((وداد))


ما ادري شلون جتني الجرأة وقلت هالكلام وليش قلته اساسا وش اللي خلاني واقفه وما تحركت من مكاني ...احس اني غلطت عليه انا بعد بدل ما اترك المكان قعدت اتساير معاه ...لكن هو كذا دايم وجوده يستفزني ويثيرني فشلون وهالموقف حاصل معاه والغريب انه اول مره ما يلقى كلام يسم بدني فيه ويغايضني ...الصراحه ما ادري لكن عيونه كان فيها شي ما ادري هم او تعب وعقب ما صرخت عليه شفت في عيونه نظره اول مره اشوفها كأنها انكسار او حزن او........ اوووووه انا ما ادري ليش شاغله بالي فيه وهو اكيد ولا على باله اللي صار .... رجعت الوم نفسي بس انا قطيت كلام قاسي ما خليت مغرور ولا صايع وقليل حيا واخلاق ... نزلت الدموع اللي كانت متجمعه في عيني كرهة نفسي اني بكيت وكرهته اكثر انه بكاني...رجعت انفض راسي من هالافكار على اخر الزمن افكر في تركي بصراحه هو يستاهل محد قال له ما يستأذن ....
تذكرت البنات حملت صينية العشا ورقيت فوق


علـــــــــيـــــــــاء


ماني مصدقه اني في طريقي للبحرين فرحانه اني بردالبحرين لدرجه ان وجود خالد جنبي مو مضايقني او حتى مزعجني لكنه طلع روحي علشان في النهايه يوافق تذكرت ذيك الليله انشغلنا بخبر ملكة العنود قمنا نصارخ من الفرحه وكل وحده تحظنها وتبارك لها وكأنه يوم ملكتهاوما لاحظنا انها جامده ولا على بالها والغريبه ان حتى وداد القريبه منها حيل ما لاحظت الظاهر ان في شي شاغل بالها ومخليها مو على بعضها...لكن نجود لاحظتها وطلعت البنيه مو عارفه شلون تعبر عن شعورها... فرحتها كانت اكبر من انها تعبر عنها ببسمه او حتى صرخت فرح وخجلها اساسا منعها من هالشي غير انها كانت مقهوره ان كل شي صار بشكل فجائي ومو بالصوره اللي كانت مخططه لها فكان التعبير الوحيد اللي فجرت عواطفها فيه انها تبكي وبحرقه وكأنها لا سمح الله فاقده حبيب

طبعا نسيت ليلتها اكلم خالد او بالاصح ما تذكرت الا بوقت متأخر فاستحيت اكلمه ...حاولت اتصل فيه يوم ثاني لكنه ولا عبرني مارد واخرتها قطع الاتصال في وجهي وعقبها بربع ساعه اتصل فيني
:-سلام ...عسى ما شر داقين علي
ما عجبتني لهجته :-وعليكم السلام ... انت قلت لي ادق عليك
حسيته ابتسم بخبث لانه قال :-والله بس اللي اذكره ان المكالمه المفروض تكون البارحه مو اليوم
اكتئبت ليكون بياخذها حجه وما بيخليني اتكلم :- بس حنا ما رجعنا البيت الا متأخر وخفت ادق عليك ازعجك
رد ببرود :- واللحين اتصالك ما ازعجني ؟
احرجني ليكون فعلا كان مشغول وانا ازعجته حاولت اتعذر
:- ما كنت ادري انك مشغول حسبت ....
قاطعني :- ما صار الا الخير وما له داعي تتعذرين وانا لمن قلت دقي علي ما حددت الوقت (سكت شوي )وهذا انا اقول لك الوقت قدامك مفتوح متى ما حبيتين دقي

