((وداد))



في احد يحدد موعدزواجه قبل اسبوعين ؟؟

ابتسمت ندى و ردت سعاد بعد ما حطت فراس النايم في فراشه
:- فيه ولدعمك ...ولا نسيتي دوارتك في السوق مع عليا علشان تجهزوا لزواجها ؟؟

محد حاس فيني
:- بس اسبوعين ما يكفو والنتيجه ان عليا ما جهزت بالكامل ولا زالت في اغراض ناقصتها

اختفت ابتسامه ندى وشهقت وهي تقول
:- ناااااااااااااااقص !!!وشو اللي ناقص ؟؟

جلست جنبها على السرير وقلت اقلدها
:- ناااااقص .... ليكون صدقتي الكلام اللي حشيتي فيه راس عليا وان اسبوعين يكفو علشان تجهز حالها ؟؟

هزت ندى راسها
:- يعني وش تبغيني اقول لها ؟؟اكيد لازم اطمنها ...بس ما قلتي لي وش اللي ناقص

سحبت نفس قوي
:- لا تخافين كل الاساسيات شريناها بس باقي شويه اغراض تشتريها عقب الزواج

نطت سعادعلى السرير وقالت
:-اذا كذا اجل وش الي حارق رزك ؟؟

كان ودي اخنقها لولا ندى اللي جالسه في وسطنا
:- ايه مو اللي يده في المويه مو مثل اللي يده في النار ...انتوا شعليكم جهزتوا حالكم وخلصتوا الا انا اللي للحين ما شريت شي

طبعا ردت سعاد بلقافتها المعهوده
:- تستاهلين ...كل ما قلنا لك تعالي شوفي لك فستنان قلتي مو وقته ...مسويه حالك ام العروسه لازم تجهزين عليا اول والمصيبه ان ذوقك صعب ولا كنت شريت لك مثل ما شريت لندى وارتحنا

اففففففففففف كنت بمسكها من شعرها لكن وداد قالت
:- ما صار الا الخير وهذا عندك يومين تتسوقين فيهم ...وان شاء الله بتخلصين كل اغراضك

توني برد الا الباب يندق فقلت لسعاد
:- قومي شوفي من بالباب

طبعا سعاد ما تحركت من مكانها وقالت
:- هذي اكيد عليا (وصرخت ) ادخخخخخخخخخخخخخخخخخخخخخخخل

محد دخل وندى ضربت سعادعلى كتفها
:- وصمخ ....قومي شوفي من بالباب ...وعليا تلقينها اللحين تكلم صديقتها مو فاضيه لك

فتحت سعاد الباب بعدها ابتسمت وقالت
:- هلا وغلا بطلول والله... حياك تفضل

مسكها طلال من اذونها
:- طلول هاااااااااا ليه اصغير عيالك وانا ما ادري ويلا روحي صلحي لي شاهي بسرعه

طلعت سعاد من الغرفه وهي تتحلطم ودخل طلال انتبه لي وقال
:-وليه الاخت عابسه

رفعت حاجب
:- يعني ما تعرف ...اجل اطلبك علشان بروح السوق تردني ...وعلى العموم انت الخسران

قطب حواجبه وقال
:- وشو اللي خسرته ؟؟

ابتسمت بخبث
:- العنود.....ما غيرها بتجي معي السوق

ابتسم
:-كنت ناوي اوديكم بس انشغلت مع خالد وتجهيزات زواجه ...واللي اعرفه ان سلطان بيوديكم

ميلت فمي
:-بس انت تعرف سلطان كل ساعه بحال والاخ قال انه مو اكيد يودينا

ضحك
:- مو بكيفه غصب عنه بيوديكم ...ويلا روحي شوفي اختك تأخرت كل هذا تصلح شاهي

وقفت والابتسامه على وجهي
:-علينا ؟!! بلاها هالتصريفه وقول بكل بساطه انك تبي ندى لحالها

