مشكلة تقليل الزوج من الزوجة
من الاستشارات, بس المرة دى المشكلة زوجية:
س: زوجى مثقف و تعليمه متميز و له منصب علمى مرموق و تخصص دقيق, و انا كمان متعلمة تعليم عالى و مش جاهلة و حاسة انى كويسة
المشكلة انه كتير بيقلل منى و يسخر منى و يحسسنى انى جاهلة
حاولت اتعلم و اقرأ اكتر لكن ده مرهق جدا, و حاسة انى بدأت افقد الثقة فى نفسى
ج:
يا عزيزتى, انتى مش مضطرة ابدااااا تحاولى تقرأى او تتعلمى اى حاجة إلا فى حالة واحدة بس: ان انتى تكونى مهتمة بالموضوع ده و عايزة تعرفيه او تتعلميه
انما انك تضغطى على نفسك و تقرأى فى تخصص علمى دقيق ممكن يكون صعب او ممل بالنسبة لك, لمجرد انك تحاولى تجاريه و تقنعيه انك مش جاهلة ده اكبر غلط
المشكلة مش فى كونك جاهلة بتخصصه العلمى الدقيق, لأن كلنا كده
هو اكيد جاهل بتخصصات تانية, و انا جاهلة تماما فى ميكانيكا الكم, و الأستاذة اللى ورا جاهلة بعلم النبات, و الآنسة اللى معانا جاهلة بعلم الاجتماع.... و كل ده لا ينتقص من اى حد فينا اى شىء على الإطلاااااق
المشكلة مش مشكلة جهل
المشكلة فعلا مشكلة ثقة زى ما قلتى
بس هى مش يادوب بدأت بعد ما هو سخر منك, هى موجودة من زمان
زوجك حسّ ان تنقصك الثقة فى نفسك, و قرر يلعب على الحتة دى, و يضايقك بكلام المفروض انه مايضايقش اى حد ولا ينتقص من قدر اى حد
و ماقدرش اقول اذا كان ده :
- بسبب مشكلة فى طباعه هو زى الإحساس بالنقص و محاولة تعويضه بالتقليل من شأن الآخرين...
- ولا بسبب انه متضايق منك من حاجة مأثرة فيه اوى و لم يجد إلا الطريقة السخيفة دى عشان يحاول ياخد حقه و يضايقك بالمثل
دى انتى اللى تقدرى تعرفيها
حاولى أولا تراجعى أسلوب حياتك معاه, و تشوفى اذا كنتى مضايقاه فى حاجة, و اعتذرى عنها و غيّريها... هتلاقى المشكلة دى اختفت
و لو المشكلة عنده هو أمامك حل من 2: إما انك تتجاهلى تماما كلامه, بل بالعكس تحسسيه انك واثقة فى نفسك و ان ده لا ينتقص منك اى شىء, أو انك تتكلمى معاه بوضوح ان كلامه بيضايقك و يجرحك و انك مش مستعدة تستمعى للكلام ده تانى
رد مع اقتباس
المفضلات