ازاى تخلي ابنك يذاكر لوحده

اى مهارة جديدة بتدربى ابنك عليها محتاجة تدرج و تدريب متواصل
و انك ماتزهقيش من كتر التدريب و التعويد و تكونى صبورة جدا و هادية جدا لحد ما يتعود
لما ابنك بدأ المشى او الكلام او دخول الحمام او القلع و اللبس او انه يأكل نفسه اخد فترة طويلة علشان يتعلم الحاجات دى
للاسف بيغيب عن الامهات انه لازم يتدرب برده على انه يذاكر لوحده لان دا هيريحك كتييير بعد كدة و هيزرع فى مخه ان دا واجب و مسئولية حتى لو مش محببة
مع اقناعه المستمر و الترديد الملح و الاعادة و الاصرار بان مذاكرتك دى مسئوليتك انت ولازم تتعود عليها
التعويد بيبدأ من اول مايدخل الحضانة ...
عوديه على موعد ثابت علشان نبدأ نعمل الواجب
لما ييجى العقرب الصغير فى الساعة على 5 هنبدأ
بدون اى اعذار
و بمنتهى الحزم و الصرامة فى هذا الامر
و بدون اى تنازل و استجابة لالحاحه و تكاسله
لو اتعود كل يوم لمدة 6 _7شهور انه الساعة 5 هنبدا نعمل الواجب
خلاص بعد كدة بيتبرمج على الوقت دا
و هتلاقيه الساعة 5 بيجيب شنطته لوحده و عايز يبدأ
خليكى معاه و قوليله هيعمل ايه
و بعدين سيبيه يعملها لوحده
هنعمل واجب العربى ...
افتح و ابدأ اكتب كذا و كذا
و ماتعديش جنبه
اديله المهمة و قومى اعملى اى حاجة
اكيد طبعا مش من اول مرة هيستجيب
هيكتب سطرين واول ما هتقومى هيروح يلعب
رجعيه تانى بالراحة و بمنتهى الحب
وقوليله يلا حبيبى نخلص علشان نلعب
مفيش لعب قبل الانتهاء من الواجب دا
هيكتب سطرين
و هيعد يفرك و يتحجج بالقلم وحش
لا القلم مش وحش
حبيبى يلا نخلص علشان تلعب
انا عارفة انك عايز تلعب ..
بس نخلص الى علينا و بعدين نلعب
هيقعد يكتب سطرين و بعدين يروح يشرب
هيقعد يكتب سطرين و بعدين يدخل الحمام
هيقعد يكتب سطرين و بعدين يلعب فى ضوافر رجله

دا طبيعى جدا
بس التعويد و التعليم بيعتمد تماما على اصرارك انت..
و بأكد عليكى انت
و انا مصره على ان الام هى السبب فى ان الطفل مش منضبط فى عمل الواجبات
و ان انضباط الاطفال لايحدث ابدا مع ام متسيبة و مفيش فى حياتها انضباط
بيعتمد على عدم استجابتك لتوسلاته و الحاحه واعذاره فى انه يلعب مهما عمل
و بيعتمد على تماسك اعصابك و الحفاظ على هدوئك انت
لما بتستجيبى للالحاح مرة واحدة بس
و تقوليله طب العب شوية و بعدين كمل ...
يبقى كل سنة و انت طيبة
هو بدل ما اتعلم ان اداء الواجب مفيش فيه اعذار
اتعلم الاسلوب الامثل فى التهرب من اداء الواجب بالالحاح و الزن
و هيفضل يستخدم الاسلوب دا للتهرب
و لما هتتعصبى و تزعقى و تصرخى
يبقى ياسعده و ياهناه
هو اتعلم ازاى يستفزك علشان ينتقم منك و من اى حد بيفرض عليه حاجة مش بيحبها
التماسك ...الاصرار على الاكمال مع تقبل التلكؤ ...المحافظة على الهدوء و الاعصاب
خلاص يوم بعد يوم بعد يوم لمدة شهور و ممكن سنين بيتعلم ان اداء الواجب مش هيعرف يتملص منه باى وسيلة
و انه زى اى حاجة تانية لازم نعملها و مفيش مهرب
تعويد الطفل محتاج ام صبورة و عارفة هدفها بالظبط و ام حازمة لاتستجيب للاعذار و التوسلات
ماهى الام المتسيبة غير المنضبطة عايزة تخلى اطفالها منضبطين ازاى يعنى ؟

يعطيك آلعافيه
ودي لك ولروحك ,,~