ما عرفت وش ارد عليه :-زين ...ما قلت شلون عن عرس جاسم ؟
احسه كان يلعب باعصابي :- تبين تروحين ؟
جاوبت بسرعه :-اكيييييد هذا ولد خالي محمد
سأل :- لهالدرجه غالين عندك ؟
ابتسمت :- مو انت ما تعرف خالي محمد ولا خالتي ام جاسم ... تراها في حسبة امي وما عندها بنات فمو عدله البنت ما توقف مع امها في عرس اخوها
خالد باستتغراب :- اخوها؟
ابتسمت :- تقدر تقول انا متربيه بين عيال خوالي وكلهم في حسبة اخواني وخواتي
رد :-طيب علشان جدك وخالك بتروحين البحرين...وحسبة خواتي على عيني وراسي لكن حسبة اخواني انسيها
هذا وش فيه لازم يغثني بس بعد فرحتي غطت على كل شي الى ان قال
:- طبعا ما بتروحين لحالك وبما ان الكل مشغول فبتروحين معاي
لا اراديا قلت :-شنو؟!!!وابوي وطلال ؟؟؟
رد علي :- وراهم اشغال ...وعمي لمن عرف ان عندي شغل في البحرين
ترك جملته معلقه بمعنى فهميها ابوش اللي امرني مو مني لنفسي لكن احساسي كان يقول انه كان مخطط لهالشي..... انتقل تفكيري لهاجر يا ترى وش صار عليها وليش ما ترد على موبايلها فقلت ادق على بيتهم لكن تراجعت خلني افاجئها باني صرت في البحرين احسن وصلنا على باب البيت نزلت ونزل خالد وراي ينزل شنطتي فتحت باب البيت الوقت اللحين ظهر واكيد جدي في المسجد ترك خالد الشنطه على الباب من داخل وقال :-يلا ...واذا احتجتي أي شي دقي علي
دار ظهره لكني وقفته :-خالد (طالعني وفي عيونه سؤال وش تبين؟ )
اقول يعني ما بتجي تتغدى عندنا ؟
ابتسم :-لا... الجايات اكثر اخليك ترتاحين
وقفته مره ثانيه :- زين وين بتاكل وبتبات؟ و... ما بتجي تسلم على جدي؟
قرب عند الباب :-وش افهم هذا اهتمام فيني او.......؟؟
تراجعت خطوه على ورى :-هااا ابدا بس جدي اكيد بيسألني عنك
ضحك :- قولي له خالد بيمرك العصر ...وساعتها برد على كل اسئلته
مع السلامه
سكر الباب اووووووووف وانا لازم احرج نفسي وياه ما ادري ليش دائما يفسر كلامي على كيفه ياحبه لانه يحرجني
عقب ما صليت تذكرت هاجر دقيت عليها وابد ما ترد واخيرا قررت ادق على بيتهم :-سلام عليكم
رد علي صوت اظنه صوت سالم :-وعليكم السلام نعم امري اختي؟
:-هاجر موجوده
سأل :-من يبيها ؟
وش عليك انت من يبيها صدق ثقيل دم :-قولها بنت جيرانكم ابو محمد
رد بدفاشته :-هلا بالجاره هلا عليا لحظه اناديها
اوف يحسب نفسه خفيف يا ثقلك (تخرعت لاني سمعت هاجر ):- هلا
رديت :-بس هذا اللي قدرتين عليه (ما ردت فواصلت ) زين هجور انا في البحرين
ردت من غير حماس :- متى وصلتين ؟
لا هذي مو هاجر اكيد فيها شي :-هجور وش فيش ؟ ولا اقول تعالي عندي وقولي لي كل شي
ردت وكأنها بتصيح :- عليا انتي تعالي عندي ضرور ي ابي اكلمش
خوفتني نبرتها فوعدتها :-خلاص ولا يهمش على اربع بكون عندش


