العنــــــــــــود

كنت ابي اتكلم مع وداد لحالنا علشان كذا قلت لعلياء:-علياء ما تبين تسلمين على امي وتتعرفين عليها؟؟

هزت راسها اشارة نعم وقلت لها :-اجل يلا تعالي معنا

دخلنا مجلس النساء وبدخولنا عم السكوت وقفت عند الباب وأشرت على امي وقلت لعلياء : هذي امي ام خالد ((وناظرت امي وكملت)) هذي علياء يمه

ما ادري ليش ما طلعت جلست ابي اشوف لقاء امي مع علياء شلون بيكون تقدمت علياء من امي سلمت عليها ونزلت باست راسهاوقالت لها

:-شخبارش خالتي؟
امي ردت عليها بشبه ابتسامه:-هلا يمه انا الحمد لله ...انتي كيفك؟
واشرت عليها تجلس بينها وبين خالتي ام طلال واستغربت ان امي جلستها هناك ياترى وش ناوين عليه انتي وخالتي وطبعا لاني كنت تايه في افكاري ما سمعت ردها ولا حتى سلام وداد على امي وانتبهت على وداد تمسك يدي وتقول تعالي ابغاكي في سالفه ورحت معها الغرفه اللي بنبات فيها وجلسنا على السرير متقابلين وقلت لها

:- هاتي اللي عنك اطربيني اشجيني

قالت لي وداد عن وصول علياء وشلون كان الاستقبال وسألتها
:-طيب انتي كيف تشوفينها؟ صحيح مثل امها ولااااااااا

ردت وداد وعلامات الحيره بوجهها:- ما ادري انا احس من كلامهم وكلام ندى عن نجاة انها غير بس بعد ندى تقول ان نجاة في البدايه كانت وش زينها وبعدين قلبت ...((طالعت السقف كأن اللي بتقوله موجود هناك)) تدرين في البدايه كنت منفعله وكنت انظر لها على اساس انها بتخرب العلاقه اللي بين ساره وخالد بس ارد اقول انها ماتعرف عن حبهم لبعض اذا اساسا محد يعرف ان خالد يحب سارة الا انا وانت وطلال
((ناظرتني والحيره في عيونها )) تدرين ان هالبنت تحير... انا كنت مستعده اكرهها بس لمن شفتها انتابتني احاسيس غير والغريب ان الكره مو منها

سألتها وانا تقريبا مو فاهمتها:- طيب والباقي شلون تحسينهم

ردت علي :- البنت فعلا تحير وما ادري هل احنا فكرتنا عنها غلط ولا مثل ما تقول ندى ياما تحت السواهي دواهي((ضحكت وكانها تذكرت شي وقالت )) فيصل يشوف انها حلوه وتشبهني وشعرها مثل سعاد والاهم انها ما تشبه ندى إلا في الطول لذلك قرر انها تنحب ويقول انها اذا طلعت حنونه مثل طلال راح يصادقها

ضحكت وقلت :-اذا هي كذا خلاص اجل كلنا بنصادقها....طيب و.......

قبل ما اكمل قالت :-وش فيك سكتي قولي وطلال((وجهة لي ابتسامه
خبيثه وكملت ))اللي بتصادقينها علشان تشبه له... تدرين انه يقول انه يبي يجلس معاها ويتكلم معاها ويقول مهما كانت هي اختي (( عضت على شفايفها )) هو الوحيد اللي فكر فيها كأخت

حطيت يدي على قلبي وقلت بطريقه دراميه:- آآآآآآآآآآآآآآآآآآه فديت الحنون انا

ضحكت ودادوضربتني على فخذي وقالت :-تتفدينه قدامي وهو بعده ما ملك عليك

فركت مكان ضربتها :-وجع يوجع عدوينك...عورتيني(( وكملت وانا احط المخده في حضني))وسعاد وندى

نامت على ظهرها على السرير بالعرض وقالت:- ندى موقفها انها ماتحبها وانها تتحامل على نفسها علشان ابوي وهذا شي مبين في عيونها تعرفين ندى عيونها مرايه لقلبها ((انقلبت على جنبها علشان تقابلني )) وسعاد كان كل خوفها ان علياء تاخذ مكانها في قلب ابوي او ان وجود علياء بيخفف من حب ودلال ابوي لها بس اول ما جلست مع ابوي وعرفت ان مكانها بقلبه باقي ما تغير قررت ان علياء حليفتها

