اللى مربتش ابنها كده تعرف أنها مربتش راجل وهيفضل طول عمره عيل يطلع روحها لحد ما تموت وهتاخد دعوات عليها بالعبيط من مراته بالمستقبل.
حملوهم المسئولية
عايزه ابنك (او بنتك طبعا ) يتحمل المسئولية ويطلع جامد كدة ويعتمد عليه ؟
بصي معايا كده وخلي بالك من الكلام اللي جاي ده كويس اوي
*ابنك دخل الكي جي بطلي تعامليه علي انه بيبي ايوة هو مش كبير بس برضه مش بيبي 👣👣وطلع من حضنك ودخل مدرسه وبقي يقضي فترات بعيد عن عينيكي يبقي لازم يتأقلم ويتعود انه يتصرف لوحده
(بقول دخل الكي جي فاكيد لو دخل الابتدائي بقي راجل ولو دخل الاعدادي انتي الوحيده في الكون اللي مش شايفه الشنب😏 اللي طلع في وشه)
*ابنك مسئول عن تحضير شنطته🎒🎒 من اول يوم له في الدراسه (تحت اشرافك طبعا ) الاول حضرتك هتمسكي الشنطه وتطلبي منه يحط فيها ادواته بترتيب محدد مكان الكتب والكراسات مكان الاقلام مكان للانش بوكس وهكذا وبعد شويه لما يحفظ هتسبيه يحضرها لوحده وحضرتك هتممي عليها بعد ما يخلص ترتيبها وقبل ما ينزل المدرسه الكلام ده ينطبق علي شنطه التمرين وشنطه الدرس وشنطته وانتي رايحه المصيف
(عارفه ناس بتحضر لولادها في الجامعه هدومها وكشاكيل المحاضرات وتصحيها تروح محاضراتها وامتحانتها ولو مصحتهاش البيبيهات اللي في الكليه مبيروحوش😱😱😱)
*ابن حضرتك يلبس هدومه لوحده وحضرتك بس تظبطي اللبس وتتاكدي ان الزراير مقفوله صح بعد ما يخلص 👕👔👟(تممي علي الزراير والسوست ورباط الشوز كويس بلاش فضايح )
*ممنووووووع منعا باتا انك تمشي جنب ابنك شايلاله الشنطه وهو ماشي يجري ويتنطط جنبك
هو يشيل شنطته الشنطه تقيله يرتب جدوله لسه تقيله تطلعي الانش بوكس الزمزميه وتشيليها وهو يشيل شنطته 💪💪(انتي مش عم عبده البواب وبلا ش تديله احساس الفلبينيه هو هيحسها كده كده لما تلبسي مريله المطبخ اصبري )
*ممنووووووع متعا باتا تشيلي لعبه وترتبيها بعد ما يخلص لعب هو يشيلها يكركبها ويحطها في المكان المخصص ليه وابقي رتبيها انتي بعد ما ينام لو الشكل مش عاجبك🐴🐰👯 (ابقي ارمي اللعب المتكسره اول باول كلها صيني ومش هتتصلح تاني وصدقيني هتوفرك 3/4 المساحه في بوكس اللعب😂😂 )
*مفيش حاجه اسمها طفل عنده 10سنوات ومعندوش مهمات منزليه لازم يعملها بنفسه حتي لو عندك 10خدامين بينضفولك ولازم المهام دي يعملها من غير انتي ما تفكريه او تطلبي منه يعني مثلا هو مسئول عن انه يودي الملابس للمكوا يبقي لازم يوديها في ميعاد ثابت وهو اللي يفتكر ميعادها مش انتي ودايما لو نسي تكرري قدامه كلمه دي مسئوليتك وانت لازم تعملها لوحدك(ممكن تكلفيه يديكي دوا الضغط والمراره 💊💊💉في ميعادهم انتي كده كده بتنسي تاخديهم مش فارقه )
*بعد الاكل كل واحد بيشيل طبقه اللي اكل فيه وينضفه 🍛🍛ويحطه في الحوض ممكن تنضفيله الطبق لغايه 8سنين بعد كده كتشييييييييييير نظام ابني عنده 10سنين وباكله علشان مبيخلصشي طبقه ده فكك منه مبياكلشي عيش (طبعا لو مش هتقدري علي جوزك يشيل طبقه لان مامته ربته زي ما انتي بتربي ابنك حاليا 😷😷ابقي شيلي انتي الطبق من غير اي مناقشات قدام الولاد تهدلك كل اللي بتعمليه )
*طبعا انه يرتب اوضته ومكتبه وكتبه وينضف الشوز بتاعه👟👢 دي حاجات اساسيه (واول لما يوصل لسن مناسبه انه يكوي هدومه توفري فلوس المكوجي فورااااااااا)
