بسم الله الرحمن الرحيم
السلام عليكم ورحمة الله وبركاته
اللهم صل على محمد وعلى آله وصحبه أجمعين
خدتي روحي
خدتي روحي معاكي في دنيا تانيه
نستيني كل حاجه في الدنيا ديه
كنت عايش بحلم وحلمي كل ثانيه
يبعد بعيد عن عيوني وعن ايديه
حلمي البسيط اني اعيش
ومحسش في يوم
إن عمري مايساويش
لما ابعد عن حدودك
لما ببقى اتمنى أرضك
وتسجنيني وتزيد قيودك
اوعي يوم تسيبي ايدي
في ضلمة الليل الحزين
اوعي يدبل نبضك داخل وريدي
وتخلي قلبي يصرخ م الأنين
كل السنين اللي عدت
أنا كنت وحدي
كنت عايش أكابر في عندي (عنادي)
أنا كنت ضدي
والتحدي انك تكوني
أرضي اللي فيها
يطرح م الحب وردي
كل البيوت ساكنها الشجن
والهجر فيها المؤتمن
وانا لسه بعاند في الزمن
وروحي معاكي
تايهه في حضن الوطن
خدتي روحي
وسيبتي الجسم خالي
تسكنه أنفاس مستنيه الكفن
11 اغسطس 2021
بكاء بلادموع
ياسر إبراهيم خليفه