استغربت وعقدت حواجبي :-كيف يعني حليفتها وضد من؟؟؟

ابتسمت وداد:- ضد ساره ... تعرفين ان نجود وسعاد ما يحبون ساره خاصه انها دائما تعاملهم على اساس انها احسن منهم وانهم بزران
ولانهم مثل الكل يعرفون ان ساره تبي خالد

كملت لاني فهمت الامر :-هم يشوفون ان زواج خالد من علياء ضربه لساره ومثل ما تقول نجود أي وحده إلا ساره ... علشان جذي علياء حليفتهم

ردت وداد:- عليكي نور((تأملتني وواضح انها متردده تقول او لا)) العنود ...... خالد وش قال عنها و..........وش قال عن ساره

قلت لها :- يمكن تستغربين لو قلت لك ان خالد ما عاد جاب سيره ساره
نجود واخواني مو هامنهم هالشي لانهم ما يعرفون انه يحب ساره اما امي فمرتاحه انه ما يجيب سيرتها بالنسبه لها هذا معناه ان كلامه عن خطبته لساره كان شي عادي واحد وحاب يخطب وشاف ان بنت عمته اولى من غيرها((سندت ظهري على السرير وكملت)) ويمكن تستغربين اكثر لو قلت لك اني مرتاحه انه ماعاد سأل عنها او جاب سيرتها

ناظرتني باستغراب وقالت بلهجة استنكار:- مرتاحه!!!!!!!!!!!!!!

رديت :- ايه مرتاحه ما ادري يمكن لانها تغيرت في الفتره الاخيرة واحسها ماعادت تحبه مثل اول و.....ما عادت تناسبه

وداد ونظرة تساؤل كبيره في عيونها:- ما عادت تحبه مثل اول وفهمتها لكن ما تناسبه؟...((وكانها استدركت الامر)) قصدك على صديقاتها الجدد
لااااااااا انا ما اعتقد ان تأثيرهم وصل لابعد من اللبس ((ابتسمت على جنب وقالت)) وعلياء ياحكيمه زمانك هي اللي تناسبه؟

قلت لها وانا اتنهد :- يمكن ليش لا ((رفعت حاجب وابتسمت )) احنا مانعرفها علشان نحكم لكن تدرين اختك فعلا محيره وغريبه

وداد وعلى وجهها علامات الحيره:-ما فهمتك؟

ابتسامه واسعة غطت وجهي:-تدرين ان خالد ما تكام عنها من رجع من البحرين رغم انه شافها هناك

جلست وداد دليل على الاهتمام :- وش عرفك انه شافها

رديت بنفس الابتسامه:-سألته عنها وقال بغضب لا تسألوني عنها كفايه اللي شفته والقهر ان ولد عمك عنده ولا كأن شي صار

ميلت وداد راسها على صوب واشرت بيدها بمعنى ما فهمت فواصلت
:-اكيد صار له موقف معاها وهالموقف ((ضحكت)) اثار غضب خالد المتروى المتأني الحليم يعني علياء لها تأثير على خالد

وداد بدهشه:- صحيح من الصعب ان خالد يظهر غضبه لانه يسيطر على مشاعره لكن دامه غضب منها هالكثر معناه مسويه شي كايد

هزيت راسي اشارة لا:- لا لا لا لانها لو مسويه كذا كان طلال ذبحها بس الوضع كان بالعكس خالد ثاير وطلال بارد((ومسكت ذقن وداد )) وهذامعناه يا حلوه ان علياء لها سلطه على مشاعر خالد ((وابتسمت ))
يا حبي له خلودي اول مره اشوفه كذا حايس من غير كنترول على اعصابه


واستمر الحديث الى ان اذن الظهرصلينا ونزلنا نشوف الباقين

علـــــــــــــــــيـــــــــــــــــاء

اول ما أشرت لي خالتي ام خالد اني اقعد معهم ووييييييييييين بينها وبين خالتي ام طلال حسيت مثل المتهم اللي ينطر حكم المحكمه عليه
هو صدق انهم ما سووا لي شي لكن العيون تتكلم وعيونهم تقول اني دخيله وان وجودي بينهم غلط.... في البدايه ام خالد وام طلال يسولفون على بعض ولا كأني وياهم وندى مشغوله او تتشاغل بولدها فارس تحاول تنيمه وعقب شوي تحول حديثهم لترتيبات الملكه ساعتها التفتت لي ام خالد وسألتني
:- ما فلتي لي يا بنيتي من من اهلك بيحضر الملكه؟

