ســـــــــــــــــــــارة


دخلت غرفتي وسكرت الباب وراي بقوه لدرجه حسيت انه اهتز ...لكن هالشي ما حد من غضبي احس ان ودي اكسر اي شي وكل شي قدامي مالقيت الاغراش العطر ومستحظرات التجميل حذفتهم في كل مكان وعلى اي شي قدامي ... تعبت لكني ما اكتفيت وقفت قدام المرايه وشفت كيف عيوني محمره من البكا والكحله سايحه على خدي وحول عيوني ....مظهري كا مزري حسسني اني ضعيفه وذكرني بخسارتي الليله اخذت الكره البلوريه اللي عند السرير وحذفتها على المرايه اللي من لامستها الكره تحولت الى شظايا صغيره وانهارت على ارضيه الغرفه بقايا قطع للمرايه تعكس صورتي بشكل مكرر ومزعج ...توجهت لسريري واحاث الليله تنعاد في بالي ....كنت انتظر سماع صراخ هستيري من وداد واخواتها ينبأ بوصول خبر فسخ ماجد للخطبه ....او دخول ام طلال على الحريم بشكل تراجيدي تتحسب فيه على ماجد وامي واتخيل الشوشره والكلام اللي بتتناقله الحريم فيما بينهم ...او في احسن الاحوال بالنسبه لهم دخول درامي لام طلال والحرج مرسوم على ملامحها علشان تعلن لكل انه الملكه انلغت .... لكن اللي صار انها نزلت وابتسامه غريبه على وجهها ونظرات ما عرفت افسرها وقتها في عيونها موجه لي ولامي بالذات والاغرب انها كانت مركزه على امي وهي تقول وبكل بساطه للناس
:- مسامحه يا جماعه والله ما ني عارفه وش اقول لكم ... (والتفتت لامي وفي عيونها لمعة انتصار استغربتها في وقتها ) ما ادري وش اقولك يا ام ماجد بس تركي ولد اخوك حير وداد
وما قبل يرخصها لولدك ماجد

انهت جملتها وانا احس انها ناقصه غير تامة المعنى ...احس امي استوعبت الامر اسرع مني لانها وقفت على طولها وسألت وكأنها استدركت شي انا ما استوعبته

:- وابوها وش قال ؟؟؟

قربت ام طلال لامي وقالت :- بعد ما حيرها ولد عمها قدام الرجال ما قدر ابوها يرد عليه
وحتى ابو ماجد وماجد لمن جا ما قدروا يثنون تركي عن عزمه وما رضى الا ان عقده يتم عليها الليله

لطمه ثانيه حسيتها على وجهي وقبل ما افتح فمي باي كلمه قالت امي

:- ويومكم ما تقدرون تردون ولد عمها ليه خطبتوها لولدي سنه كامله ؟؟ ليه !!ولا ما هو برجال بنظركم ؟؟ويوسف يومه ما يوقف في وجه ولد اخوه نسى اني اخته ماني بغريبه علشان يقدم ولد مشعل على اولدي !!!

امي من صدمتها ما كانت واعيه لانها تعتب على ام طلال وان حنا اللي كنا وبكل بساطه رافضين وداد لكني استغليت كلام امي وحسبته في صفنا على الاقل قدام الناس بيبان انهم غلطوا علينا ونزلوا من قدرنا وما احترمونا مو العكس فقلت علشان اغرس هالفكره في اذهان الموجودين

:-يمه الظاهر انك ما هميتي خوالي وتلاقينهم متفقين على كذا من قبل ولا تركي بجده وش جابه الليله (ورفعت حاجب وانا اناظر ام طلال ) ولا يقولون لانه يبي بنت عمه لانها كانت قدامه قبل ليه ما حيرها الا الليله ...اكيد ما سووا كذا الا علشان يهنونا قدام الناس

قربت ام خالد منا وقالت بصوت واطي واضح فيه نبره التحذير والعتب
:- ساره بسك لا تزيدين النار حطب ولا تدخلين في راس امك افكار مو صحيحه ... ترى حتى انا نفسي ما دريت عن تركي انه هنا في الرياض الا اللحين

