تبي تصير سعودي عليك بالتالي

[الأميره]

عشان تصير سعودي لابد يكون معك ايفون أو بلاك بيري وفيس بوك وماسنجر وشات وبالتوك وبرامج أخرى سيئه للمحادثات مابي أذكرها خايفه البعض يعرفون أسمائها ويحملونها وأكون أنا الي دليتهم عليها من خلال موضوعي ...

عشان تصير سعودي لازم تحط التوبيك انك تحب ومجروح حتى لو انك ماتحب وتمدح نفسك بالتوبيك حقك مثل سلطان زمانه وعزتي خلت غيري يروح ملح وأنا اللي مامثلي أحد أبد,أسماء مملكةٍ في غير موضعها .. كالهرِ يحكي انتفاخاً صولة الأسدِ

تبي تكون سعودي ضروري تعرف كل شي بالكوره والأغاني والتقنيه والتكنلوجيا والبر والبحر والجو وتعرف معلومات عن شعوب العالم وطقوسهم ( بتاع كله )
والمشكله ليتها هالثقافه على سنع طبعاً كل هذا عشان ماتقول ماأعرف إذا سألك أحد ..

تبي تكون سعودي حط في بالك قناعة إن لم تكن معي فأنت ضدي يعني اللي يخالفك يطلع مايفهم شي ومايدري وين الله حاطه

تبي تطلع سعودي؟! أي شي يطلع بالسعوديه نستغله استغلال سيئ
مدري ليش بعض الشباب السعودي يسب البنات إذا ماعطوه وجه !!
وبنفس الوقت يروح ويدور عليهن ..

بعض البنات لازم تلقاها مجروحه لأنه تعرفت على واحد خاين وماقدرها ومدري ايش .. ومدام كذا تلاقيها خلاص حطت براسها قناعة أن كل رجال السعوديه مو محترمين وخوانين وكذابين ..يعني ماعندها شي اسمه إنصاف ..

تبي تصير سعودي لازم تكون سيئ الظن بالدرجه الأولى يعني أول ماتشوف واحد يمشي مع زوجته بسيارته وتحس أنهم كاشخين على طول تقول أها أكيد هذي خويته ولما تشوف بنت بالسوق حاطه برقع أها أكيد هذي مو شريفه أكيد إنها جايه تبي تقابل ولما تشوف واحد يسلم عليك وهو مايعرفك تقول بقلبك وش يبي هذا مسوي يعرفني يوم أنه يسلم علي ونسينا ( السلام على من تعرف ومن لاتعرف ).. اااه بس ياكثرهم اللي يسيئون الظن وإذا ناقشته قالك وش عرفك أنت ؟ أنا أعرف هالاشكال ذولي فيهم وفيهم !؟!؟

تبي تصير سعودي لازم تتظاهر بالمثاليه بمعنى أنك تكون أحسن واحد ،، أنا اللي أطبخ وأكنس وأساعد أمي وأنا اللي آخذ خواتي للسوق وأنا اللي أخوياي مايعيشون بدوني من خفة دمي و و وهو من جنبها تلاقي خواته ماعمرهم شافوا خشة أخوهم يا نايم أو مع الشباب ، خواته مايشوفونه إلا إذا يبي منهن سلف خاصه إذا له أخت موظفه ..

تبي تصير سعودي لازم تعلم بكل ذنوبك يعني كيف !
أنا أقولك كيف ؟ أول ماتشوف أخوياك وتشوف أن المجلس مليان من ربعك تقولهم فاتكم البارح رقمت وحده خقق ولما كنت بالدولة الفلانية كنت أشرب و و إلخ..
ربي ستر عليك وأنت عجزت تستر على نفسك ..تبي تصير سعودي لازم تكذب بحاجتين مهمات ؟ تدري ايش.....!!

سالفة لما يمسكونك الهيئه وسالفة لما تمسكك الدوريات
سالفة الهيئه هم اللي فيهم وفيهم كنت أمشي بالسوق ومعي أمي ومسكوني وقالو لي حنا شايفينك تغازل وظلموني ,طبعا هذي سالفته لكن ما لانعلمه إن الهيئه ماسكينه هو واثنين من اخوياه وفعلن كان يرقم ومسكوه وعطوه تعهد ويمكن انهم قرصوا أذنه وقالوا له توكل
أما سالفة الدوريات عشان تصير سعودي لازم يطلع الشرطي غلطان وإذا رحت لأخوياك قلت لهم إنك هزأت الشرطي وسفّلت فيه واعتذر لك قدام الضابط و و ..