رديت عليها وانا ابلع ريقي :- خوالي ونسوانهم يعني ثلاث حريم

الكل انظاره اتجهة لي لكن ام خالدرفعت حواجبها وقالت باندهاش:- بس؟؟ ((سكتت شوي كأنها متردده تسأل او لا)) طيب وامك؟

الكل كان يترقب الاجابه وانا احترت وش اقول...... اقول ان امي من يوم ما خبرها جدي وهي حتى تلفون ما دقت علي ولا اقول انها تكرهكم ومستحيل تجي عندكم لكني قلت بكل هدوء
:- بس ...لان بناتهم مسافرات... وامي ما بتحضر

سمعت تنهيدة ارتياح من ام طلال ولمحت ابتسامه ما عرفت ام خالد تخفيها عدل والغريبه مفعول هالجمله على ندى اللي قالت بحماس وكأنها فعلا مهتمه
:- علياء ما قلتيلي وش بتلبسين لبكره؟

رفعت راسي لها وقلت :- فستان ((توني بوصفه لها لكن قلت)) حياش تعالي شوفيه وقولي لي رايش

ابتسمت واشرت على فارس اللي نام في حضنها:-ما اقدر اقوم اللحين بس الليله ان شاء الله اشوفه مع البنات((وقالت بشي من الكبر))واذا طلع ما يناسب بعطيك فستاني لانك نفس مقاسي والباقيات مقاسهم يختلف

حسيت انها تلمح ان ذوقي مو حلو وكنت برد عليها بس مسكت روحي وقبل ما ارد قالت ام طلال وهي تحاول تعدل لبنتها
:- والله اذا طلع فخم واجد تروح السوق مع طلال عندها الصبحيه بكبرها

ابتسمت لها :- لا ياخالتي ما في داعي فستاني مناسب

على طول ام خالد ردت:- كان ودي بحفله كبيره بس ابوك وعمك الله يهداهم كانوا مستعجلين وما امدانا نسوي شي

حسيت انها بكلامها تحاول تعتذر عن بساطة الملكه وخاصه ان ام طلال قالت :- ولا يهمك يام خالد معوضه في العرس((وحطت يدها على كتفي))
هو صحيح الملكه عائليه وصغيره بس عقب اسبوعين بنسوي حفله بمناسبه ردت علياء لاهلها وبنعزم فيها الجيران والمعارف

حسيت بغصه وش قد غريبه هالناس يراعون مشاعري ويعتذرون لمجرد
اعتقادهم ان مشاعري انجرحت رغم اني حاسه إلا متأكده اني مفروضه عليهم ....... يمكن يسوون جذي من باب حسن الضيافه بس انا مو ضيفه بتقعد ايام وتروح انا بقعد وياهم باقي عمري....او يمكن من محبه ام طلال لابوي ومحبة ام خالد لعمي ولدها...يصير ليش لا مو يقولون لجل عين تكرم مدن....ما ادري ليش حسيت اني لازم ارد عليهم فقلت

:-انا اساسا اشتريته فستان لحفله بسيطه لاني متعوده ان الملكه تكون عائليه يعني اللي يلبسون فخم هذولا اللي يسوون حفله عقب الملكه وكنت من جد بتوهق لو كنتوا مسوين حفله كبيره

ردت ندى:- زين اجل اننا استعجلنا وما سويناها مثل ملكتي ((اتوقع ان امها عطتها نظره وعيد لانها خففت من حده لهجتها وكملت)) على العموم حفلة استقبالك قريبه... صحيح اني ما بقدر انزل معك السوق لكن وداد وسعاد ما بيقصرون خاصة انهم لسى ما شروا لهم لبس

قالت ام خالد تعقيبا لكلام ندى:- الله يعينك على فرة السوق معهم تكسر الظهر ((وابتسمت لي )) وكل شي بكفه وسعاد ونجود بكفه ما يعجبهم العجب

ام طلال بشبه ضحكه على كلام ام خالد:- ما عليك يا علياء هم صدق ما يعجبهم شي بس بتستانسين معهم ((وتميل لي وهي تقول )) ولاتطيعين شورهم لانك اذا طعتيهم ما بتاخذين شي.....

