتكم
حتى لاتصيبكم النجاسة من الصمت الذليل
، فأن الصمت جبان
لايحيي صمت الجبن الا نبض اصواتكم
الا نبض حجارتكم
الا نبض ايمانكم
فكيف لا وانتم ممتلؤون بكتاب الله واياته
فكيف لا وانتم جيل قرأني
فكيف لا
وانتم تكسون عورات المسلمين بأفعالكم
، انتم جيل قرأني
عروق تصعق الدنيا
وحجارة تتشكل سجيلا
ما سألتم اليل عن النور وانتم النور
ما سألتم عن السلام
وانتم النابضون باللهم انت السلام
ومنك السلام
وماتهيبتم من الموت
وانتم الصاعدون به كدعاء متدفق صاعد
، كنشيد متحرر صاعد،
الموت ف بلاد الله لاتحيا
الا من موت الاحرار،
ثورو بأسم الله الاكبر
ثورو اشلاء اشلاء اشلاء ،
اشلاء تستجمع وطنا.
نعم كونو كما كنتم
مأذنة للأقصى الطاهر،
للأطفال، للأعراض،
للأسلام، لرمح الدين،
للغيرة في دم علي،لأذان بلال،
لسيف صلاح،للرايات
قوما في صدر واحد
رمحا واحد
كدعاء في يوم الجمعه
وما ادراكم مايوم الجمعه
ان الرحمة تنزل فيها
وأدعو الله
النصر النصر
ان النصر بإذن الله ،
والله لاينصر قوما إلا بصدق النيه
والشمس
والشمس
والشمس تموت
وتحتاج دماء تبعثها حيه

.

.

.