وما لانعلمه هو انك حاولت تصير واسطه قدام الشرطي وسكّتك قدام الشعب ونفخت عليه وركبك بسيارة الدوريه ويمكن بعد حط بك ( الكلبش )

عشان تصير سعودي لازم تشرب معسل ودخان وكل من قال لك اتركه قلت بلوى وانت أصلن بكاااش لو تبي تتركه تركته على طول بس قاعد تلعب على نفسك

تبي تصير سعودي لازم انك تكابر وماتعترف بالخطأ في أي نقاش حتى لو كنت داخل قلبك مقتنع ان الحق مو معك لازم تكابر وتقول لخصمك لا مو صحيح و ( بس ولو )
السالفه السعودية اللي ماراح تنتهي بين الذكر والأنثى ..
أم الركب السود وأبو فنيله وسروال ..
أستغرب من بعض الشباب مايستانس إلا إذا جلس يسب في بنات بلده وأول مايبدا يقول ركبها سود ؟؟
يعني بالله أنت تبي تصور مع ركبتها ؟؟
والا لو صارت ركبتها بيضا وش تبي تفرق يعني ؟
يبي يحطون صورة ركبة زوجتك جنب صورة كشتك ببطاقة العايله مثلاً ؟
ويمكن بعد لازم يكتبون فوق صورة الركبه هذي ركبة الزوجه ,لأنهم يمكن ماراح يفرقون بين كشتك الشينه وبين ركبة المدام !!
هذي المشكلة شين وقوي عين ..
وجهه فلم مرعب وهو جاي يتكلم عن الركب ..
ووبعض البنات مدري وش قصتها على أبو سروال وفنيله
وكل ماصار نقااش جابت هالسالفه .. وأنتم يالشباب فشلتونا
وفيكم وفيكم .. ياحلو الأجنبي اللي لابس بدله ..
يعني خلاص هذي مشكلتك الوحيدة بالحياة ؟؟ أن الشباب السعودي يلبسون سراويل وفنايل .. خلاص ولايهمك خلي شروطك إذا جيتي تتزوجين أن اللي يتقدم لك يكون لابس بدله .. وشوفي وش يقول عنه ولي أمرك ..
وأنا مو ضد لبس البدلات .. ولكن كل شي بوقته حلو ..

الشي الوحيد اللي يثير استغرابي عند بعض البنات الله يهديهم أنها تشجع نادي كوره ..

وحاطه صورة لاعبها وناديها المفضل .. يعني قسم بالله أحيانا أجلس أتخيل شلة البنات مثلا بالمدرسه وجالسه وحده تقول لخوياتها فاتكم المباراة أمس جاك المهاجم حطها ذيك الحطه ويجيبها بزاوية ضيقه وتدخل قووول والحارس جاه شد عضلي من قوة النطه بس ماقدر على الكوره .. وربي مخي عيا يستوعب أنه فيه بنات يتكلمون كذا .. يعني معقوله تبي تجلس تفصل كيفية القول كيف صار .. وإذا هذا مو كلامها ليش تدخل نفسها بشي مو لها ولاتعرف تفاصيله ..
أو فقط شافت خوياتها يشجعون وقالت يلا معاكم ..

بنظري أغلب البنات اللي تشجع كوره .. إنما هو مجامله لصديقاتها مو تشجيع حقيقي .. وإذا هو حقيقي فهذي المصيبه بصراحه .. والمصيبه الأكبر لما تكون متزوجه ولها عيال وتشجع بعد .. والله إني أكتب وللحين مو مستوعبه .. بنت وتموت بالكورة ولون الشريط العلاقي حق البلاك بيري اللي معها نفس لون ناديها المفضل .. والخلفيه بجوالها مهاجمها المفضل .. والتوقيع حقها بالمنتدى صورة العلم حق ناديها .. بالله وش بقيتي للشباب أجل .؟؟
ولو أحد الشباب تكلم عن المطبخ وهو شي يعتبر عادي قالت وش عرفك أنت .. هذي شغلات حريم وهذي لنا مو لكم يالشباب ..

أغلب الشعب السعودي .. إذا تناقشت معاه غالبا يكون مشغول بتجهيز الرد اللي يسكتك فيه ..
يعني مستحيل يصير نقاش مفيد .. مافي أمل يبحث معك عن حلول .. أو رأي آخر .. أو حتى يقبل رأيك

أغلب مرتادي الأنترنت السعوديين أول مايقرا أي موضوع في أي منتدى ومايعجبه الموضوع على طول يروح يشوف من الكاتب ويدخل على معلوماته وميلاده ومن وين بمعنى ( شخصنة الموضوع ) ويجلس يحط على شخصية الكاتب وانا أصلن من شفت اسمك ( فوق النظام ) وأنا غاسل يدي ومن هالكلام ويترك صلب الموضوع ..

بالأخير تبي تصير سعودي يتوجب عليك أنك وأنت تقرا كلامي هذا تدور فيه الأخطاء والزلات وتتصيدها وتمسكها علي عشان ترد علي وتهاوشني وتغمض عينك على كل الشي الإيجابي بكلامي وتفتح العين اللي فقط تلتقط كل سلبي وحتى الأخطاء الإملائيه يمكن تحاسبني عليها مع أنهم كانوا يدفونك المدرسين بدرجات الإملاء ..
أخوتي وأخواتي .. كلامي أعلاه مو بالضروره يكون صح لكني متأكده أنكم شفتوا نوعيات من اللي ذكرت وأنا ماأقصد الشعب السعودي كله بالعكس فيه أشخاص قمة وقدوة
ومحشومين عن كل شي قلته هنا والله يكثر من أمثالهم ولايهونون البنات الطيبات العاقلات
فكم من بنت عن ألف رجل والله يبارك بالجميع

وهذا بعض مما عندي
وليس بالضرورة ما أكتبه يعكس حياتي الشخصية

[الحقيقة بصمت]

دلوووووووووووووووعه أنتي أيش فيك صاحيه على الجنب السعودي مشاء الله عليك منزله مواضيع لا تخلو من العيب السعودي

[الأميره]

شـكــ وبارك الله فيك ـــرا لك ... لك مني أجمل تحية .