هــــــــــــــاجـــــــــــــــــر


ما ادري ليش مجرد ان عليا جنبي هالشي ريحني يمكن لانها الوحيده اللي تحس فيني وتعرف عني كل شي في البدايه ما عرفت وش اقول بعدين ابتديت معها من خلصت مكالمتي وياها......
:-ما وعيت لنفسي الا وانا بغرفتي في البدايه ما استوعبت وش اللي صار الظاهر اني كنت احلم لكن الالم اللي براسي واثر الضربه على جبيني قالت شي ثاني غير موبايلي اللي اختفى
استغربت عليا :- اختفى وين راح ؟ وما دريتي وش صار بين حمد وسالم عقب ؟
ابتسمت بتهكم :-قولي من خذاه(سألت بنظره من؟)سالم اخذ موبايلي وللحين ما رده اما عن اللي صار فما عرفت الا عقب يومين
فتحت عليا عيونها على وسعها :- يومين ؟!! يعني امس ...وش هالبرود معقوله ما سألتي قبل
حطيت يدي على وجهي ومسحت شعري على ورى :-ما عرفت وش اسأل ومن اسأل حاولت اسأل امي بس خفت اني اسوي فضيحه وانها ما تعرف شي اساسا بس عقبها بيومين دخلت امي غرفتي وقالت لي
:-يمه يا هاجر بكره بيجونش خطاب وجهزي نفسش
شهقت عليا :-خطاب اليوم !!! ومن هذولا ؟
ارتفعت حرارتي ودمعت عيني :- حمد يا عليا
ابتسمت عليا ودزتني :-خرعتيني وبعدين تقولين لي حمد (مسحت دموعي وضمتني ) المفروض ترقصين من الفرح مو تصيحين

صحت زود وقلت من بين شهقاتي :- مو انتي ما تعرفين وش صار
فكتني عليا :-هاجر لا تلعبين باعصابي يعني وش صار ؟

اخذت نفس علشان اهدأ وقلت :-عقب ما قالت لي امي ما صدقت انا بنفسي سمعت حمد يقول انه يحب وحده وبيخطبها فوش اللي يجبره يخطبني الا اذا سالم مسوي له شي فرحت لسالم لكنه بكل بجاحه قال لي اسألي ابوش هو اللي كلم ولد خالتش مو انا (سكت ما عرفت اواصل تذكرت شعوري بالحرج شلون اروح اسأل ابوي وش صار وليش حمد بيخطبني ) استجمعت قوتي ورحت له تدرين وش قال ؟؟؟؟

مسكت عليا يدي وقربت مني :- انا واثقه ان عمي بو عيسى تصرف صح (ابتسمت )ما اظن انه تصرف بتسرع او حتى من غير ما يسمع حمد واكيد انه اكتفى بالي قاله حمد ولا كان سألش انتي بعد

ابتسمت :-يمكن يكون توقعش للاحداث صح بس ما فكرتين اذا السالفه جذي وش اللي دفع حمد لخطبتي وعينه على وحده ثانيه ؟

طالعتني عليا بنظرة استفسار :- ما ادري ....حيرتيني

تأملت اظافري وقلت :-ابوي دخل البيت وانا مرميه عند الجدار وسالم ماسك حمد من ثيابه يهدده طبعا صرخ ابوي في سالم يترك حمد وطاعه واشر لهم يدخلون المجلس ساعتها حاول يصحيني وخذاني على غرفتي وانا بنص وعيي بعدها رد لهم سمع منهم وطلب يكلم حمد بروحه
(سكت الكلام وقف في حلقي ما قادره اتكلم )
حطت عليا يدها على كتفي ضغطت عليها تواسيني :- حبيبتي اذا ما تبين لا تقولين
حطيت يدي على فمي علشان ما اصيح :- ابوي شاف ان سالم غلطان لكن اصواتهم وصلت للجيران وهذا سوى شوشوره في الفريج (صحت من قلب طلعت كل اللي كنت كاتمته من سمعت السالفه ) وعلشان محد يقول ان السبب في هوشتهم هاجر وعلشان محد يتكلم علي (رجعت اصيح )

حظنتني عليا :-خلاص سمي بالرحمن ولا تسوين في روحش جذي واذا
كان هذا تفكير حمد فنعم الرجال اللي يفكر في شوفاته قبل ما يفكر في نفسه
عطتني كاس ماي وهي تسمي علي بالرحمن شربت شوي بعدين قلت :-
مو هو ...ابوي اللي عرضني عليه مثل أي شي يعرضونه في السوق
(كملت من بين شهقاتي )انا يا عليا يرخصني ابوي وبهالطريقه (ضربت خدي ) لا والاخ حمد رد على ابوي انه بيفكر يومين بعدين بيرد عليه

حظنتني عليا الى ان هدأت وقالت :- انا اقول قومي توضي وصلي لش ركعتين لله علشان تهدين وترتاحين (ابتسمت ) ترى اليوم بيجي حمد يخطبش وش تبينه يقول عنش جيكره