ضحكت ندى وقالت:-ما عليك من امي وخالتي ذوق سعاد ونجود ما عليه بس مادام وداد والعنود معك اخذي برايهم ترى ذوقهم احلى

فرحت ان ندى فكت شوي وانها تكلمت من غير ما يكون ورى كلامها عدة معاني بس في هاللحظة دخلوا نجود وسعاد اللي سمعت كلام ندى
:-وشو ؟ لا حبيبتي ترى ما في((تأشر على نفسها ونجود))احلى من ذوقنا ((وتلتفت لي)) العصريه بنقضيها في المسبح تجين معنا ؟؟

قبل ما ارد قالت ندى:-وطي حسك ما صدقت الولد نام ...وعلياء ما بتجي معكم بعدين لكلور يأثر على لون بشرتها وعقب الملكه سووا اللي تبونه

نجود اللي هم ما نطرت ردي قالت:-ترى السمار موضه...تعالي علياء ولا يهمك
ضحكت وقلت لها:-موضه او لا ما بجي وياكم لاني ما اعرف اسبح

ومع مرور الوقت حسيت اني بديت اتعود على الاجواء صارت قطات ندى اخف وسعاد ونجود ما بطلوا مزح اما ام خالد وام طلال كانوا بس يسكتون في بناتهم ويقارنون كيف كانوا هم قبل وبناتهم اللحين اذن وقمنا للصلاه ونزلوا وداد والعنود اللي كانوا مختفيات وندى راحت المطبخ علشان تأكل فارس وما يزعجها على السفره وقت الغدا وعقب ربع ساعه تقريبا جت ندى من المطبخ من غير فارس وقالت

:-يا بنات تغطوا الشباب بيدخلون يسلمون

تغطوا البنات وكلهم لابسين جلال ومغطين وجهم بطرفه إلا انا لبست عبايه وبرقع لان وداد نست جلالها فوق فقلت لها تاخذ جلالي خاصه اني برتاح في العبايه اكثر......دخلوا الشباب وكانوا تركي وطلال وواحد ما اعرفه بعدين فيصل ودخل في الاخير خالد وهو شايل فارس على ذراعه
سلموا وقعدوا في زاويه بعيده عنا جنب ام خالد وام طلال الشخص الي ما عرفته قال لتركي ومرفع صوته قاصد اننا نسمعه

:- يقولون راسك يعورك... لكن ما ينلام غيرك وانا اخوك احد يركب بزان معه من الصبح

نجود اللي ما تحملت ردت بصوت عالي :-ما البزر إلا انت ياسليطين

وقبل ما تكمل كلامها قاطعها صوت خالد وهو يقول بنبرة تأنيب وتأديب
:- نجود لا يعلى صوتك و احترمي اخوك

نجود بأعتراض ووطت صوتها:- بس هو..........

قاطعها خالد بنضره قويه ووتكلم ببطء مقصود :- نجوووووووووود !!!

سكتت نجود وتكلم تركي يبي يخفف على نجود فقال :- الصراحه نجود اليوم تفوقت على نفسها جهزت من وقت ولا لطعتني كالمعتاد وكانت هادئه في السياره بس ((وعلى صوته كأنه بيوصل هالكلام لشخص معين)) عيبهم انهم بدل ما يقولون كلمة شكر يتهموني بالغرور ورفعه الخشم .....

هنا سمعت وداد كوني قاعده جنبها تهمس للعنود :- مو قلت لك اخوك مغرور وغثيث ((وتضغط على ضروسها)) واللي يقهر انه يحسب نفسه خفيف دم ...
العنود ترد على وداد :- هييييييييييييه شوي شوي على اخوي ترى هذا ثقه بالنفس مو غرور واخوي خفيف دم .. يكفي انه يعرف شلون يحرق دمك......فديييييييييته المزيون بالله مو ازين من ماجد

وداد ضربت العنود في جنبها وقالت :-صدق القرد في عين اخته غزال
الله يالثقه ... سكتي بس لا تخليني اغلط عليه

العنود :- ما ادري ليش انت ما تحبينه ... ولا غيره لانه اقرب لماجد منك

وداد تأشر على نفسها :- انا اغأر منه؟؟؟؟؟؟؟؟؟؟؟

رن موبايلي رفعته ولمن شفت المتصل ما حبيت ارد قدام الجماعه فرحت المطبخ اول ما ضغت على زر الرد حسيت ان في خطوات متجهه صوبي

..........

ما ادري وش اللي خلاني اروح وراها

بس كان لازم انبهها


ما حست فيني ولمن التفتت لي تفاجأت بالدموع في عينها

من هالشخص؟
وينبهها من شنو؟
وش اللي خلاها تصيح؟

اتمنى ان هالبارت ينال اعجابكم
واشوف تفاعلكم معاي
لان الوضع محبط الصراحه وانا قررت ان اذا ما في تفاعل خلاص اوقف القصه وما اكملها

اهديكم اعذب وارق التحايا