طلعت من غرفة ندى ودخلت غرفتي ادور على جوالي علشان اتصل على العنود واول ما قالت الو قلت
:- هاااااااااا بشري....سليطين بيودينا السوق ؟؟

واضح ان مزاجها رايق على الاخر
:- اول سلمي بعدين اسألي

اففففففففف احر ما عندي ابردما عندها
:- سلام ...اختصري بنروح السوق او لا ؟؟

اكيد ابتسمت
:- وعليكم السلام ....ايه بنروح وجهزي حالك كلها ربع ساعه ونكون عندك

ابتسمت لاول مره اليوم من قلب
:- لاااااا........... واخير سليطين رضى علينا ....اجل بروح اجهز حالي بسرعه

ردت العنود بصوت هامس
:- المخطط تغير مو سلطان اللي بيودينا ....ويلا اجهزي بسرعه لان تركي ما يحب الانتظار

تجمدت حواسي وما عرفت حتى افكر الى ان نبهتني العنود
:- وداااااااااااد وينك ؟؟؟اقول لك وين تبينا نروح ؟؟

للحظه كنت بقول لها خلاص ما عدت ابي السوق وروحي لحالك ...لكني تذكرت اني ما شريت شي وما معي وقت
:- ما ادري على راحتك ..ويلا خليني اجهز

انهيت المكالمه وانا اتصرف بآليه وجمود حتى ما ني عارفه انا وش نقيت من لبس او كيف خلصت وما لقيت نفسي الا في الصاله استناهم وكل اللي يدور في راسي هو متى وصل من جده ؟؟؟ ومتى لحق يعرض خدماته؟؟؟والاهم ليش يبي يودينا السوق ؟؟؟

خصه عقب اللي صار يوم ثاني لملكتنا .......كنت مصره اني ما اقابله وحاولت اقنع طلال بحجه ان ودي ازور ندى في المستشفى لكنه رفض لان زيارة تركي ما تتأجل على اساس انه بيرجع جده ....واذا على ندى بيخليني ارافق معها ..............

اذكر انه وصل وما كان في البيت غير ابوي اللي ما طول عند ندى وسعاد اللي اضطرت تجلس مع فراس...بلغني ابوي ان تركي في المجلس يستناني وطبعا ما قدرت اقول له ان ما ودي اشوف ولد اخوه او حتى اتأخر عليه............

دخلت المجلس وشفته جالس على كنبه مفرده وعلى الطاوله اللي قدامه صندوق فخم وواضح انه مغلف في محل هدايا جريت رجلي جر وقربت منه وقبل ما اجلس سلمت وبعدها جلست على اقرب كنبه علشان ما يفكر اني خايفه منه

رفع راسه بعدما سمع صوتي ورد السلام وتسند سكت فتره وبعدها رجع يطالعني بفتور وقال
:- غريبه ما لبستس عبايه ونقاب

ناظرت لبسي وندمت لحظتها لاني كنت لابسه فستان اصفر قصير لحدالركبه بقصه تحت الصدر من غير اكمام لا وكنت راسمه عيوني بكحله و........اكيد اكيد في باله اني متزينه له وقبل ما ارد و ادافع عن نفسي قال
:- مو مهم على العموم هذا الصندوق فيه شبكتك والدبل وكم غرض (قام وفتحه طلع الدبل على جنب والشبكه ولبس دبلته ورجع مكانه ولم شافني ما تحركت كمل ) لمتى بتجلسين كذا ؟؟
تحركي ولبسي الدبله والشبكه

غمضت عيني علشان ما ابكي وقلت
:- بس اللي اعرفه ان العريس هو اللي يلبس الشبكه مو العروس اللي تلبسها لحالها

بكل برود رد
:- مو لو كنتي مثل اي عروس

طعنه ما قدرت اتحملها هذا تجريج واهانه وقفت وقلت
:-ليش وش قصدك ؟؟ووش ناقصني علشان ما اكون مثل اي عروس؟؟

