راجع وانا قلبي من العام مجروح 00 راجع تبي نسيان مافات وياك
راجع وعينك تذرف الدمع مسفوح 00 وفر دموعك ما بقى غير ذكراك
ان جيت والا رحت ما اشوف مصلوح 00 ريح ضميرك وابتعد ما فقدناك
العام قلبي ما شكا لجرح مذبوح 00 يرجى وصالك ويرتجي يوم لقياك
واليوم مالك منزل داخل الروح 00 مات الغلا من يوم غرتك دنياك
قلبي لقا غيرك مع الناس مملوح 00 ماهوب يرخص من شرا الحب شرواك
ابعد وباب للغلا كان مفتوح 00 بيديك هدمت الغلا من سواياك
مسموح ترحل عن حياتي وانا اروح 00 وجرب ترى الدنيا بها دورة افلاك
خلن اعيش افراح وتعيش بالنوح 00 وتذوق ما ذقته من اسباب يمناك
الشاعر : صالح المطلق
