• دخول الاعضاء

    النتائج 1 إلى 2 من 2

    الموضوع: اسرار تجعلك طباخة ماهرة

    1. #1
      • ريشـہ مـبـدع
      تاريخ التسجيل
      Jul 2017
      المشاركات
      500
      معدل تقييم المستوى
      30

      افتراضي اسرار تجعلك طباخة ماهرة

      هأقولك على أسرار وتكات وحركات فى الاكل هتخليكى ست الستات..
      ************************************************** ********
      الفراخ:
      ********
      🐔قبل لما تسلقي الفراخ شويحيه مع فصين توم بتبقي الشوربه حلوه اوي
      🐔حضرى خلطة تحمير الفراخ (الدقيق-النشا-البقسماط-الملح-الفلفل-التوابل الخ) فى برطمان كبير وضعى به معيار يسهل الاخذ منه عند كل تحمير
      🐔 حطى شويه بيكنج بودر ومعلقه نشامع البقسماط وانتى بتحضري البانيه او الفراخ الكنتاكى بتبقى مقرمشه وطعمها حلو
      🐔حطى شويه عسل ابيض مع تتبيله البانيه
      🐔حطى شويه لبن على خلطة البانيه او زبادى بيبقى خطير
      الأرز باللبن:
      **********
      🍙بصي حطي ع الارز باللبن لبن بودره وكريم شانتيه بيفرق ف الطعم, بيتحطو بودر و اخر غلوه (دى تكاتى )
      الأرز:
      ******
      🍜جربي عصير ليمونه علي الأرز البسمتي او الابيض بيخلي طعمه خطير
      🍜الرز شوحيه شويه حلوين قبل لما تحتي المياه بيبقي مفلفل حلو اوي لو سقتيه بشربه الفراخ جربيه وهتدعيلي
      🍜الارز وانتي بتسقيه بميه او شوربه ضيفي ليه معلقه زيت هيخليه بيلمع اوي
      الكفته:
      ******
      🍡 1 معلقة كبيرة صلصة طماطم مع عجينة الكفته مذاقها بيبقي روعة
      🍡حطى ع الكفته معلقة بيكنج بودر علشان تنفش واطفى الفحم قبل ما تصبعى وياريت لو تتعمل من بليل
      ـ وكمان الحواوشى اعمليه بنفس طريقة الكفتة بيبقى ارووع
      : البيتزا :
      ********
      🍱الزبادى ف العجينة بيفرق كتير وعلشان تشد زى برة بنحط البيتزا عشر دقايق وأول ما تستوى نخرجها ونحط الجبنة يدوب تسبح بتبقى بتشد زى برة حطى معلقتين او ربع كوباية
      🍱لما تيجى تسخنى البيتزا فى الفرن لو بايته حطى معاها فنجان او طبق فيه ميه هتخليها طازة وتحفه
      ـ البيتزا لما تيجى تبططيها خليها على دقيق السميد( سمولينا ) هتبقى زى بتاعت المحلات
      المكرونة الباشميل :
      **************
      🎀صينية مكرونة بالبشاميل معلقتين لبن على وش صنية المكرونه بالبشاميل وترشي حبة فجيتار عليهم عالوش او بقسماط
      🎀صينية مكرونة بالبشاميل شوية جبنه رومى مبشوره ع البشاميل وهو ع النار بيغير الطعم جدا
      🎀البشاميل بعد ما تطفي عليه وهو سخن حطي جبنة موتزاريلا كتير هتسيح جواه وبعدين حطيه علي المكرونة بيخليها بتمط وتحفة وعلي الوش ابشري جبنة رومي ورشة جوزة الطيب
      🎀البشامل بعمله بيكون خفيف بقشطة اللبن مع الدقيق مع لبن وتوضع على النار هاتعمل احلى باشاميل
      🎀 بدل ماتحطي بيض على وش صنيه المكرونه حطي قشطه هتلاقي لون وطعم رائع
      -المكرونه بالصلصه اسلقي المكرونه نص سلقه وخليها تستوي في الصلصه ومتسبكيش الصلصه اوي هتلاقيها احمرت بزياده
      الصلصة:
      ********
      - رشة سكر علي اي اكل بتطبيخه
      - صلصه الفته حطي فيها بشره جوزه الطيب
      ـ أنا بأحط بشرة جوزة الطيب فى معظم اكلاتى
      - حطي ملعقه سكر مع اي طماطم اوصلصه في اي اكله وبرده مع تتبيلة الفراخ
      -وانتي بتحمري البصله لاي خضار حطي عليها فلفل اسود وشمي احلي ريحة صلصه, ورشة ملح بيخلي البصلة تنزل ميتها وتتحمر أسرع
      -التكة الاساسيه السكر مع اللحمه مع الطماطم مع الملوخيه.
      : الملوخية:
      **********
      🍵علشان تأكلى احلى ملوخية اعمليها بشوربة الفراخ وتكونى بشرة جزرة متوسطه مع الفراخ وهى بتتسلق وتصفى الشوربة وتعملى بيها الملوخيه الجزر بيحلى طعم الملوخيه جدا ( دى تكتى )
      🍵الملوخية الخضرا بعد ما تحطيها في الشوربة حطي رشة سكر بيخليها حلوة اوي وبتحافظ على لونها
      🍵 الملوخيه وانا بخرطها بخرط معاها قرن فلفل بيديها طعم جنان, وطبعا رشة سكر صغيره وقت السوا, وفي الطشه, بعد ما احمر التومه والكزبره, ببشر طمطمايه صغيره واسيبها تتسبك مع الطشه واحطها على الملوخيه طعمها بيبقى جميل
      اللحمة:
      ******
      🍣انقعى لحمة او فراخ فى ميه وخل قبل ماتسلقيهم بساعة عشان يستوا بسرعة
      🍣ملعقة سكر مع كباب الحله علشان اللحمه متسودش
      🍣علشان اى لحوم تستوى بسرعه تحطى نص معلقه سكر وتهدى النار عليها(نص معلقه سكر في اي اكله هتفرق معاكي كتير دي تكة شيفات)
      🍣تسويه الاكل على نار هاديه اطعم بكتير وأفيد صحيا
      🍣لما تشوى الريش او اللحمه أمسحى على اللحمه والريش بفرشاة فيها زبدة قبل السوى ب 10دقائق(ممكن تحطى عسل نحل كمان واوووووعلى الطعم )
      : الكبدة:
      *******
      🍞الكبده الاسكندراني الثوم والليمون هو اللي بتطعمها والزيت يكون مش كتيىر ولو حتعملي كميه يبقوا على مراحل
      السمك:
      *******
      🐠لما تيجى تقلى السمك لو حجمه كبير افتحيه بالسكينه فتحتين علشان ميبقاش نى من جوه
      وكل ما كان فى التتبيله اكتر كل ماكان احلى
      🐠 السمك البلطي جبيه كبير وقسمي نصين وإعملى في فتحات فى البطن والظهر والجنب
      وتبليه بملح وكمون وبابريكا وتوم بودر ولمون كتير
      وقلبيه فى دقيق مع نشا
      واقليه فى زيت غزير ساخن
      وكلى احلى سمك دهبي ومقرمش والزيت زي الفل ..على عكس التوم الصحيح والفلفل بينزل فى الزيت ويتحرق وبيخلى السمك تقيل
      🐠انقعي السمك فى ملح وخل ربع ساعه وبعدين طلعيه صفيه وتبليه وقليه مفيش ظفاره نهائي و اطعم سمكهتاكليه .
      الكيك:
      ******
      🍔لما تعملى الكيكه ومعندكيش فانيليا حطى معلقه عسل ابيض
      🍔الكيكه صيفي معلقه خل وانتي بتضربي البيض هتبقي هايشه جدا
      🍔لو عندك لبن قاطع احفظيه فى الفريزر واعملى بيه بشاميل او كيك
      العصاير:
      *******
      معظم العصائر بحطيلها شويه فانيليا بتخليها جميله
      التوابل:
      *******
      🍲مش بستعمل توابل غير الفلفل والكمون والحبهان فى الاكل كتر التوابل بتضيع طعم الااكل
      وكتير جداا مش بأستعمل غير الملح والفلفل اسود فى معظم أطباقى .
      المحشي:
      *******
      🍟وانتي بتسقي المحشي حطي مع الشوربه اللي هتسقي بيها شويه زيت ذره وفلفل اسمر وشطه ومعلقتين صلصه هتخلي طعم المحشي جميل وبيلمع.
      ـ أنا دايما بأحط مع خلطة المحشى وفى تسبيكة الطماطم والبصل كام قرن فلفل حامى ..وبعد تسبيكة الطماطم بأحط التوابل و1 معلقة قرفة مطحونة و1 معلقة كبيرة نعناع جاف وبعد كده الخضرة المقطعة وارفعها من على النار فورا ..القرفة والنعناع هيخلوا طعم ورائحة المحشى جنان مالهاش حل ..والخضرة كده بتفضل خضراء اللون ومش يتسود .
      الطعمية:

