انصدمت من الي قاله مايد .. صج انه قالها بـ ببراءة .. بس كان هذا الكلام بـ يحدد كلام قلبيّ ..

طالعني جاسم جنه يباا يشوف ردة فعلي .. بس انا نزلت راسي ..

رد جاسم و هو يلعب بـ شعر مايد ..


..::][ الحلقة الثاني و العشرون .. الفصل الأول ][::..

مايد : بابا .. ثوف ماما أتتني هلاوة .. انا احبها .. انت تحبها بابا ؟؟

انصدمت من الي قاله مايد .. صج انه قالها بـ ببراءة .. بس كان هذا الكلام بـ يحدد كلام قلبيّ ..

طالعني جاسم جنه يباا يشوف ردة فعلي .. بس انا نزلت راسي ..

رد جاسم و هو يلعب بـ شعر مايد ..

جاسم : انت ليش تحب الماما ؟؟
مايد : لانها تأتيني هلاااااوة
جاسم : بس !!
مايد : و بأد هممممممممم " خلى صبعه في بوزه " لانها الماما ..
أبتسـم له : ايه انا احبها لانها اختيه ..
مايد : لا هذه أمك ..
جاسم : امبلى أختيه .. في حد في الدنيا ما يحب أخته ..
مايد : بس الماما تحبك ..

غمضت عيني .. آه ع المصيبة .. شو قال ميود .. جاسم يعتبرني اخته .. بس انا زوجته يا ناس .. شكلي الوحيدة في هذا العالم الي مصدقة اني زوجته .. فتحت عيني بـ هدوء و طالعت جاسم وسط الدموع شوي عرفت اميز ملامح ويهه .. ما كان منصدم .. الا كانت جامدة و عادية ..

جاسم : الماما قالت لك ..؟!
مايد : ايه ..

فجيت عيني لأني ابد ما تكلمت معاه في مثل هذا .. خلاص خدي احترق من الدموع الي بدت تطيح ..

جاسم : شو قالت ؟؟

بس بس يا جاسم لا تسأله .. خلااااااص ..

مايد : انت لما ثرخت عليها امث ثاحت ..

طالعني بعدين رد طالع مايد ..

مايد : قالت لي ان انا اهبه بث هو ما يهبني .. و ...

سكت شوي لانه كان يطالعني بعدها اشر عليّ ..

مايد : ثوفها ماما تثيح ..

طالعني جاسم ..

وقفت و ركضت الغرفة .. و دموعي مثل السيل ع خدي ..

فتحت باب الغرفة و رميت روحي ع السرير .. ضميت المخدة لـ صدري و اطلقت لـ دموعي العناااان ..

انفتح الباب و أنصك ..

جاسم : شو فيج ؟؟

نشيت عن السرير .. مشيت دموعي بـ كف يدي .. و همست ..

ليلى : ماشي ..

يلس يمي ع السرير ..

جاسم : ماشي !!!!!! و منين هذه الدموع .. كل هذا ع الي قاله ميود ..

طالعت الجهة الثانية .. صح كلامه .. سبب موب مقنع اني أصيـح ..

همسـت : آسفة .. ما كان قصدي ..

الحركة الي يات منه .. و جن ماي انصب ع ويهي .. زخ ايدي و همس ..

جاسم : انتي تحبيني ليلى ؟؟

مر أسبــوع عليّ و لـ الحينه ذكري هـ اللحظة في عقلي .. أتذكره لما قال لي " تحبيني ليلى ؟؟ "

شلون همسه منه هزت كل مشاعري .. صوته عيونه .. خلت دمعتيّ غصب تطيح ..

جاسم : تحبيني .. ؟؟
ليلى : ليش عندك شك !!

توقعته بـ يرد عليّ انه يحبني .. بس كلماته خلتني أصيح بـ صوت مفجوووع ..

جاسم : تدرين اني اعتبرج اختيه .. تزوجتج و قلبي موب معاي .. تدرين صح ؟؟؟ " عص ع ايدي " انتي تدرين اني أحب هيفاء و تحت الحاح أمي و اخوها بعدين طلقتها .. و انتي رغم كل هذا قبلتين تتزوجيني ..

رديت عليه و انا اشهق من البجي ..!

ليلى : عيل طلقني .. ما اباا اعيش معاك ..
رد منصدم : مينونة انتي .. و مايد تبين تفرطين في ولدج ..
ليلى : مايد موب ولـــدي و انــت تدري ..
صرخ عليّ : بس ليلى .. لو شو يصير ما بـ اطلقج ..
ليلى : حرام عليــــــــــك يا جاسم .. ما بـ تطلقني علشان تعيشني في عذاب .. " رديت أصيح "

سكت شوي .. نزل راسه بعدها طالعني ..