امي تشربت الفكره ونست قلقها على وداد وموقفها من الناس قبل واحساسها قلب من انها ظالمه الى مظلومه
:- ولش تسكتين بنتي يام خالد ؟ تراها تحكي الصدق وبعد ما طردتيني من بيت اخوي جيتين انتي (اشرت على ام طلال) وبنت خالتك ودبرتوا هالسالفه مع تركي علشان تفشلونا انا وولدي قدام الناس

قربت ام طلال اكثر من امي وقالت بصوت هامس لامي والغضب يلمع في عيونها

:- لهنا وبس يام ماجد ....ولا ترمون الناس بعيوبكم

هجت وش قصدها !!! كنت برفع صوتي وبفرغ كل اللي في قلبي لكن امي اللي حست لي مسكت يدي وكأنها تمنعني من الكلام وهي محكمه قبضتها على يدي قلات بحزم

:- وش قصدك بهالكلام ؟؟؟ تهينونا وترمون بلاكم علينا !!!

ما تغيرت نظرة ام طلال وقالت بثبات
:- اقصد المرسال اللي بعثه ولدك لابوه وسط الرجال علشان يقول له انه عايف بنتي
بنية انه يفشلنا وينكس روسنا قدام الناس لولا الله رد كيده في نحره ...ولا تقولين انك وبنتك ما تدرون عن هالشي

عضيت على شفايفي يعني الغبي خرب خطتي من جميع النواحي ما دور يتراجع عن قراره الا بعد ما بعث الرجال ....اخ يالقهر فشلنا وصغرنا قدام خوالي وتاليتها جا يبغاها حليله له وبدل ما تبان منبوذه ظهرت بصوره البنت اللي يتذابحون عليها الشباب لزينها وزين تربيتها

كان ودي في هاللحظه ان امسك ماجد وتركي اللي بتصرفاتهم رفعوا من قدر وداد بدل ما يحطوا منه واخرمشهم باظافري لين يسيل الدم من وجوهم ولا شعوريا ضغت على اسناني وقبضت يدي وما وعيت للالم اللي سببه انغراس اظافري في راحة يدي وانتبهت لصوت امي تقول بصوت عالي ويرجف من الارتباك

:- خلاص انا بعد اللي صار وسويتوه في اولدي ما عادت اخل بيتكم والاخوان اللي يرضون بهدر كرامه اختهم تراهم ما ينعدون من الاخوان

احس ان امي بكلاماتها هذي تحاول تغطي حرجها بعد اللي سمعته من ام طلال وقالت هالكلام بصوت عالي علشان تنال تأييد الناس لها ....لكن قوة ام خالد وعدم رضوخها او استسلامها رغم موقفها قدام الناس اذهلني لمن قالت

:- والله بيت اخوك بيتك يا ام ماجد ...وانتي ادرى باخوانك وانك على راسهم من فوق ...وما ظنيت انك تزعلين منهم وتقبلين عليهم يتفشلون قدام الرجال اذا ردوا ولد عمها اللي محيرها
وانتي ادرى بسلوم العرب وطبايعها....الله يسامحك يا ام ماجد بدل ما تفرحين لعيال اخوانك تغضبين علينا !!!!!

انقهرت امي من رد فعل ام طلال اللي رفضت انها تنكسر قدام الناس وسحبتني من يدي وطلعت من غير ما تسلم عليهم

اتصلت امي على ابوي تبلغه انننا بنرجع البيت مع السواق وهو ما رد بغير
:- وليه ما تجلسون الى ان تنتهي الملكه ؟؟؟
ومن غير ما يستنا جواب امي قال
:- ولا اقول ردوا البيت احسن

اول ما وصلنا البيت جلست في الصاله وفتحت جوالي احاول اتصل على ماجد لكن تلفونه مغلق حاولت مره وثنتين وعشر ونفس النتيجه ...وطنشت امي اللي كانت تسألني وش قاعده اسوي

