الجزء الثامن

((احساس))

في كثير من الاحيان نتصرف على اساس احساسنا بالاشياء واغلب الاحيان نحكم على الاشخاص نتيجه لاحساسنا وبغض النظر عن صحة احكامنا او تصرفتنا..... هل مره سألنا انفسنا هل احنا فاهمين احاسيسنا صح ؟يعني هل احنا قادرين على فهم انفسنا وبالتالي قادرين نترجم احساسنا صح ؟ مهما كانت الاجابه
يا ترى ابطالنا فاهمين انفسهم صح او لا؟؟؟؟؟؟؟


طــــــــــــــلأل


وصلت الجماعه ورجعت على البيت لقيتهم لسه ما وصلوا كنت تعبان ونعسان حدي وتوني بحط راسي وانام وتذكرت ان في اوراق مهمه لا زم اخذها من خالد علشان كذا اتصلت عليه واول ما رد علي قال
:هلا وسهلا ....
قلت له وانا ماني عارف سر مزاجه الحلو عقب السهر والتعب من مشاوير اليوم :- هلا بيك ...الا وينك فيه؟ وش سر هالانتعاش؟ترى رغم اني نمت البارحه الا اني ما ني قادر اوقف من التعب

ضحك وقال :- انا في المزرعه ...وتعال شوف الجو وانت تعرف السر

حكيت راسي من التعب ابي انام ورديت :- والله انك فارغ يوم انك ترد المزرعه ...وما دام المزاج عال وش رايك اليوم تتغدى عندي

سمعته يرد السلام على احد جنبه وبعدها قال لي :- ما اظن اقدر اجيك ليش في شي ؟

جاوبته والنعاس غالبني :- انا استناك على الغدا علشان نتناقش في المشروع اللي اوراقه في سيارتك

ردعلي وكل اللي سمعته :- تدري خليها على عشى وراح اتصل عليك قبل ما اجيك

طاح الجوال من يدي من التعب رفعته وقلت له :- صار اجل اشوفك على العشى
وسكرت قبل ما اسمع رده واستسلمت لسلطان النوم


علـــــــــــــــيـــــــــــــــاء


رحت المطبخ اجهز لسي السيد العصير وتوني بحطه في الصينيه الا ساره ماره قدامي وريحة عطرها سابقتها وطاقه اللثمه اللى تكشف اكثر مما تخبي ما ادري ليش استفزني منظرها فقلعت عبايتي وشيلتي وفتحت شعري اللي كنت لامته واضفت كاسه عصير ثانيه للصينيه وطلعت اول ما قربت لمحتها واقفه قباله وهو يبتسم لها اول ما وصلت سمعته يقول
:- صار يلا في امان الله
رفع عينه يطالعني وابتسم ابتسامه ما فهمت وش قصده منها رديت له الابتسامه وهمست وانا انزل الصينيه على الطاوله
:- سلام ،وصباح الخير
وتوني بقعد على الكرسي اللي عن يمينه بس قبل ما اقعد قرب الكرسي منه وقال
:- وعليكم السلام ،وصباح الانوار ((ومره ثانيه ابتسم نفس الابتسامه وكمل))اللحين تفضلي جلسي هنا
قعدت وانا ندمانه اني قلعت عبايتي وعلشان ما ابين ارتباكي شغلت نفسي بصب العصير ووقدمته له اخذه وقال لساره
:- مسامحه انشغلت في التلفون شوي وش كنتي تقولين
سحبت ساره الكرسي اللي قبال خالد وقالت بكل مياعه
:- سلامتك بس امي كانت تبي تكلمك
اول لف راسه لي وبعدين طالعها باستغراب
:- وينها عمتي اروح لها اللحين
قاطعته ساره :- لالا اهي قالت لي تدق عليها وبتكلمك
رفع خالد جواله وقال :- ما كنت اعرف ان عمتي عندها جوال
الا كم رقمها ؟
ضحكت ساره بمياعه خلتني التفت لها بحده وقالت
:- لا ما عندها بس كلمها على جوالي وهذا رقمه
قالت له الرقم وكلم عمته وكل اللي فهمته انها طلبت منه طلب لان رده الاخير كان :-لا تشيلين هم من عيوني ، ولا يهمك يلا في امان الله