*لو مكان سكنك قريب من سوبر ماركت او سوق والدنيا امان 🏪🏪انك تنزليه يبقي لازم تعوديه ينزل يشتري طلبات البيت وتديله الفلوس وتعوديه يتعامل بيها ازاي ويحسب ازاي وتحاسبيه علي الباقي (بلاش تتعاملي في اكتر من عشرين جنيه الباقي غالبا مبيرجعشي😢😢 فيبقي الجرح مقدور عليه )
*ممنوووووع منعا باتا انه ياخد مقابل او هديه قصاد اي مهمه من مسئولياته🎁🎁 علشان عملها في ميعادها او عملها صح بس يتعاقب لو معملهاش
(ده مش افترا لا سمح الله ده تربيه او توفير زي ما تحبوا تسموها😉😉 )
*اشركيه في اتخاذ بعض القرارات وخصوصا المتعلقه بيه بس دايما عرفيه ان رايه استشاري لانك فاهمه اكتر منه💪💪 لو رايه مناسب وضحي له قد ايه انتي مبسوطه من طريقه تفكيره ولو مخدتيش برايه فهميه ليه ووضحي له الاسباب بطريقه مقنعه (لو معرفتيش تقنعيه راجعي قرارك ممكن يكون هو اللي صح مش عيب خاااالص😉)
*مش عيب اني اقول لابني الفلوس اللي معايا متكفيش اشتريلك كذا او اجل طلباتك شويه لغايه ما الفلوس تتوفر معايا لا هيشيل الهم ولا هيتعقد لو طلباته اتاخرت او حتي متنفذتشي ولا هيحس بالنقص لان (الانش بوكس) بتاعه 2بارتيشن وبتاع صاحبه تلاته🎃👻
(ده اسمه (دلع مرئ ) اه والله ملوش اسم تاني)
*اوعي تدخلي معاركه بالنيابه عنه (ايوه معاركه اقصد الكلمه بمعناها الحرفي) سيبيه يواجه المواقف اللي علي قد سنه بنفسه حتي لو اتصرف غلط مش عيب وبعدين وجهيه للي غلط،فيه والتصرف المناسب اللي المفروض كان يعمله (بلاش تبقي كبيره كده وتتخانقي مع ولد عنده خمس سنين❌❌ لانه اتخانق مع ابنك شكلك بيبقي وحش اووووووووووي علي فكرة )
*اوووووعي ثم اوووووعي تعوديه انه كل لما يحصله مشكله يتصل بحضرتك📱📱 وانتي تجري علي هناك حتي لو قلمه الرصاص وقع تحت الديسك 📝📝ومش لاقيه اعتبري ان الموبيلات لسه مخترعوهاش (لما حاجته تضيع احسن ما شخصيته اللي تضيع ولما يعرف انك مش متوفره اربعه وعشرين ساعه هيحاول يفكر بحاجه ربنا خلقهاله اسمها مخه ويتصرف واحتمال كبير يتصرف احسن منك )
*علميه شجاعه الاعتذار🙏🙏🙏 ومممنووووووع منعا باتا انك تعتذري بالنيابه عنه مينفعشي هو يضرب صاحبه وانتي تقولي انا آسفه انتي مضربتهوش علشان تتآسفي لازم يتحمل عواقب افعاله ولو غلط والمفروض يتعاقب اوعي تتوسطي له علشان يفلت من العقاب انتي بتساعديه في موقف وبتهدي تربيته😠😠 (لازم يشوفك بتعتذري لما تغلطي عادي علشان يتعلمها علي فكره )
*ربنا يكرمك بقي حاجه خاصه بالاولاد علي جنب كرري دايما عليه كلمه انت راجل ومسئول عني وعن اخواتك البنات- لو له اخوات بنات- حتي لو هو الصغير 🚻🚻🚻🚻
عاتبيه وبشده لو ساب اخته تنزل لوحدها بالليل وهو قاعد قدام التليفزيون💻💻 فهميه ان الرجوله مش انه يعلي صوته لكن الرجوله انه يحطك انتي واخواته في عنيه هتاخدي علي الموضوع ده دعا يكفي بلد من واحده غلبانه بنت ناس هتقع فيه لما يكبر كده ويبقي عريس قدامك..........قولي انشاالله )
+العيب مش في ولادنا العيب فينا احنا اللي بنغلط كل يوم في تربيتهم وبعدين نعيب عليهم سلوك احنا السبب فيه 👍👍
+البوست ده للامهات اللي بتحب ولادهااااا اووووووووووي ونفسها يطلعوا محترمين ومهذبين وولاد ناس بجد وده اهم عندهم من بيلبسوا ايه وياكلوا ايه وبيجيبوا كام في الامتحانات يعني الامهات بتاعه( انت نوتي يا دودو) يعتبروا نفسهم مشافوش البوست ده
+الكلام ده مع انه يبان في قسوة وشده في التربيه لكن باطنه الرحمه