( اليوم الوطني بين الاحتفاليه واشاعة الفوضى )
.
.

شعبنا الحبيب كـ العاده يفرح بـ اي مناسبه وطنيه
لكن الاغلبيه للاسف مايجيدون فن الإحتفال بـ ادب
اليوم كنت فـ احد المولات فالخبر بـ اخذلي كم شغله ولفت نظري
هسترة بناتنا اللي عاصبه راسها بشريطه خضراء واللي حاطه
شال اخضر واللي ملونه اظافرها بالاخضر حسيت اني داخله مزرعه
موب مول ماشاء الله محتفلات من بدري ذابحتهم الوطنيه
.... ماهو عيب نحتفل بـ اليوم الوطني لـ بلدنا لكن
العيب اننا نستغل كل مناسبه وطنيه عشان نفل ابوها ع حساب خلق الله
ي خي احتفل بس ليه الهمجيه والإندفاع لـ درجة انك تقعد تكسر وتخرب والا تضايق
العالم لا واللي يزيد الطين بله هـ البنات صاروا بايعينها بشكل غير طبيعي
وشو له جايه رازه عمرك وملونه نفسك وش الفايده يعني !!!
والله العظيم العآم شايفه وحده ملونه نفسها بشكل غير طبيعي لـ درجة اني شكيت انها ضفدع
وش هـ الوقت اللي عندك يوم تصبغين نفسك وتصبغين خواتك الصغار وتجين تستعرضين
اللي يقهر لو تجي تسال وحده تقول اليوم الوطني كم يوافق ..! قالت هاااا مدري
طيب ياعزيزتي يومك ماتعرفين ومسويه فيها البنت الوطنيه ومع الخيل ي شقراء
الزمي بيتك ابرك لك ولا اهلك هذي هي الوطنيه الحقيقيه انك ماتساعدين
الشباب ع التمادي واحفظ لك انتي اولآ واخيرآ !!

المفروض قبل اليوم الوطني تخصص ملاعب الكوره للإحتفال ويكون فيه تنظيم
بين مؤسسات الدوله وترتيب كرنفالات خاصه بذا اليوم
عشان الشباب يفرغون طاقتهم فالملاعب بدال مايفرغونها فـ الشوارع
ونفتك حنا يالعوايل من هجولتهم فالشوارع والمولات
والله ملينا من السيناريو اللي كل عام يتكرر ( عطله + هجوله + فوضى
والحاق ضرر بالبلاد والعباد !! )

( الوطنيه اكبر من مجرد لون نتوشحه ّ او اغنيه نتمايل عليها )

بس مدري متى راح نشوف شبابنا اكثر نضج واكثر وعي !!!


ما اقول الا الله يحفظ بلدنا من كيد الكائدين وعبث العابثين
ويصلح حالنا جميعآ ..


ودآآآم عـزك ي وطن