رفع راسه لساره وقال :-يلا جهزي حالك علشان ترجعين مع البنات

واخذ كاسه العصير وشربها واما ساره قامت بعد ما عطتني ابتسامه صفره وكريهه نزلت راسي وانا اقول في بالي ((يعني لازم تلصقين فيه ))
وانتبهت على صوته يكلمني ورديت بلاهه
:-هاا
ضحك وقال :- اقول صبي لي كاس ولك بعد
اخذت الكاس من يده وصبيت له حطيت العصير قدامه وقلت
:- انا ما ابي ،توني افطرت و....
قاطعني وقال وهو يأشر على الكاس الثاني :- اجل هذا لمن ؟ابتسم على جنب وكمل لا تقولين انها لساره
ما ادري شلون فتحت فمي باستهجان وقلت :-هذا اللي ناقص عقب كل اللي سوته اضيفها بعد

سند ظهره على الكرسي وقال :- ليش هي وش سوت ؟

بلعت ريقي وقرصت عيوني فيه وقلت بحره :-المياعه والضحك ورقم تلفونها وما سوت شي (قهرتني نظرته البارده فكملت )يعني ترضاها
اوقف قدام ولد خالي جذي واتميع قدامه وارقمه بعد؟

قرب راسه مني بكل هدوء وقال :هه وش هذا غيره ولا؟؟؟؟
(ما رديت عليه قرب راسه مني اكثر )على العموم انتي سويها وذبحك بيكون على يدي فاهمتني يا بنت عمي؟

بلعت ريقي حسيت بخوف من نظرته وكأنه يعني كل حرف قاله هزيت راسي باشاره نعم
رجع سند ظهره وحط يده تحت ذقنه وقال :- نجي للمهم (طلع من جيبه موبايلي القديم حاس فيه وكمل)نصي الثاني اتصل فيك( ضغط على زر المايك وقال) كلميه

اخذت التلفون توني بمد يدي ارجعه لوضع الهاتف مسك يدي وطالعني بنضره تهديد وقال بهدوء يناقض الثوره اللي في عيونه وقال باصرار
:-كلميه على المايك ولا خايفه ؟

سحبت يدي من تحت يده فركتها وقبل ما ارد عليه جاني صوت هاجر تعاتب:- واخيرا ما بغيتي ...صار لي ساعه ادق عليش وانتي ما تردين
..ايه اكيد خلودي لحس مخش ونساش عمرش و هجور الحلوه
المهم ما قلتين بصراحه شلون شكله ومواصفاته هالخالد؟؟

ارتبكت ما عرفت ارد لكن خالد كان اسرع مني لغى المايك وحط الموبايل على اذني رديت على هاجر وانا اتجاهل سؤالها الاخير :-ابدا كنت نايمه وما سمعت التلفون ...الا انتي قولي ليش ما اتصلتين فيني البارحه ؟

ردت بكل بساطه :- بعد فيها اسباب؟موبايلي ما فيه رصيد عبيته اليوم وقلت اتصل ابارك وقبل ما انسى مبروووووووووووووووووووووووك

طالعته ورديت :-الله يبارك فيش حبيبتي
وقبل ما اسكر سجلي عندش رقمي الجديد (وانتبهت اني ما اعرف الرقم فقلت لخالد )كم رقمي؟

ضحك وفتح موبايله على رقمي اخذته ولقنته هاجر اللي علقت على وبعدها سكرت التلفون

مديت يدي بالموبايل لخالد وقلت له :-شكرا انقذتني من الاحراج (اخذ الموبايل وما تكلم وصرت اتكلم من غير هدف بس علشان اسيطر على
اعصابي المتوتره ) لانها كانت ما بترحمني من تعليقاتها و....


