ياسـود الايـام لاهنتـي ومشكـوره
عزالله انـه وصلنـي منـك ماكفانـي

الهم فـي كـل ليلـه يحفـر قبـوره
والغـم مثلـه بعـد ماقصـر الثانـي

وعامين ماقلـل الغربـال بحضـوره
هاذي مواريه فـيّ اشكـال والوانـي

اسج واضحك واجامل ناس مسـروره
وانا علي الحـرام الحـزن يغشانـي

والبارحه غيـر والخفـاق وشعـوره
اقسى من الدمع في عين اصغر اخواني

الليله اللـي مـن الاحبـاب مذعـوره
تطعـن سكاكينهـا قلبـي وشريانـي

فيها انتهى حلم شامخ وانهـدم سـوره
وفيها بـدت قصـة الايـام حرمانـي

( مظلم سماها)(قمرها غايـبٍ نـوره)
فيها من الضيق مالا يوصـف لسانـي

والصبر لازاد عن حده وعن طـوره
علّه ولاني بناقـص ضيـم واحزانـي

ياقبلـة العمـر منهـيـه ومـأمـوره
يامن سكنتـي بعينـي قبـل وجدانـي

يـأم القصايد يابيت الشعـر يابحـوره
لايابعد مـن قـرا شعـري وقيفانـي

امّا كتبتـك قريتـك داخـل سطـوره
وامّا سكنتك لقيتـك داخـل اوطانـي

انا ادري انك حزينـة بـال مكسـوره
في ذمتي ماحصل لك غيـر ماجانـي

مالي مشاريه فـي فرقـاك معـذوره
وانا بعـد شرهـت الفرقـاا تعدانـي

عيّا علينا الزمن من ظلمـه وجـوره
ومـن قبـل عيوبنـا نـاسٍ تحدانـي

والحين روحـي فمـان الله ماجـوره
وحسبي على اللي عن مواصلك يحداني

واليا ذكرتي غرامٍ طاحـت قصـوره
ادعي على كـل عدوانـك وعدوانـي

والدمعه اللي علـى الخديـن منثـوره
لاعـاد تبكينهـا تكفيـن مـن شانـي

لكن قولـي لذيـك السـود مشكـوره
عزالله انـه وصلنـي منـك ماكفانـي