خطار عندك و العمر باچر یشد ارحاله
واللی یموت ابشوفتك يا مسعده او هنياله
متع شبابك و ابتسم
من دنيتك فرصه اغتنم
واتركني بنياب السگم
ماريد اشوفن دمعتك فوگ الوجن هماله
دنياي انه عبرة وكت عوف الطبيب ابحاله
خطار عندك و العمر باچر یشد ارحاله
خطار عندك و الحزن ويه الگلب صاير حلف
ما اطمع ابغير الوصل ما اطمع ابغير العطف
مطعون بسويد الگلب ودموع عيني ما تجف
محتاج للحب و الوفه محتاج حنيه او لطف
مشتاگ اشوفك بالهنا
واغفه على زندوك سنه
واگضی العمر ویاك انه
او لو غبت مشوار اعتقد هالگلب يصبح عاله
و تصير دگاته لحن من یحس بيك اگباله
خطار عندك و العمر باچر یشد ارحاله
خطار عندك و انتظر يوم الرحيل بلهفه
مطعون و صوابي كلف ما تنفع المستشفه
طش الدوه او عزي الگلب واحرگ ابناره الوصفه
متعوب نحلني الهوى و سدني بلچن اغفه
خطار انه بدنيتك
عطشان . اريد مروتك
غمض اعيوني ابضحكتك
عمري سراب او ينتهي او بالعمر ماكو اچماله
یگضي او حزن كل البشر يندفن حدر اذياله
خطار عندك و العمر باچر یشد ارحاله
خطار عندك و الهوى بالروح ثبت سهمه
و الگلب یا ولفي صفه مخزن عذابه او ظلمه
گلب المحب مثل الطفل من العطف لتحرمه
مدري اشردت احچي بعد ضيعت اجمل چلمه
حلوه او اعز من دنيتي
او الها علاقه بدمعتي
ذكرني شنهي احچایتي
لیش انسه من نگعد سوه متگلي شن هالحاله
بس انه لو كلمن يحب ما يظل كلشي ابباله
خطار عندك و العمر باچر یشد ارحاله
خطار عندك و الگلب من لوعته یتحسر
یتمنه لو سار النعش عن الجسد يتاخر
رايد عمر اطول بعد و يعيش وياك اكثر
لتضيع ايامك هدر
وياي يا ريع العمر
ابعد الك كل العذر
بيتي جهنم و الحزن انه اصبحت تمثاله
معذور الك كل العذر لو ردت ما تدناله
خطار عندك و العمر باچر یشد ارحاله
خطار عندك و ايست واصبحت سود احلامي
او خلصت شمعتي و الفرح شح بتوالي ايامي
صدگني كل هم ينجلي من تبتسم جدامي
غالي او عزيز او شوفتك تطرد جميع الامي
لكن اريدك تبتعد
عن العذاب او تنسعد
ماريد گلبك ينمرد
شگ من سجلك ورقتي واتركني بتعس حاله
واختار مثلك اريحي يصفالك او تصفاله
خطار عندك و العمر باچر یشد ارحاله
دنياي انه عبرة وكت عوف الطبيب ابحاله
شرح بعض مفردات القصيدة
خطار = ضيف
باچر = بكرة غدا
السگم = السقم المرض
فوگ = فوق
عوف الطبيب = اترك الطبيب
الگلب = القلب
بسويد الگلب = بسویداء القلب
مشتاگ = مشتاق
واگضي العمر ویاك = و اقضی العمر معك
مشوار = لحظه
هالگلب = هذاالقلب
دگاته = دقاته
اگباله = امامه
و صوابي كلف = و جرحي بليغ عميق
طش الدوه = ارمي الدواء
واحرگ = و احرق
الوصفة = وصفة الطبيب الراجيته
چلمه = كلمة
بلچن = لعل عسى
بلچن اغفه = لعلي انام و اغمض عيني
ماكو اچماله = لا توجد اضافة
يگضی = ینتهي يقضي
احچي = احكي
احچایتی = حکایتی
نگعد سوه = نقعد نجلس سوية
متگلی = اذن قل لي
صدگني = صدقني
صدگني كل هم ينجلي = صدقني بان كل هم سيزول
شگ = مزق
اريحي = لطيف و مرح