[الأميره]

وين الشباب

[00.00.01]

لاتعليق

[خيالي]

أغلب الشعب السعودي .. إذا تناقشت معاه غالبا يكون مشغول بتجهيز الرد اللي يسكتك فيه ..
يعني مستحيل يصير نقاش مفيد .. مافي أمل يبحث معك عن حلول .. أو رأي آخر .. أو حتى يقبل رأيك

الله المستعان
شي يضحك

[غالية الاثمان]

وباقي الدول شبابها ملائكه مثلا ..
:13:

[الأميره]

وباقي الدول شبابها ملائكه مثلا ..
:13:

مالنا ومال الدول الثانيه احنا نتكلم عن شبابنا السعودييييين

يسلممممووووووا غاليه

[رذاذة مطر]

شـكــ وبارك الله فيك ـــرا لك ... لك مني أجمل تحية .

[الأميره]

وفقك الله

[•گبريآء ملـگـة•]

[align=right]


















آولآ مسـآءكم خير من الله و رحمة

عزيزتي دلوع‘ـة فوضَى لن آطيل بالمقدمـآت
بل سأكتب لكٍ تقييمي و وجهة نظري في موضَوعك بكل صرآحة

فبعد قرآءتي للموضَوع كـآملآ وجدته غير منصَف
و آعتقد آن السَطور الثلآث الآخيرة هي التي آنقذت
الزرع من الجفـآف ....’‘

بمعنى آوضَح عزيزتي:
أن آسلوب الموضَوع عند قرآءته من البدآية
تغلب عليه لغة التعميم و هي لغة خـآطئة جدآ فكأننـآ
نضع الشبـآب السعودي كـآملآ تحت تلك التصرفـآت
و آنهم جميعآ يأدون نفس السلوكيآت و كأنهـآ شعـآئر آو
وآجبـآت وبذلك الآسلوب نحن ننفي آن يكون هنـآك شبـآب
سعوديين صـآلحون و مصلحون !

قرأت مره عزيزتي في آحد الكتب أن من أعظم لغة الحوآر
و أسـآليب آقنـآع الطرف الآخر هو البدء بذكر محـآسنه ثم
التعمق إلى مسـآوءه لكي ينتهي الحوآر بفـآئدة ولآ يؤدي لجدل عقيم...’‘

و لكننـآ في هذآ الموضَوع ذكرنـآ سيئآتهم و عيوبهم و تصرفـآتهم الغير
مرغوبة و تركنـآ الجآنب الجيد فيهم فكل مولود يولد على الفكرة غـآليتي
و هم بشر و فطرتهم تدفعهم للآحسن بلآ شك فليسوآ جميعـآ بسَوآء !

لستُ بكلمـآتي تلك آنفي توآجد مجموعة من الشبـآب السعودي
تنطبق عليهم الموآصفـآت التي ذكرتهـآ بل يوجد و يوجد
و لكنني آحـآول آن لآ ننسى الجـآنب الآيجآبي فيهم
فأولئك السعوديون الذين ذكرتي يشملون آبآءنـآ
وآجدآدنـآ و آهل الخير و أهل البر فلآ نعمم ‘


فلنكن منصفـآتٍ عزيزتي بـأرآئنـآ كي ينصفنـآ الرجـآلُ بأرآئهم !




سلمتمٌ من كل شر

كبريـآء ملكة


[/align]

[غيمة شتآء !~]

ويبارك فيك حياتو
ونحن شعب نحب إبراز السلبيات
ونقف مكتووفي الأيدي :smile:

يسلمووو :82:

[الأميره]

شـكــ وبارك الله فيك ـــرا لك ... لك مني أجمل تحية .

[هيبة ملاك]

في غير الشعب السعودي مثل ...... ما نبي نذكر اسماء

ضالمين الشعب السعوديه >> الله يسامحكم

ليهـ دايم تذكرون سلبيات ..؟
اذكرو ايجابيات ^^

أولا: الشجاعة , لاتحتاج الى دليل وحرب الحوثيين ليست ببعيدة.

ثانيا: النخوة: كمثال أبطالنا الشباب عندما أنقذوا النساء في امطار حائل.

ثالثا: الجود والكرم ,, موائد رمضان تشهد.

رابعا:

خامسا:

آسف لن أستطيع الإكمال لأني ربما أحتاج الى صفحات


اشكرك ع المووضووع ...
والله يعطيك الف عافيه ..

[غصون الورد]

شـكــ وبارك الله فيك ـــرا لك ... لك مني أجمل تحية .