كنت في ذيك اللحظات اعيد في بالي احداث الليله بشكل متكرر لكن اللي هيجني وخلاني انفجر هو دخول ابوي وثوره الغضب مبينه في عيونه وجهه ما يبشر بالخير وصراخه علينا واتهامه لنا باننا فشلناه وقصرنا رقبته قدام الرجال ووسبه لماجد غير انه توعد فيه ...ما تعودت اشوف ابوي غاضب وهذا شي اربكني وافزعني .... خفت منه وش بيسوي فيني اذا عرف اني ورى كل هالسالفه اكيد بيذبحني ... حسيت اني لو جلست اكثر بيعرف ابوي كل شي رقيت لغرفتي وانا اغلي قهر ...كل شي قلب ضدي كل شي....



عــــــــــــــــــــــــــــــــــــــــــــــلي



في الفتره الاخيره صرت افكر في كلام امي ومزنه كثير ....هو صحيح انا مو مقتنع باللي يقولونه بس بعد ما انكر انهم خلوني انظر بتمعن لزاويه من شخصية اسيل ما كنت مدقق عليها ....اسيل فعلا اختياري ومن غير ضغوطات من حد بنت اخترتها بكل اريحيه وتحمل كل الصفات اللي اتمناها في زوجة المستقبل ...اضافه الى اني معجب فيها ما وصلت لدرجة الحب والعشق لكني ما انكر اني معجب فيها واستلطفها

كلام امي ما كان له اي وقع على لاني اعرف انها بتلاقي اي حجه وان في نظرها كل البنات ما يصلحون لي خاصه انها تبي تزوجني بوحده من الاهل ....لكن مزنه غيييييييييير اسلوبها في الكلام يجبرك ان تستمع لها وما تتركك الا وهي تاركع بصمه واثر واضح عليك

انتبهت من هالافكار ناظرت بندر وقلت له
:- رغم اني اعرف ان نص كلامهم ماله معنى ...لكنه اثر علي لدرجه اني صرت التفت لامور ما كنت مهتم لها .

بندر ومسند على الكرسي ومكتف يدينه وماد رجوله على الطاوله الصغيره اللي قدام المكتب
:- ليه هم وش قالوا لك ؟؟

تغاضيت عن سؤاله اشاره اني ما راح اجاوب عليه وقلت
:- تدري ان صرت انظر لها بنظره شبه انتقاديه؟ ...بنظره تقييميه

عقد بندر حجاته ونزل رجله عن الطاوله
:- انتقاديه !!!كيف ؟؟وتقيم وشو ؟!! ...اقصد ان هالامر المفروض يكون قبل الخطبه مو بعدها

ابتسمت ابتسامه مايله ورفعت حاجبي اليمين
:- لا تخاف ما غيرت رايي ولا صرفت نظر....لكن في امور صارت تلفت نظري بعد كلامي مع الاهل امور ما كنت منتبه لها

مسك بندر قلم حبر جاف ولعب فيه بين اصابعه وقال
:- امممم امور مثل ؟؟؟؟

سندت كوعي ( الكوع = المرفق) على الطاوله وكورت قبضتي وغطيتها باليد الثانيه واتكأت بذقني عليها
:- مثل الحديث المطول بينها وبين الدكاتره الخارج عن نطاق العمل

ما رد بندر كعادته يستنى الى ان اخلص كل اللي عندي بعدين يعلق فكملت
:- حتى مرورها على مكتبي بين فتره والثانيه علشان تسألني عن حالي ...وتواجدها اليوم معنا على نفس الطاوله في الكفتيريا ضايقني