زهقني صوت موبايلي الجديد يرن وقبل ما اشوف من المتصل رفعه خالد وقال
:- عرفنا نصي الثاني وصدقنا ...لكن لهيب الروح ؟؟؟؟؟؟؟؟
شلون وليش؟

ارتبكت وما عرفت ارد وكالمعتاد ما لقيت غير اطراف شعري العب فيهم :-ابدا ........ اصلا...(اخيرا قدرت اجمع افكاري وقلت )انت مو قلت ما نحسس احد بالي بينا ؟

ابتسم على جنب :- بس ما قلنا نتصنع الحب

صدمني كلامه فرديت :- ابدا ...بس كل البنات تسوي جذي وانا سويت جذي علشان محد يشك

طالعني بنظره انه مو مقتنع وصعقني لمن قال :- طيب ولولا الناس تحت أي مسمى بتحفظين رقمي ؟

اكيد قلب الصقيع بس طبعا ما اقدر اقوله جذي قدامه فكذبت :- عادي
كنت بخليه خالد مثل ما كان
ناداني بصوت هادي ورخيم وكانه صادر من شخص ثاني:- عليا

طالعته التقت عيني بعينه حاولت اعرف وش تقول عيونه او وش اللي يدور براسه وياريت اعرف شلون يفكر انتبهت ان عيونه حلوه واسعه ومكحله برموشها ولونها عسلي صافي و لكنه قطع حبل افكاري ولحظة الاستكشاف لمن سأل السؤال اللي ما تمنيت يسأله
:- عليا من اللي اتصل فيك ؟ وليش طلب منك تهربين؟و

الحمد لله جت نجود وكانت حامله في يدها عباتي وشيلتي عطتني اياهم وقالت لخالد :-يلا ترى كلنا جاهزات(ولوت بوزها على صوب ) صدق ساره بتجي معنا

رد عليها خالد:- ايه مو انتم اللى قلتم لعمتى تبون ساره معكم

فتحت نجود عيونها على وسعها وقالت بتهور :- حنا ما عزمنا على احد يجي معنا واساسا حنل متفقات ننزل كلنا بيت عمي

رد خالد بحده :- طول عمرك ما تحبين بنت عمتك ليش ما اعرف (تأفف وهز راسه علامه لا ) على العموم انا بنزلكم بعدين بوصلها بيتهم ويلا اغراضكم في السيارة ولا لسه

ابتسمت نجود ومسكت يد خالد في يدها وباليد الثانيه سحبتني وقالت
:- مو بس الاغراض الا حتى البنات في السياره (التفتت لي )يلا انا باسبقكم

تركتني وركضت وما عرفت اركض وراها فخففت سرعتي وصرت امشي وراه وقف فجأة ورفعت راسي قبل ما اصدم في ظهره التفت لي واعطاني موبايلي القديم :- هذا جوالك ورجع لك
اخذته وقلبته في يدي:-ابوي عنده رقمي الجديد؟(طالعني بنظرة استفهام ما فهم وش دخله بالموضوع فوضحت ) ابوي ابو محمد عنده الرقم ؟

رد وهو مو فاهم :- امس عطيته الرقم علشان يدق عليك متى ما حب

ابتسمت مديت يدي بالموبايل وقلت :- خلاص عجل ماله داعي يكفيني هالموبايل (ورفعت الموبايل الجديد)

رد :- على راحتك بس بعد خليه عندك يمكن تحتاجين منه ارقام او...(ولمعت عيونه ) تردين على مسجات ما رديتي عليها مثل
شلون خالد حلو لو جيكر ...(ابتسم بمكر ) صحيح ما قلتي خالد حلو لو جيكر؟؟

احرجني شؤاله وحسيت ان حرارتي ارتفعت اغلقت موبايلي القديم ورميته باهمال في الشنطه وحمدت ربي اننا وصلنا للسياره لا حظت ان في كرسي فاضي ورى والثاني جنب السائق فتحت الباب بركب ورى صرخت على العنود
:- وين رايحه هذا مكان ساره ؟
رديت ببلاهه :-هاااا عجل انا وين اقعد ؟
ضحكت العنود على تعابير وجهي وقالت وهي ترقص حواجبها :-وين بعد ؟ اكيد جنب زوجك

توني بناقشها الا بصوت خالد :- يلا نبي نوصل قبل اذان الظهر مشينا

ردت العنود :-لسه ناقصين وحده
التفت للعنود ولي واقفه عند الباب :- من الناقصه ؟ نجود؟
هالمره ردت نجود :- لا انا هنا ناقصنا ساره

طالعني مره ثانيه والتفت على الكراسي ورى وقال:-يلا تحركن وحده تجلس قدام ترى ما ني بسواقكم

ردت العنود :- لا تخاف هذي علياء بتجلس حذاك (واشرت على الكرسي جنبها ) عندي سالفه مع ساره

