لجهودكم باقات من الشكر والتقدير
على المواضيع الرائعه والجميلة
نوبات الغضب وكيفية التعامل معها !!
من سن سنة وشهرين تقريبا لسن تلات سنين ونص مثلا .. بيبدأ سن أستغفر الله العظيم من عمر الأطفال مشهور بنوبات الغضب .. 😈☠️💀😂
هنسيبنا من الطفل خالص .. 👶
أنا هربط بُقك انت بسوليتب جامد وهربط ايديك في رجليك .. وهدي اللابتوب بتاعك كأب أو علبة الكريم مفتوحة بتاع فيكتوريا سيكريت بتاعك كأم؛ لطفل عنده سنتين مثلا ..😂 متوقعين انتوا هتعملوا ايه؟؟ رد فعلكم هيبقى ايه؟؟
تخيلتوا؟؟🙄😏
هتتنططوا في مكانكم؟؟
هتحاولوا تفرفروا وتفكوا ايديكم ..
هتقعدوا تصوتوا وتطلعوا أعلى صوت تقدروا عليه عشان تلفتوا نظر حد أن في مشكلة محتاجة لحل ..
نرجع للطفل تاني 👶
هو متكتف مش عارف يوصل للحاجة اللي نفسه فيها وفوق كدة مش عارف يعبر عن رغبته فيها من الأساس .. عنده رغبة ومشاعر أو احتياج ومش عارف يعبر عنها .. معندوش القدرة عن أنه يترجمهم لكلام ..
فبيضطر آسفا يلجأ للصويت والدبدبة ورمي نفسه على الأرض وأحيانا خبط رأسه في الحيطة أو ضرب نفسه أو التف أو الضرب؛ عشان يقول أنا هنا أنا عندي مشكلة يا ريت حد ياخد باله محتاج حل ..
رد الفعل القاتل دة ممكن يحصل في البيت أو في السوبرماركت أو الحضانة أو في تجمع عائلي أو عند حماتك مثلا 😁😂
ازاي نتعامل معاه واحنا مدركين تماما إنه في حالة غضبه الطفل مابيبقاش سامعنا إطلاقا؟؟ مخه فعلا مقفول حرفيا وقدام عنيه مافيش غير احتياجه وشعوره بالإحباط أو الغضب أو ... إلخ ..
مبدئيا مانشخصنش الموضوع انت مش مستهدفة وهو مش قاصد يجيبلك جلطة ولا هدفه يشلك إطلاقا 😂
ثانيا ودي الأهم نوبات الغضب فرصة كويسة جدا للتواصل مع الطفل وبناء ثقة بل وكمان الأخذ بزمام الأمور وهو هيديكي زمام الأمور عادي والله جدا
لأنه بيبقى فاقد السيطرة على نفسه تماما بس لو تعاملتي مع الموضوع بشكل مظبوط وهادي .. مهما كنت مضغوطة أهم حاجة لما ينفجر تبقي انت هادية تماما ..
هنمشي بخطوات بالترتيب دة عشان نفهم ولادنا ونعرف الطريقة المناسبة معاهم أكتر ..
١. ننزل لمستواه ونحضنه..❤
٢. نعبرله عن اللي مش عارف هو يعبر عنه بصوت ودود وهادي ..
مثال: ( انت زعلان من ماما عشان مش عايزة تديك الموبايل مثلا؟ أو مش موافقة إنك تاخد حاجة حلوة؟ ) وهكذا ..
٣. لازم نفهمه هو حاسس بإيه ونسمي شعوره (إحباط زعل غضب وجع .. )
٤. إقرار مشاعره وتوضيح إنك حاسة بيه وانك بتحبيه .. ملحوظة: هنقر مشاعره بس مش هنديه اللي هو عايزه لو كان قرارنا من البداية لأ ..
٥. لو مش حابب يتمسك أو يتحضن ابعدي فورا بس خليكي في أقرب مسافة تقدري عليها منه وانت مظهرة كامل التعاطف والود وبتكرري نفس الكلام بنبرة هادية ..
٦. ماتسمحيش انه يضربك امسكي أيده برفق لو حاول وابعديها عنك مع تكرار نفس الكلام اللين الواضح اللي بيوجه رسالة معينة وواضحة (أنا هنا وهساعدك وبحبك) ..
٧. لو وصلتوا لمرحلة بيرمي نفسه على الأرض بنشيله بكل هدوء ونغير المكان (دة time out بشكل أكثر إيجابية) نطلع العربية ناخد جنب ندخل أوضة تانية ندخل مسجد المهم نغير المكان عشان نغير الظروف اللي استثارت غضبه ونحاول نشتت الإنتباه وممكن بعدها نتبع سياسة (بص العصفورة) 🐦
عن تجربة ❤
اللي مكتوب فوق دة قد ما بيحتاج مجهود في البداية إلا أن مفعوله سحري مع الوقت .. وهيبقى سجية ورد فعل طبيعي بعد كدة ..
رقية بقت تطلب أهديها عشان تعرف تفكر وبقت تهدى مجرد ما تحس اني مستوعبة حجم إحباطها إن التاكسي وصل ولازم نسيب الملاهي ونروح حتى بدون ما أعرض بدائل ..
وأبوبكر بقى يهدى أكتر لما بقيت أقوله انت زعلان وهو نفسه بقى يقول مع الوقت (نان) يعني زعلان .. ومجرد إحساسه إني حاسة بيه بيهديه .. وبندور على بدائل ..
ماتتكسفوش في التجمعات من نوبات الغضب .. كل الناس عندهم أطفال وكلهم بيعملوا كدة الفرق انكم هتبقوا بتحاولوا تتعاملو معاها صح وبشكل علمي وبيراعي مشاعر أولادكم ونفسياتهم ..
عشان مايطلعش ابنك ذكر بيضرب مراته لما يتعصب أو يتعرض لضغط ولا بنتك بتحط همها في العيال لما تكبر وتبقى أم
لجهودكم باقات من الشكر والتقدير
على المواضيع الرائعه والجميلة
يعطيك العافيه
ودي وخالص تقديري لك
الذين يشاهدون الموضوع الآن: 1 (0 من الأعضاء و 1 زائر)
المفضلات