✨احيانا بتكون المشكلة في التربية هي #نظرتنا_للطفل .. يعني ان احنا شايفينه حد صغير كدا و نستهين بمشاعره، وكأنه طفل صغير بمشاعر صغيرة، وبنفتكر انه مش هايفهم، و طبعا كتير فاكرين ان كلمة نفسية الطفل دي دلع فارغ و مالوش اساس من الصحة
و الطفل دا.. عادي بقى نزعق فيه و نشخط عادي .. مهو هاينسى..

🍃يعني مش ممكن اشخط في صاحبتي لما تيجي تكلمني و انا مصدعة و اقولها ريحيني من زنك انا مصدعة.. بينما ممكن اقولها لابني..
و لو حتى حبيت اقول لصاحبتي انها زنانة و انا مصدعة هاختار الكلمات اللي هاقولها.. فمثلا مش هاقولها بطلي رغي و شكوى بقى انتي انسانة فارغة وانا مش طايقة اسمع صوت..
بل هاقول لها بعد اذنك يا حنان (مش عارفة مين حنان) بعد اذنك انا تعبانة شوية ممكن نأجل الكلام دا لوقت تاني..
يااااه على الرقي.. ياه على الجمال

🍃و لو صاحبتي عايزاني انزل معاها مشوار و انا مش طايقة الف معاها.. مش هاقولها اني مش طايقة بل هاقول لها.. انا اسفة يا حبيبتي مشغولة انهاردة..
شوفوا الرقة.. شوفوا الحلاوة

🍃لكن لو الولد عايزك تلعبي و انتي مش راضية هاتقوليله ابعد عني انا مهدودة من المناهدة معاك طول اليوم و مش قادرة اتهد في اي حتة دلوقت

🍃لو صاحبتك جت لك البيت على غفلة و انتي تعبانة هاتقومي كدا و تنعنشي مهو عيب تسيبيها وتروحي تعمليلها حاجة تشربها و تدخل المطبخ و انتي فيه و انتي اصلا مش بتحبي حد يدخل مطبخك فتقوليلها برقة كدا.. لالا ما تتعبيش نفسك انا هاعمل الشاي و اجي على طول.. وانتي دماغك بتقول اطلعي برة المطبخ انا مش باحب حد يقف معايا في المطبخ يا ولية و بطلي رغي :)

🍃انما لو بنوتك الجميلة لقتك قعدتي في المطبخ عشر دقايق و قلقت لعدم وجودك.. هاتقوليلها بطلي زن بقى صدعتيني روحي العبي بألعابك انا جاية وبطلي دوشة انا مش ناقصة ابوكي زمانه جاي و هاينكد علينا..
بينما اصلا ممكن تطلعي لها حلة ولا سلطانية و شوية دقيق ولا مكرونة و تقوليلها اطبخي معايا ولا خدي قطعي النعناع دا لو هي اكبر شوية ويبقى وقت مشاركة..

مش كدا⁉️

⁉️طب ليه ما نجربش نعاملهم على انهم كبار في مشاعرهم.. لان فعلا الطفل الصغنن دا عنده مشاعر كتير اوي.. و حساس اوي.. دا غير انك انتي ملجأه و أمانه و حنانه و مالوش غيرك.. بينما (حنان) هاتروح لصاحبتكو (انجي) وتتكلم معاها و تنزل تشتري الحاجات اللي عايزاها معاها؟

🍃انا عارفة انك بتكوني مضغوطة.. وفعلا مش طايقة نفسك. بس انا هاطلب منك طلب..

❤️قبل ما تنطقي مع ابنك.. اسكتي عشر ثواني.. و افتكري انه مشاعره حساسة بجد.. و مش صغير و ما بيفهمش ولا حاجة.. دا بيفهم و بيفهم اوي.. و مش بس بيفهم.. دا بيحس
و اه بيحس بيكي لما تكوني تعبانة.. بس هو مش بيكون فاهم يتعامل ازاي مع الاحساس دا..
يعني ماما تعبانة يبقى الزق فيها عشان انا باحبها.. انا لما باكون تعبان باحتاج ماما جنبي يبقى ماما تعبانة الزق فيها عشان اريحها..

❤️و ابنك لما بتكوني قلقانة بيقلق.. و بيحس بالقلق زيك.. عشان كدا بيزن.. عايزك تطمنيه.. مهو انتي و بابا امانه...

❤️قبل ما تتكلمي معاه وتزعقي.. اسكتي عشر ثواني.. بس.. و افتكري انه بيحبك.. اعتقد دا ممكن يغير الكلام اللي هايطلع منك.. و صدقيني مع الاستمرار هايغير رد فعل ابنك او بنتك معاكي..

❓مين هاينفذ الكلام دا من النهاردة؟