      ********
      ما تكتريش خضرة فيها علشان ما تسودش وما ضفيش اى توابل لها الا عند السوى
      افرميها بالملح فقط والثوم وشوية بقدونس قليل .
      إكتبى تعليق ..وإعملى لايك للصفحة يصلكم كل جديد .
      متنسيش تعملى لايك للصفحة , عشان توصلك كل منشوراتى,
      لازم تدخلى على صفحتى وتضغطى على زر اللايك ..وبكده تشجعينى اكتر واكتر 😍

    2. #2
      فوضوي له مكانه
      تاريخ التسجيل
      Feb 2022
      المشاركات
      930
      معدل تقييم المستوى
      11

      افتراضي رد: اسرار تجعلك طباخة ماهرة

      فعلا نصائح جميلة ومفيدة لكل واحده عايزة تتعلم الطبخ من البداية وكمان انا اتعلمت طريقة عمل اللوبيا ام عين سودا بالطريقة المصرية من موقع يبتدي بطريقة سهلة وبسيطة

    معلومات الموضوع

    الأعضاء الذين يشاهدون هذا الموضوع

    الذين يشاهدون الموضوع الآن: 1 (0 من الأعضاء و 1 زائر)

    المواضيع المتشابهه

    1. طرق تجعلك محبوب وجذاب
      بواسطة نبضة انيقة في المنتدى منتدى المواضيع العامة
      مشاركات: 4
      آخر مشاركة: 11-09-2017, 10:39 AM
    2. مشاركات: 6
      آخر مشاركة: 11-03-2015, 06:17 PM
    3. اسرار جمال المرأة الروسية ادخلى لتعرفى اسرار جمالها
      بواسطة أحمدفورركس في المنتدى الارشيف
      مشاركات: 0
      آخر مشاركة: 18-12-2012, 12:09 AM
    4. عبارات تجعلك تبكي
      بواسطة الأميره في المنتدى منتدى المواضيع العامة
      مشاركات: 2
      آخر مشاركة: 20-04-2012, 09:39 PM

    المفضلات

    المفضلات

    ضوابط المشاركة

    • لا تستطيع إضافة مواضيع جديدة
    • لا تستطيع الرد على المواضيع
    • لا تستطيع إرفاق ملفات
    • لا تستطيع تعديل مشاركاتك
    •  
    www.yanbualbahar.com