ابتسم بندر بخبث
:- تضايقت لاني كنت معك على الطاوله ؟؟

هزيت راس انفي هالفكره من راسه
:- حتى لو كنت لحالي كنت بتضايق لان خطبتي لها ما تعني ان جلستها معي حلال خاصه اننا لسى ما تملكنا ........اففففف هذا غير الغطا في الاول كنت اشوف ان من حقها تكشف وجهه خاصه ان الوجه فيه اختلاف وعملها يتطلب كذا ...(مررت اصابعي على شعري وشبكتهم ورى رقبتي ) لكن اللحين اشوفه امر يغيضني ويقهرني المفروض انها ما تكشف وجهها على الرايح والجاي (مسحت وجهي بكف يدي ) تجيني لحظات اقرر فيها اني اروح واكلمها وأأمرها انها تغطي وجهها ...المفروض تلبس برقع مو تكشف كذا ...لكني اتراجع واقول انا ما لي حكم عليها لكن بعد الملكه يصير خير


ضحك بندر وقال
:- تبي رايي ؟(اول ما شاف عيوني اللي تطالبه بمواصلة الكلام كمل ) انا من راي اهلك اسيل ما تصلح لك ....اعتذر واصرف نظر عن هالخطبه احسن

ما عجبني كلامه ليه يبيني انسحب واتخلى عن اللي اخترتها
:- اي اصرف نظر وحنا خلاص حددنا موعد الملكه ....وليه اساسا اصرف نظر ؟؟

لا زالت البسمه على وجه بندر
:- انا ما اعرف وش قالوا لك الحريم بس اللي اعرفه عنك انك شخص عنيد واللي تبيه تصر عليه واسيل ما تقل عنك عناد واستقلاليه يعني لو كلمتها عن الغطا سواء قبل او بعد الملكه ما اضنها تقبل بالامر لانها اكيد بتتمسك بما هي عليه ... هذا غير اني اقص ذراعي من هني(واشر على كتفه ) انك ما بترتاح الا اذا خليتها تترك العمل وتجلس في البيت

هزيت راسي باستنكار
:- وش قصدك؟... اني متحجر ومتخلف علشان اخليها تجلس في البيت وتترك عملها اللي بنت عليه امال و....

قاطعني
:- اقصد انك واحد دمه حامي وغيور على اهله (اشر على راسي )... علي انت مجرد حسيتها بتصير حلالك انقلب حالك وصرت تشوف تصرفاتها من منظور ثاني ...انت كنت تنظر لها كزميل ما لك اي علاقه فيها والان تشوفها شي خاص فيك ...وهذا اللي خلاك تتضايق
...علي انت تربيتك وبيئتك ما تسمح لك انك تتقبل ان زوجتك تمتهن هالمهنه .

رفعت حاجبي اليمين وطالعته بنظره اني مو مقتنع بكلامه
:- يعني اللحين بتقنعني انك فاهمني اكثر مما انا فاهم نفسي ...وانك عرفت انها ما تناسبني وانا ما عرفت ...وثانيا وش فيها هالمهنه ولا نسيت اني طبيب

وقف بندر ورمى القلم على الطاوله
:- انت عارف انها ما تناسبك لكنك عنيد وقوف الكل ضد فكرتك خلاك تتمسك فيها .... وانا ما قلت ان المهنه فيها شي بس انت كعلي ....ما يناسبك زوجه تعمل عمل فيه اختلاط يعني حدك
ابلة في مدرسه ولا اي مؤسسه ما فيها ريحة الاختلاط

اشر علي اقوم
:- يلا انا جوعان ابي اكل ...قوم معاي بالا كسل وبعدين ارجع كمل الربورتات

طلعت معاه وحنا نمشي في الممرمتجهين للكفتيريا شفناها واقفه مع الدكتور عامر مندمجين في السوالف وفوق هذا الابتسامات شغاله ...ما دورت توقف الا مع عامر...هذا بالذات الكل في المستشفى يعرف عنه انه راعي حريم وعلاقات وانه اعوووووووووووووووووج ما تحملت وقفتها معاه اساسا وش جابه الدور الثاني وهو شغله في الطوارئ.....
اتجهت لهم وعيوني ما تشوف غيرهم حس بندر باللي ناوي عليه مسكني من يدي لكن تصميمي خلى اندفاعي اقوى من ان بندر يوقفه