في أمور هابلة اوي ممكن تعمليها تخلي بيتك سعيد و حاضن و غير طارد
و تكسبي بونت ضد قعدة القهوة او خروجة البلاي ستاشن
-جميل اوي انه يرجع من برة بلاقي اكله متحضر له .. متسخن على النار مش ميكروويف متقدم في صنية. ..كلمة في ودنك كدة يا اختي حتى لو الاكل مهبب و محروق.. هي رسالة اهتمام
- سيبي ام الواتس اب و الفيس بوك و موقع فتاكات.. بقيتي مايلة لقدام زي برج بيزا من لوحتك على الموبيل
- اسمعيه و هو بيكلمك عن شغله حتى لو مش فاهمة حاجة.. كفاية نقد و تقطيع في الراجل و انه كان احسن له ياخد الشغلانة الفلانية و يا ريته سمع كلام خالتو سوسن و عمو محسن... انتي مالك؟ انت ايش فهمك؟
-تفتكري يعني هو لما بيصحى من النوم الصبح مش شايل هم قسط الشقة و المدارس و الشنطة اللي نفسك فيها وحاسس بالقهر انه مش قادر يجابهالك؟!
- حلو انك تخافي من الحسد و مش عيب انك تحكي مع صحابك.. بس ما يصحش جوزك يكون مادة دسمة لحوارتكم الفارغة.. ده بيولد عدم احترام و بيوصل لجوزك الاحساس ده حتى لو مش قصدك
-كلمي عيالك عن ابوهم .. ارسمي له صورة ذهنية جميلة عندهم..
- لو مش حتخيطي فردة الشراب المقطوع.. ارجوكي ارميها.. مش لازم يقعد يدعي عليك و هو بيصلي الضهر لما يشوف صباع رجله مدلدل و هو واقف في صلاة الجماعة
-الغسيل اللي مش حيتنشر في ساعتها يبقى بناقص تدوير الغسالة و بعدين تسبيه لغاية ما يعفن
-لما يخش ينام الضهرية ما تخليش العيال تخش عليه بلاش الحقد ده
- اجمل حاجة في الدنيا انك تكوني ضعيفة..هو مش متجوز واحد صاحبه.. و مش كل حوار تقلبيه مسائل فقهية .. ده حوار بين اتنين ييحبوا بعض مش خطبة جمعة
جوزك بيتعب.. و حاجات بسيطة بتسعده.. و افتكري دايما..الحفاظ على البيت مسؤوليتك انت.. علمي عليه بحسن التعامل و الادب و طيب المعشر.. و لو شايفة فيه العبر و مافيش فايدة اخلعيه و الجو بتاع فاتن حمامة انك بتضحي عشان الاولاد ما بياكلش عيش..و الاولاد دول اول ناس حتبيعك لما تكبر.. و تبقي ضيعتي عمرك فشوش.. او ترضي بحالك و احمدي ربنا على بيتك و جوزك و حافظي عليه.. و اسعديه
نهاركم شاي بلبن
https://scontent-cai1-1.xx.fbcdn.net...76&oe=5A357AF3