دزيتها :-يحلم انا اصلا احلى منه ومن الصايعه اللي يحبها ويحمد ربه اذا وافقت عليه

استغربت عليا بعدين ضحكت :-من جد تتكلمين ؟(هزيت راسي ايه فكملت)خلاص ولا يهمش ما دام في مجال ان توافقين او لا رفضيه
(مسكت خدودي شدتهم ) ولا تقولين ان عمي رخصش لاحد

مسحت دموعي وقفت وقلت :- مثل ما تكبر ورد بعد يومين انا بعد بخليه ينطر يومين وبعدين برده

ابتسمت عليا :-هذي هاجر اللي اعرفها بس اقول اخذي هاليومين وفكري فيهم بجديه ترى حمد مثل ما تعرفين رجال كامل والكامل الله
ما ناقصه غير هالسنه ويتخرج (حطت يدها على قلبي ) وشاوريه اذا رفض رفضي واذا وافق وافقي

ميلت فمي على جنب :-هه وش الفايده وهو يحب وحده ثانيه

ابتسمت عليا:-احساسي يقول انها مو احسن والا احلى من بنت جاسم
وان بنت جاسم اذا بغت قدرت تنسيه الدنيا كلها مو بس بنت وحده

دخلت اتوضأ طلعت لقيت عليا مجهزه جلابيه شك خفيف مخصره وقالت :-هذي انسب حاجه وتكشخي وغيضي جواهر
لبست جلالي :-ما له داعي لان جواهر مجرد تعرف ان حمد بيخطبني اكيد انفجرت من القهر وثانيا انا عندي ثياب اكشخ من جذي
غمزت :- بس هذا الوحيد المحتشم اللي يناسب الشوفه
شهقت :-نعم ومن قال ان في شوفه
ابتسمت عليا وكأنها تشمت علي :-مو يمكن يطلب يشوف الحاجيه

تذكرت اول ما رجع من السفر لمن شافني متغطيه وقال لي حاجيه رفعت المخده بحذفها على عليا لكنها جت في الباب اللي سكرته


حــــــــــمـــــــــــــــد


صعقني طلب عمي بو عيسى ما توقعت انه يعرض علي اتزوج هاجر في البدايه تحججت باني ما اشتغل فشلون اخطب لكنه قال مو مشكله اللحين خطبه واذا اشتغلت اتزوج ما عرفت وش ارد عليه فطلبت مهله يومين

في هاليومين كان كل تفكيري شلون اتزوج وحده ما اعرف عنها غير القليل من طفولتها اذكرها كانت متينه وخدودها حمر وماترضى تتمشط ولبسها دائما صبياني وكانت دائما تلعب مع الاولاد وما عندها من البنات ربع تلعب معاهم غير بنت جيرانهم .....صار لي سنين ما شفتها وتقريبا ما اعرف عنها غير انها من خلصت ثنوي قعدت في البيت .......اففففففف ما فيها شي من الي اتمناه كنت احلم ان زوجتي تكون ناعمه كلها انوثه مثقفه تحاورني تناقشني نظرتها وبسمتها تسحر وكلامها ....مو وحده مثل هاجر نظرتها كلها تحدي وكلامها سم صبياينه وعنيفه والله يستر يمكن تكون جيكره وللحين متينه حتى اخر مره شفتها ما لحقت اشوف ملامحها من كثر ما قهرني كلامها
ما قدرت ارد على عمي بو عيسى اني ما ابي بنتك وش اقول له وش عيبها... بما ان كلامها هذاك اليوم يدل على انها ما تقبلني ولا تطيقني قلت يلا انا بروح اخطبها واكيدهي بترفض وبتفكني
فقلت لامي واصريت على خطبتها بالاول عارضوا لاني ما اشتغل بس لمن اصريت وقلت انها مجرد خطبه وافقوني
وهذا انا اليوم في بيتهم عقب ما خطبها ابوي طلبت اني اشوفها طبعا سالم عارض لكن عمي بو عيسى قال انه من حقي

دخلت لقيت امي وخالتي في الصاله واشر علي سالم ادخل وحده من الغرف شكلها مجلس النساء قعدت انطرها انفتح الباب و........




انتهى البارت
في انتظار تعليقاتكم وردودكم
اعذب وارق التحايا