توني بطلع من المجلس الا تركي قام ومسكني من ذراعي ورجعني لمكاني وقال
:- اجلسي ولا تتحركين من مكانك قبل ما اقول لك ...واللي ناقصك يا بنتت عمي كثيييييييييييير واولها القبول بزواجنا ...ولانك مثلي بالتأكيد ما تبين احد يعرف اللي بينا ... اجلسي مكانك والبسي دبلتك وشبكتك

نفس الشي ما تحركت من مكاني لان الالم اللي انتابني خدر روحي وما عدت اعرف اتحرك وقف تركي واخذ الدبله ومسك يدي ولبسني الدبله ناظرت يدي ورجعت ناظرته لقيته يبتسم على جنب
:- تبيني البسك الباقي .....

فجأة دبت فيني الحياه وقلت ويدي ترجف في يده
:- لا انا اللي بلبس لحالي

ما في اي تعبير على وجهه لكنه اخذ الرموت حق المكيف وعدل درجة الحراره
:- كذا الجو تمام ولا اطفيه ؟؟

هزيت راسي بنعم وجلس هو بمكانه على المنبه وسحب جريده على الطاوله يقراها وانا تأملت الشبكه ما عارفه البسها قدامه من موجات الغضب والحيا اللي انتابتني ..بس لما شفته مركز على الجريده قررت البسه علشان مظهرنا قدام الكل

خلصت لبس وهو لازال مشغول في الجريده وبعدربع ساعه من الصمت المطبق ناظر ساعته وقال وبكل برود
:- ما بتضيفيني ؟؟

كانت بالنسبه له كلمه عاديه لكن بالنسبه لي كانت انتقاد عضيت شفايفي وبعدها قلت
:- الخير موجود قدامك واخدم نفسك بنفسك

حس اني متضايقه واني بذلت جهدعلشان ما يعلى صوتي ابتسم بسخريه
:- تعلمي تضبطين اعصابك لانك اذا استمريتي كذا بتلفتين الانظار وبتثيرين التساؤلات وهذا شي حنا في غنى عنه

مسكت اعصابي عن لا اصرخ في وجهه وقربت من الطاوله وقمت اضيفه قطعت له قطعت حلاوه وبعدها صبيت له فنجال قهوه ...شرب فنجاله و وقف
:- يلا انا ماشي وسلميلي على عمي وخالتي وطلال ....(مشى لعند الباب وقف من غير ما يناظرني طلع كرت فيه ارقامه في الرياض وكتب وراه ارقامه في جده ومده علي وقال )
خزنيهم في جوالك ...(وكأنه استدرك شي ) مو علشان شي بس علشان محد يشك لان ما في حرمه ما تعرف ارقام زوجها ...ولا تدقين علي الا للضروره

وطلع من غير ما يسلم علي او يقول مع السلامه وتفاجأت يوم ثاني انه من بعد ما طلع من عندي على طول سافر لجده

يا ترى اليوم شلون بيتصرف معاي بيطنشني مثل المره اللي فاتت ولا وجود العنود بيخليه يتصرف بشكل ثاني ؟؟؟؟؟؟


وداد اهتزازالثقه في النفس والشك في النوايا يخليها دائما تهجم على غيرها على اساس انها تدافع عن نفسها .....لكن هالمره ردفعلها مع تركي اختلف صحيح انوثتها اللي انهانت من كلام تركي ولا مبالاته كانت كفيله بانها تقتله مو بس تهجم عليه بالكلام لكن الصدمه جمدتها
.... الدافع اللي سبب لها صدمه هو الخوف ...من شنو وليش ؟؟؟؟


تركي مراعي للغير وصبور لابعد حد .....لكن هالمره كان جااااااااف وقاااااسي لابعد حد
وش اللي هيج مشاعره وخلاه جذي؟؟؟؟ او بالاصح وش اللي يخطط له ؟؟؟؟؟