جاسم : اذا كنتين تحبيني ضلي .. ليلى لا تصيرين ياهل .. ادري بج عاقلة ..

طالعت الجهة الثانية ادخل هـ الكلام في مخي .. محد قال اني اباا أتطلق .. بس بدون شعور قلتها له ..

جاسم : ليلى ..

مسحت دموعي بـ كف ايدي ..

ليلى : نــ ـ ـعــ ـ ـم
جاسم : مشكورة ليلى ..

طالعته و بـ التحديد عيونه .. الي من تلاقت موب مثل كل مرة تتنافر ..

ليلى : ليش ؟؟
أخذ نفس : ربيتين مايد و هو موب ولدج .. مايد ولدي و انتي ما مانعتين تربينه .. عاملتينه شرات لو كان ولدج .. هملتج و انتي ما نطقتين الا تميتي ساكتة ..
ليلى : جاسم لا تقول جيه .. انت قبل ما تصير زوجي .. انت ولد خالتيه ..
أبتـسـم : عيل نـشـي ..
عقدت حواجبي : وين ؟؟
جاسم : من متى ما طلعتين من البيت .. قومي لبسي مايد و لبسي و انا بـ اخلص شغلي و بـ ارد لكم ..
ابتسمت موب مصدقة : من صجك جاسم ..
جاسم : ايه .. عيل اجذب ..

آآه لو احد كان يمي قلت له يقرصني .. ابا اتأكد كل هذا حلم لو واقع .. شلون طلعت معاه .. لعبنا ميود و رحنا مطعم تعشينا و الجو كان أحلى جو عشته من أخذت جاسـم ..

.....

" فارس "
[ بيتنا .. 3:00 العـصـر ]

( بـعد أسبــوع )

طالعت عيون .. كانت يالسة قبال التسريحة .. تحط لها ميك آب .. توها من يومين شوي بدت تخلي الأسـود .. بس الحينه شلون اقول لها ترد بيت أهلها لأني اليوم مسافر أودي شوق و ميثا .. و هي أصلاً حتى ما تعرف بـ سالفة اخواني .. و لا تدري ان عندي أخوات و حتى الي دعم مريم هو أخويه .. قطع عليّ تفكيري صوتها ..

عيون : فارس .. حبيبي شو فيك موب ع بعضك ..

نشيت عن السرير و يلست عدالها ..

همست : ما بي شـي ..!!
أبتـسـمت : تصدق فارس .. باجي بس شهرين و أولد .. بـ تصير أبو و انا أصير أُم ..

أكتفيت بـ ابتسامة .. عقدت حواجبها و زخت أيدي ..

عيون : حبيبي لا تخبي عليّ انت مريض .. فيك شي ..!!
فارس : ما بي شي .. لا تخافين ..
عيون : شو ما أخاف و انا أشوفك بـ هذه الحالة ..
فارس : انزين عيون " أخذت نفس " حبيبتي قومي شلي أغراضج ..
عيون : ليش ؟؟
فارس : بـ اوديج بيت أهلج .. عندي شغل لـ الشركة بـ اسافر و اذا رديت آخذج ..
عيون : تخليني و انا حامل ..
فارس : فهميني عيون الشغل مهم و ما يتحمل تأجيل ..

نزلت راسها و يلست تلاعب اصابع ايدي ..

عيون : حتى أهم منيّ ..

رفعت راسها ..

فارس : هو في شي في الدنيا أهم منج ..

أبتسمت لي .. وقفت .. و نزلت بـ صعوبة بـ تطلع الشنطة .. نزلت بسرعة و طلعتها ..

فارس : لا تعبين روحج ..
عيون : ليش شو فيها .. ما صارت شنطة ..
فارس : تحملين شنطة و انتي حامل و انا موجود أطالعج ..

ابتسمت و طلعت ثيابها و خلتهن في الشنطة .. ما توقعت انها ترضـى بسرعة جيه ..
طلعت من الغرفة .. و طلعت تلفوني .. اتصلت ع زياد ..

زياد : هلا فارس ..
فارس : شلونك زياد ؟؟
زياد : الحمدلله بخير .. انت شلونك ؟
فارس : بخير .. شوق و ميثا زاهبين ..
زياد : ايه زاهبين ..
فارس : قول لهن اني الحينه ياي لهن ..
زياد : ان شاء الله ..
فارس : الحينه أخليك ..
زياد : اوكيه .. مع السلامة ..
فارس : الله يسلمك ..

صكيته .. و احس ان عاصفة ياية في الطريج .. الله يستر ..