طالعت نجود برجا وقبل ما اتكلم قالت نجود :- هذي ساره جت يلا يا علياء لا تأخرينا

قربت ساره وشافت ترتيبنا والقت على نظره قاسيه وحقوده
قهرتني فبادلتها بنظره لا مباليه وفتحت الباب وجلست جنب خالد

المشوار غلب عليه طابع الهدء والاحاديث الجانبيه الهامسه بين نجود وسعاد وبين العنود وساره بينما ندى كانت هادئه وكانها نايمه
وانا كنت العب باصابعي من الملل وبين لحظه والثانيه ارفع عيني اتأمل ملامح خالد وكل مره يكون انطباعي مختلف
( ليش يسأل عن المتصل ؟ يبي يعرف لانه مهتم ؟ ..ولا لانه يبي يأكد شكوكه تجاه سلوكي واخلاقي ؟؟ واذا عرف بيصدقني ؟ واذا صدقني هل بتتحسن صورته عني ولا بيقول البنت مثل امها ؟ ما ادري اقول له ؟
لا ما اقول احسن لانه ما بيصدق وساعتها بيحتقرني وبيقول اني استغل امي علشان اغطي على افعالي .....واذا صدقني بيشفق علي وانا ما ابيه يشفق علي انا ابيه يحترمني و........)
قفلت على افكاري ورجعت اتأمله تذكرت كلامه خالد حلو ولا جيكر؟
ابتسمت في نفسي خالد حلو مستحيل احد يقول عن صاحب هالملامح والتقاطيع جيكر...واساسا من اللي تطال واحد مثله صبور حنون
متواضع محترم و مهيوب وتقول عنه كلمه شينه ؟!!! .....وعيت لنفسي( علياء !!وش فيش ليكون انجنيتي ؟ تقولين عن اللي اهانش هالكلام ... واحذري لا تدورين له اعذار ) صحتني من افكاري
نجود تقول
:- ملينا خلودي ما عندك شي نسمعه ؟
رد عليها :- اصغر عيالك يا نجيد تقولين خلودي ؟
ابتسمت نجود ورمشت بعيونها بكل برائه :- افااااااااا يا ذا العلم ....ادللك ولا ما تبيني ادللك

ابتسم من ورى النظارات وقال :- خليت الدلال لك واذا تبين ما في اغاني واظن في سي دي قصايد هنا( واشر على مكانها)

ردت نجود :- امرنا لله قصايد قصايد ...علياء حبيبتي شوفيه وينه فيه

فتحت الدرج اللي قدامي شفت مغلف عليه شعار جامعه البحرين استغربت مديت يدي عليه وانتبه لي خالد وقال
:- تلقين السي دي تحت الظرف
رفعت الظرف وطلعت السي دي تلقائيا فتحته وشغلته واول قصيده كانت
اه يالجراح


لا جيت أنا بــ سامحك..
تبكي الجراح ما ودها..
مشتاق ودي أصافحك..
عيت يدي لا مدها...
آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك ..
آه يا الجراح .. راح اللي راح..
وراحتي .. من يا ترى بيردها ..
لا تحاكي عيوني .. يمطر سحاب الملح ..
ولا تلمس أشجوني .. ينبت في قلبي جرح ..
ناظرني يا خلي .. جرح انا كلي ..
وشلون أبـ ارضى الصلح ..
فصل الخريف حبي ..حزن وورق أصفر..
...ودعني يا قلبي..وخل العذاب أقصر..
آه يا الجراح .. راح اللي راح..
وراحتي .. من يا ترى بيردها ....


حسيتها تقصدني وان خالد يقول لي انه خلاص ما في امل انه في يوم يفهمني ... وان الصوره اللى رسمها عني في راسه مستحيل تتغير او ينساها...جرحني هالشعور...مهما يكون شعوري تجاهه ما احب انه يشوفني اقل من ..... من ويش يا علياء اقل مما يشوف ساره او اقل من خواته وخواتش او اقل مما تحبين انه يشوفش ؟؟؟ ومره ثانيه قفلت على الافكار اللي توديني لمكان ما احب اوصل له مكان فيه اسئله غريبه ومن غير اجوبه ....اساسا يكفي غرابه تصرفاته اللي تشغل تفكيري مره يعاملني ببرود ومره بحنا غريب